Pamasin Sa Kabos nga Mag-uuma

Kabilayako sa bunhok, mikuyog sa
hangin nga wala man lang manggunit.
Nagpalayo sa mikapa-kapang
himungaang nangitlog sa pugarang
ginama sa lukayng bantugan.

Nanimpalad makakaplag' kapasilungan
sa ulang nagdangarang. Nga naghagurob daw hinagobhob
sa mga irong hakog. Buot mudasmag, muhambat
dugang sa gisagubang kalisod.

Bata mag tigulang, himsog mag batan-on
dili balibaran. Namahala'g namasin, wala
baliha ang gibilin.

Didto niadtong layong dapit, bahalag magping-it
sa kangitngit. Mubarog, makigbatok sa salbahis na ok-ok.
Pasayluon lang unta sa langit.
Ang bunhok dili anad balibaran ang hagit.

Tinughong

Lusang puti nga busluton
Sa tayang dugay nang nikaon
Sa sartin nga gama sa latang pinikpik
Haron mahulmang bahawan.

Gipuno ug bagang gikan sa linung-ag
Nga kan-ong binungkagan,
Lutong mais nga bag-ong ginaling
Sa batong lingin ni tatay
Nga tua na sa laing kalibutan.

Pagkatam-is sa gisabawng tubig
Sa linung-ag nga bag-ong haon
Aron matughong hulip sa nagkutoy
Nga tiyan sa kagutom.

Mitubod akong luha
Misawom sa pina-ig mais
Nga akong gisuwa
Giparis sa kaling nga binagahan
Nga sa kahumot nanilingan.

Gipangandoy ang wala diha
Kadatulon lad-ok sa dagkong lusok
Sa bugas nga gahapon pa nahagdaw
Sa baong lunang gisanggian.

Kanus-a pa matilawan ang matuod
Nga pamahaw'g, paniudto.
Sagdi nalang ang panihapon
Puwede ra tong damguhon.

Balay Tinakip Sa Istorya Sa Pobreng Kahoy

Pakli sa kagahapong puno sa sinipilyang
Istorya sa kinabuhing hangtod karon
Gipasinawan pa pag-ayo
Haron ang sapnot nga sugilanon
Mahimong hanglas pamation.

Apan walay dali sa pagbalay'g kinabuhi
Kinahanglan ang pidedo sa ekspertong
Katiguwangang--giya sa pagpakabuhi
Sila adunay dalang martilyo haron
Mupok-pok usahay sa atong kagahi'g ulo
Ug matul-id sa atong
Bawog nga kabilyako.

Mahimong musihag usab ang linala
Nga pagpag sa kaalam ug pagpaninguha.
Nga karon ug unya
Kinahanglang pahugtan aron lig-on
Sa paghandos sa makusog nga bagyo,
Muhadla dili pagpakatawa
Kundi pagsuta sa pondasyon
Kung lig-on ba.

The love of my life

They say it's not possible to visit
And live away from the earth,
They say it's not possible to breath
without oxygen's help.
I wonder how I live without you near me
Guess I'm lost in the winding road of life
And stumble in the rocky mountains height
Without you coming with me.
Is this love or obsession?
Is this love or position?
If so, I want you to have me
And be your own princess like
The sleeping beauty, who waited
For her prince to come after a 100 years.
I wanna be the dead's man chest
Who got his heart and preserve
For his one true love.
I don't know how much this can be
But I know how much you are to me.

Kargador

Nikitbi akong atay
Sa dihang nakita kang gipanungay
Sa dugong singot sa uwerto
Daw bugbog sa imong panagway
Nagping-it daw mamatay.

Wala kaba maluya...

Nahinuklog, nagtuaw
Nganong gilatos sa akong
Huna-huna'g nganong gipaantos
Ug gisakit sa ingon.

Wala sila maluoy...

Giampingan tika daw bulawan
Linigo sama sa batang puwahay
Salbahis, ila kang gibiay-biay
Ilang kang gikuhaan sa imong atay.

Wala sila makonsensiya...

Nganong niantos pa maka
Nganong nagpabilin nga buta
Nagpakaaron-arong wa makakita
Sirad-ing kasadpan
Ablihing kabugason
Ginamit ang imong hinuptang langit
Kanila ayaw ipaangkon.

Sabaw sa Tinunuang Utan

Sugyot sa kagutom
Tilawan ko ang kagahapon
Kadtong atong panagdulog
Na ang kalami natagam-tam ko pa gihapon.
Buot ko'ng laing putahi
Tinagsip sa udlot sa kawayan
Linubiang langit sa kahidlaw
Nga naglaway-laway pa ang sabaw
Sa ispiso nga timpla
Nilaputay daw laway
Kaluod wa ko batia
Gumikan sa kahalang gikan sa luy-ang
Bag-ong inibot gikan sa uma.
Lalag sa sabaw
Sarang makatagbaw.

Kulukadidang

Nilili ka niadtong gawang sa kasalbahis
Nibukal akong dugo'g gabaga akong mata
Sa kalagot ug kapikal sa imong gipakita
Nganong sa kadaghang lugar
Didto pa gyod niadtong hilit-hilit
Diin wala'y tawong makapakgang.
Nasayop bako sa akong pangagpas?
Adunay bakukang kanang imong panumduman
Buot kang mubuhat ug dautang lakang.
Kadtong paglili mo niadtong gawang sa atong tindahan
Buot kang musinyas sa imong kulukadidang.
Imo pang ipasangil ang animal tang silingan
Nga kintahay nasayop ug nasaag lang
Kinsang buanga ang mutuo
Ilara ko, lingin na akong ulo.
Karong pang natiguwang nako's kalibutan
Buot mong yatakan himuong sinyalan
Tarungon ta kaha ni...
Tapuson ta ang wa pa nato masugdi.

Hulagway sa Sapi

Daw bulak sa gumamila ang imong mga ngabel
Aduna kiniy hulagway sa katam-is
Nga madimdim sa bisan si kinsang adunay bahandi.
Nag gilaw-gilaw susama kahayag sa adlaw
Ang kasilaw mudulot sa unod sa bisan kinsang mutan-aw
Wala'y nangahas pag-angkon
Wala'y si bisan kinsang musugilon
Bisan ang pagpaduol niini mahimong imposible
Tanghaga ang katahom
Ang uban naga-ingon
Kini ang mansanas sa bag-ong panahon
Mansanas nga nag-abog sa katawhan
Sa kanhing paraiso ni Eva ug Adan.

Pagbaha sa Mananaygon

Panahon nasad para mulugsong
Panahon nasad haron makita ang katawhang
Gaya ug malipayon
Naduol sa tyempo sa panaygon
Mga bukidnong sama sa hulmigas
Magpanon sa lungsod nga tinugdan
Sa pagkaong ilang matigom
Haron mahataga'g gamayng
Kalipay ang paskong ilang paabuton
Nagbudlay ug baklay
Sa kabanayang gidayandayana'g
Mga bituon sa kalangitan
Mga hulagway sa kasadya'g kaadunahan
Nanghinaot mapiksan
Sa tinagsip sa
Grasyang ikadalit
Bisan gamay, bisa'g usa kakum-ko'ng bugas
Dawaton sa kalipay.
Hala singit, hala bunal
Nianang nagkayabag munang
Kiling-kiling nga tansan
Hala sayaw, hala kiay-kiay
Sa sunata mong karaan pang nanay
"Alabado-aalabaado
Si hesus atong Ginoo,
Ug maayong pasko tagbalay."

Hulagway Sa Kaabin Ug Kaaway

Lingin nga dagyaw
Repleka sa usa kababay
Gaatubang nga gakatawa
Buot mubiay-biay.

Matagkaron ug unya
Siya ang imong makita
Usahay kaabin
Apan usahay kaaway.

Tinagsip sa lantip niyang huna-huna
Sa pangutana mo ikaw tubagon
Sa way pagduha-duha
Tug-anan ka niya.

Kabahin sa imong kinabuhi
Ihapit mo kaniya
Ang pagkunsulta
Ang kasakit ug kamaya
Nga buot mong masuta.

Gustuhon mo ma'g sa dili
Siya ang imong ikaw
Nga malantaw mo
Sa tubig nga tin-aw.

Ang katakos sa kawayang walay baruganan, angay bang biay-biayon ug husgahan?

Hilabihan ka kuyaw
Ang panglantaw sa kawayang
Gapaling-paling bisan luyo sa unos
Ug sa bagyong nilampurnas kaniya
Wala kini niya panumbalinga.
Hinunua nanglimbasog pagbatok
Sa madaug-daugong hangin
Nga buot kaniya mupukan sa dayon.
Gibalibaran ang tulod
Sa maagnihong bul-og sa baha
Nga buot mulumos sa iyang katimawa.
Ug ang mahait nga liti
Usahay mutay-ug
Sa iyang katakos ug kaisog
Inubanan sa masipang katawa
Sa mabiay-biyong dugdog.
Kining tanan wala mahimong kabalaka
Hinunua nituybo sa iyang galamhan
Ang mga tunok sa iyang kagingking
Nga andam mutilisok
Sa gustong mangahas kaniya pagpukling.
Ug bisan pa sa pagpangahatak
Sa iyang dahon sa kinaadman
Iyang gipakita sa matang may dila
Nga siya mibarog
Ug sa gihapon tibuok.

Bugwak sa kalayong madaug-daogon

Banyaga ug way puamod nga mananap
Gahinayg lupad-lupad
Dayn sakdap sa uyamot nga panit
Nga walay puruhan sa pagbalos sa mga kasakit.
Buot mulikay ug manimalos.
Buot mutalidhay sa pagkapukan
Sa mga animal nga hilabihan ka tampalasan.
Apan walay mahimo gawas sa pas-antos
Dinaug-daog
Sa mga tampalasang binuhi ni hudas
Mabudhion-- bisan gipakaon na
Hasta siko apilon pa
Wala pa gyod nakuntinto
Hasta ang kalag pangayuon pa
Iapil sa hinipusang mga bula sa katapusan
Sa mga higalang iyang gihimong kaabin
Ug giapil sa iyang kadautan.

Carolina

Salbahis nga mga lagong
Kanunay nagbahas-bahas
Sa tuong dapi-dapi
Sa gatasang baka
Nga samdan ug gikabahong.
Nagsigi ug samok-samok,
Naghasol, ug sa walay puas
Naghinay'g kut-kot dugang sa kasakit
Ug kapait, hinungdan sa pag-alindasay
Ug dili makatulog taliwala sa kagabhion.

Samtang ang akong buotang bana nagkanayon:
"Karon lang ug mutugpa pa mo gihapon
Kung madihugan ko na
Niining dinukdok nga dahon sa Carolina.
Tan-awn ta lang ug dili ba mo malipong
Ug mupalayo, mulupad nga wa nay balikon
Sa kabaho sa Carolinang akong ipahid
Nga maoy akong nag-inusarang hinagiban
Tudlo pa sa akong amahan
Nga wala na sa kalibutan."