Pasaylua ako, Nagbasol ako

Kinsa ba ako nga maghisgot
Kabahin sa Imong kaayo kanako

Kinsa ba ako nga magsugilon
Sa Imong pag-agak kanako

Wala ako'y igong katakos
Daw sa naamang dinhi taliwala
Sa Imong katawhan

Nagpakabuta sa mga panghitabo
Gilup-itan ang konsinsya ug gitago

Nisalom sa lunangan sa pagpakasala
Bisan sa dakong kasayuran nagmatig-a

Apan nagbasol ako
Sa pagtubay sa hadla sa tentasyon

Nagbasol nganong nagpaanod
Sa bul-og sa kaligutgot ug kasilag

Wala pamalandungi ang imong pasaylo
Nga gipadagayday dinha ibabaw sa krus

Sa krus nga naglansang kanimo
Gumikan sa akong pagkamakasasala

Pagkamadinumtanon, pagkamasupilon
pagkatawhanon, bisan luyo sa imong paggiya kanako

Pasaylua ako, Nagbasol ako,
Hugasi ang akong pagkamasasala

Hunari ang kabahong sa akong pagdumot
Ug tul-ira ao sa akong pagkamasupilon

Gibasulan ko na ang tanan
Andam na akong mupadayag sa akong nasaksihan

Puy-an ang imong mga pagtulun-an
Ug buntugon sa maka-usa ang agni sa pagkatawhanon

Bisan ilansang susama kanimo
Dawaton ko sa walay pupanuko

dili kinaiya

dili mapalong ang adlaw
dili niya kina-iya ang pagsalop
sa kaudtuhon ug pagsubang sa kahapunon

ikaw man ug ako dili mana-og sa
hangdan nga dili ato
ug nga iya sa uban

ug dili buot sa hangin
ang muhalok sa aping
sa pagkapukan

ayaw kasubo inday
ania ako uban kanimo
dili mubiya bisan sa pagpanamilit
sa adlaw didto sa kasadpan

pangagho

maayong hunahunaon
una kini buhaton,
kay mahimong ang lakang
hinungdang sa pangaghong
maankon..

kalinaw

kalinaw,kalinaw
tagai ko ninyo ug kalinaw
gusto kong magpuyo sa mingaw
kanang walay magtugaw
kanang atua sa awa-aw

dili balihong mag-inusara
wala lang koy makita

pangindahay

ang pangindahay kinaiya,
sa tawong tag-iya sa kabuntagon
nga atua nagpa-abot
sa bubungatod nga paglaom

dag-om man apan dili malisod
ang pagtul-tol sa ingon
kay makausa
niya kining naangkon.

adlaw

tulo man ang bulan
nagbaga man
ang dinagayday sa sapa
usa lang ka adlaw ang
musubang sa matag-adlaw
nga akong gipangita.

kapakyasan

kinahong paglaom
mabulukong taghoy sa hangin
uban sa balurong luha
sa usa ka kapakyasan
perlas ang iyang ngalan.

Niining Kalibutan

balurong tipasi
gidalit mo dinha
sa altar nga lapukong
kahon sa pagmahay

gialig-ig sa
tumang kamaya,
nigong nagdupa
sa pagpakabana

buot muangkon
sa himaya
hulip niining
kakabos
ug katimawa.

nangalarag nga mga dahon:

lalag, pula ug bisan ang
hilaw--lunhaw
biktima sa pag-agi
sa makusog, mabangis,
madaug-daugong
alimpulos
dinha sa nataran
sa akong pagpaubos.

Ang Paril

Sama'g paril
wala mairog,

wala'y kinabuhi,
wala'y pinitik,

kay wala'y
kasing-kasing

Ug migahi,
nitikig, nilagom,
nawad-an sa gahom.

Unsa pa ma'y iya?

gawas sa paghunos,
pagkutlo, pagluka
sa dughang bato

nga nalubong
sa hinigugma
kaniadto.

Ang kapuol

Naabot ang kapuol--

ang pagka walay uminto

gadagan nga daw sa kawang

mga naabog nga paglaom

Dili matikang nga mga tiil
sa ang-ang sa panumduman

hinagiban sa nahimutangan
niining tiilan sa himaya

ang pagtuon ug lupad

unsa man sa'y mapuno nimo
kung imo lang kalingawan
ang paglupad?

tingale ugma mas hawod kapa
nga mulupad kay sa imong inahan

maong ayaw huna hunaa nga gabalak ka
apan anara ang kaugalingon
nga litukon ang sama sa tambol
nga mga pulong.

kinsa

kinsa ang angayang maulaw?

siya nga nagyubit,
siya nga igo lang sa pagtan-aw

ang matuod nga balak

walay kapin kon kulang
gikan kini sa kinahiladman
mga pulong nga muhulagway
sa ania sulod sa balatian

nitulimbang man kini
o musalom dinha sa pagsugod
sa gagmayng mga lakang
sa batang nagkat-on ug baybay--
pahiyom nga dako sa iyang inahan.

dili hulip

migilaw man
ang syudad sa iyang kalipay

dili kini igo nga mulingaw kaniya
bisan sa iyang pagpauraray

miawit man and syudad
sa sirbato sa mga jeep nga milabay

dili gihapon kini hulip
sa mga nanag-awit nga mga punay

ug sa labo nga mga talidhay
sa iyang anak nga gamay.