Komento para sa usa ka gwapo

Mukomento unta ko atong balak
sa nagkagwapo nga si rsb
ambot ug naka-ila ba mo

ug muingon unta ko
nga matuod gwapo siya

wahahaha~
kay gwapo man gyud bitaw
bisag masuko pana sila
ako ang nakakita
wahahahahah...

kinsa man sab nang mga prinsesaha
ipa-ilaila unya ko

Sinyalan

miawit sa akong panumduman
ang akong damgo ganihang kaadlawon

mipukaw kanako, ug misugilon
kabahin sa akong anghel nga magbalantay

nga naa kanunay sa akong likod
bisan sa akong pagmagul-anon

ug bisan sa akong ka walay pulos
ning kalibutan, limbungan sa gihapon

pastilan baya gikapoy nasad ko,
kapoy kanang magpakaaron

nga buotan, matinahuron, seryuso
apan dako kaayong sinyalan.

Pangagpas

gigutom ako pagtaman
sa pagbasa ko sa maanindot
mong mga pangagpas sa kalibutan

apan ingnon ko ikaw
maayo nalang unta
ug gasukad ka para nako

hangtod karon wala pa
gihapon ko'y panihapon
nalipong nako,
labad na ang akong ulo

nimo.............

ang imong pahiyom

kalami sa imong pahiyom

sula sa akong panihapon

murag ang humba nga pagkalami

ikumot sa akong kan-on.

amigo ug amigo

amigo: pila na ba ka hulagway sa gugma
ang imong nakita?

amiga: wala pa gani kini maglima
pipila palang kay bag-o lang
ako ning kalibutana

amigo: nan kuyog ngari kanako
akong isugilon kanimo
ang kalim-an ug lima
nga wala pa nimo naila-ila

sonata

ang imong mga pulong

nga giiwag mo sa akong

pagpakatarong niining

halapad nga intablado

ug gibaylihan ta

sa atong mga sonata

sa gugma ug pagtoo

bililhon alang kanako

ug bawnon ko kini

didto sa atong pagpalayo.

ilupad ako

ilupad ako sa bulan
gusto kong magduyan
anang mga gilak sa kabituonan
paabutan ko ikaw unya
didto sa halok sa akong alungnan
ug taklap sa akong gugma
nga daw gabagang habol sa himaya.

hain ka na?

gusto kong maghabol anang langas nga dalan
gusto kong muuban sa bul-og sa katawhan
kanang libuan haron ila akong matabunan

ug dili ko na madungog ang kamingaw
dinhi sa naghiwaos nakong dughan
gusto ko ang kauban sila

apan dili sila mulingi kanako
wala ni bisan usa kanila nga gatagad
ikaw lang tingale nga wala diha kanila

hain ka na?
kanus-a pa kaha tika magakos pagbalik
niliraw naning akong kasingkasing
nag-alindasay, nahigwasa sa paghandom kanimo

hain ka na?
palihog apasa ko ining akong kamingaw
palihog kong dili ka buot maanod ako
sa kusog nga bul-og niini bugnaw nga adlaw
nga andam ug tagana sa hay-ad nga mga bukton
ang paglumos kanako niining kamatyunong kabuntagon

sa kamingawan

ang akong buntag dili maayo
duka pako ug bugnaw na ang akong kape
gimingaw nimo apan wala ko'y mahimo

gusto kong mupa-uli apan dili posible
gusto nakong muapas ka apan siguradong
dili ka kay si dodong anaa diha sa ato

apan sige lang bisag lisod
antuson nako kutob sa akong mahimo
bisan ang adlaw dili musubang

bisag tabunan ang langit sa bagang panganod
dili ko magpaanod sa uwan
nga muhudlat sa akong pag kapukan

niining walog sa akong kamingaw
nga gitamnan mo sa kauhaw
sa imong mga lunhaw nga mga haplos

oh, hain na kadto
asa na ng imong pahiyom
gimingaw ako, nimo ug ni dodong

ang inyong mga talidhay usa ka sunata
dinhi ning akong kasingkasing
ug nagpabiling buhi bisan niining
adlaw kong himatyon

ang kape ning sayong kabuntagon

gisirad-an ko ang
akong mga ngabil
samang sirado sa

pagtubag sa imong painit
nga gidalit mo kanako
ning sayong kabuntagon

mayo nalang tingaleng
mahigugma sa kape
bisan itom, paet

apan init ang dala niini
nga tuhop, datom sa
tina-i k0ng gutom

sa imong pagbati.

ang lusook sa imong mga pahimangno

lusok sa mga luha
niining sayong kabuntagon
usa ka tanghaga

nga paulion didto
sa karaang balay sa atong
panagtipon

gihay nga buot mong itunhay
ug takipon pinaagi
sa gamay mong pailob

sa paglantaw mo, lili
kanako sa halayo ug may kagawasan
sa imong pagpahimangnong

ikaw lang ang akong higugmaon.

Kanus-a ka pa magtuon

gisi nga sapot,
tinakip nga mga gihay
sa gugma sa usag-usa,

kanus-a pa kaha kini
matun-hay diha
sa pangandoy mong mesa

nga musumpay sa duha
haron mahimong usa
diha sa salag sa usa ka pamilya

kung kanunay kang ingon niana
gahing basahan, pasabton sa pagtulon-an
sa kinabuhing malinawon.

Ulceron

pakli, bukiki sa libro sa akong pagbati
niining adlaw sa kasingkasing,

sakit, hapdos samang nahilos
sa init nga sabaw sa tinuwa

nga ulo sa preskong isdang barilis
nga gipangandoyng mu-alim sa buslutong

tina-i nga bisag mukaon mahimo
hinuon kining kasakit--paet

ang kaagi sa tawong ulceron
ang utok ug kasingkasing.

ang linukot nga pagbati

ang garay sa paghinuktok
sama nianang puok mong pagpusod
sa imong buhok,

sakit, hapdos,
maayong badbaron, ipadunghay
ang utok

haron mawad-an
sa nitampok nga dagom sa imong
tudlo--sa kalit, daklit ug sakit apan
nahanaw sa dihang gipislit mo
ug gipadugo sulod sa mubong panahon.

alang kini kanimo inday Nippy ang katapusan kong balak

niining sayong kabuntagon, sa alas
12:10 sa tungang gabii, nibalik
sa payag kong penobre ug nga
ingnon ko ikaw nga ang imong

matag duaw niining lubnganan
sa akong kamingaw, pagsubang sa
kahayag nga gibatunan sa imong
bitbit nga iwag-- matahom
mong pahiyom

nahanaw ang akong kabalaka,
gamhanan gayod si bathala,
ikaw ang gihimo niyang taytayan
diha sa akong pag-inusara

ngadto sa pag-angkon sa matuod
nga higala, nga bisan ang libuan
ka kalibutan nga naka-uwang kanato
nahimo gihapon kining katumanan

sa matuod, ug tim-os mong pagsalig
niining gamayng lawak sa panglantaw
gikanan niining atong penobreng
gugma sa usag-usa, ug pasagding ikaw

ang himuan ko niining katapusan kong
balak, ug sa gihapon akong ipanghinaot
nga dili ka kapuyon sa paglili-balik
niining luna kong usahay mangit-ngit.

gabii na intawn

gabii na
maikog kita nianang
atong mga silingan
nga nagatulog na
basin unya kana sila
ug makamata unya
batuon ta dinhi
ning atong nahimutangan.

maong kung mahimo
hinay-hinayi kanang
tingog nimo.

ayaw palabii

naingon sa nahadlok ko anang
imong gihimo, duna lang koy
gamayng tambag, ayaw lang usab
seryosuha, paghinay-hinay na intawn.

high blood ka ra ba dugay na,
nahinumdom pa tingale ka niadtong
higayong gitabang tika kay dili naka
hapit kaginhawa, maayo nalang kay nadali

apan unsaon man nimo karon kung
nibalik nasad ka anang bisyo nimo
nga mukaon anang ginadili kanimo,
humba nga maskara, ug sinugba nga paa

hastang pagkabidlia,
ikaw naa ra nana nimo kung
gusto nimo nga dili naka kita nako
kay mulanding ka na sa minteryo
ikaw lang ang mahibalo

angay sad diay tang maghuna-huna

usahay angay natong huna-hunaon
ang atong iistorya, usa pa nato kini buhian

kay patay ka, mahimong dili lang usa ang
gusto nimong ig-on basin mapagan

ang uban diha, nga nagpakahilom
unya mubangon unya, sa subrang ka

alingog-ngog, ug dili na makapugong
mudiretso nimo pagtampalong

nga wala ka gani masayod kung asa
nag-agi usa pa naabot sa imong nawong.

trip lang

Kung lami ug pamilok ang tawo
unya nindot ug mata, taas ug ilong,
pula ug lami ang ngabil, sama nianang

mansanas nga anaa nianang ibabaw sa
imong lamesa, pastilan kalami kitkiton,
unya ibalibag ang subok nga wala nay lahurya

ikaw kaha kung duna kay gwapang asawa
asa kaha ka punta? tingale dili kana
mulingi sa lain unya magkandarapa

kung musinggit na siya, musitsit nimo ug
papulion ka sa dihang naa ka sa hantakan
o sa tigbakayan o kaha nakig-inom sa imong

mga barkada, ug gawas pa niana tingale mahimong
magpakamatay, maghikog ka ug maadto siya sa lain,
kay naa na tanan niya, dili lang kaanyag sa lawas

nga daw coca-cola nga mupahuwas sa kaigang
kung musugat sa iyang panan-aw kanimo sa init
nga kaudtuhon, ug daw sa landong sa punuan
sa dakong balite ang pahiyom,

ug tingale kung ikaw ang ania sa akong sitwasyon
himuon mo usab ang akong gihimo, gikural,
gipriso, gihikot ang imong baka kay tingale ug

makabuhi malapa sa ubang wala pa'y tugpa.

para sa usa ka badlungong silingan

taympa una dili ba nagsabot nata ana,
nga dili ta mulapas sa atong mga muhon?

naa kay imo dinha ug naa pod koy akoa
pastilan kang tawhana ka, sige paabuta ko

unya katilaw ka nako, dila lang unya
ang walay labod nimo, kasayod ka baya

nga kaliwat mi ug mukilaw ug tawo,
basin ikaw ang una nakong isula
sa akong ipanihapon,

igo na intawng pagpabadlong...

Alang sa akong higala sa Kalubihan

usahay adunay masaag nga mga aninipot
dinhi niining akong gamayng payag

ug sa akong dakong kahimuot, usahay ako
silang pabatugon sa akong mga kamot

pastilan pagka-anyag gayod sa ilang mga lubot
nga mikidlap-kidlap, daw gitik sa akong ilok

ug ang ilang mga lakang bisan sa kagamay
nidatom kinig nidulot sa akong mga bukog

salamat diay sa inyong paglabay, ako kining gikalipay,
hinaot sa inyong pagpalayo, makita ninyo ang inyong
mga tuyo.

ang umaabot kong anak nga babaye

manganak nako sa Hunyo
ingon ang akong doktor nga
si Dr. Almagro
maayo ra kuno ang kahimtang
sa akong anak dinhi sa akong tiyan

ug ang resulta sa ultra sound
babaye kuno, hastang lipaya ni
inting, pares na gyud ug dili
na siya buot magpuno pa unya

kay para niya igo nanang duha
insakto nanang dili magmingaw
ug dili usab lisod sa pagpa-eskwela
kay duha lang ug dili daghan

apan kanako dili ko ganahan anang
huna-hunaon, kay nasayod kong
magkina-unsa okay lang gyud gihapon
excited napod ko, gusto nako kita niya

gusto na nakong tawgon sa iyang ngalan
ug kung ngalan ang hisgutan,
ganahan ko anang ngalan nga Beauty,
ug dili kaha Hope o Charity, o Sunny
o kaha Ebony

hay, pagkalami paminawn,
apan pagkalisod puy-an
ang mahimong inahan
labi na layo ang imong mga anak
sa imong kiliran, ambot ila
ba kaha kong masabtan.

nakalamay na

nisakit napod ug taman
ang akong tiyan, medyo
dili na maayo ang kondisyon
kay katulo nako nagbalik-balik
sa kalibangan,

maayo nalang sigurong muinom
ug tambal, haron dili maka lamay,
magka uminto, musamot, ug basig
maulahi na unya malisod na unya pag-ayo

sama aning akong gugma nganha kanimo
nakalamay na, dili na mahimotang,
dili na gani mabangbang,
ang paglamay sa imong gugma
dinhi sa akong sabakan.

ang panugon

unsang pagka-unsaa
nganong nagdali-dali ka man?

ug nganong gibiyaan
mo lang ang imong kape
diha sa lamisa?

ug mitalikod ka
wala gani nanamilit,
ni lingi sa nahabilin
nga gakagidlay pa
wala ang panghilam-os
ug ang pagpanudlay,

ug samtang gadagan ka
paingon sa imong sakyanan
miingon ka,
ang imong anak tua sa hospital
adtuon nako, diha ka na lang
bantaye ang ato.

panugon kadto sa akong bana
nga buot angkunon
hasta ang akong kabalaka.

nahigugma ako sa gugma sa tawo

mag-istorya kaha ko anang mahitungod
sa usa ka kabit nga wala mahimo

kanang giingon nga hangin ug nga wala maabot
kay wala mapadpad sa imong paghuyop

ug kanang gisugilon mong nakombinsi sa halas
bisan wala malikosi sa pulong nga gibuhian mo

hangtod kanus-a mo kana ipasundayag kanila?
hangtod ba matinuod kana unya?

unya muingon kana dayn nga walay kamatuoran kana
ug mamalibad pagdawat sa huhungihong,

ako usa lang ang akong ika-ingon ug ingnon
nahiugma ako sa gugma sa tawo

ug dili sa hangin, ni sa halas, o sa pasundayag,
o sa huhungihong.

ang nakalimtan

permi natong problemahon
kining mga butang nga dili usahay
problema, ato lang gibutang

unya atong nakalimtan,
ang dakong problema nga mao kita,
ug nga dugay na natong hinsayran.

ug ako nasad ang imuha

nitug-an ka kanako
niadtong niaging Sabado
nga dili ko nimo pasagdahan,
imo kong unungan
sa akong mga problema,

kay kumo karon minyo nata,
imo na ang akoa
ug ako nasad ang imuha
nalipay ka, naguol ko.

usahay

usahay dili na gyud mutuo nako si inting
okay lang, dili ko na igsapayan.

usahay maglibog siya nako unya mangutana
okay lang, ako nang tubagon.

usahaay saputon na siya kanako, maninghag
okay lang, andam ko musabot.

usahay maglagot na siya kanako, sa akong mga binuang
okay lang, mangayo gihapon ko'g pasaylo.

usahay mahimuot siya kanako, kay akong gisilbihan
dili okay, kapoy nako, naglabad na akong ulo
ako lang gyud diay gihapon?
taym pa una unsa na malang imo?

Pinalangga

Pinalangga, langga,
pangga, angging,
aging

unsa pa ba ang itawag kanimo?

naa na dinha ang tanan...

kana labaw pa sa sweetheart
labaw pa nianang honey
ug mas labing labaw anang baby

tam-is lang tingali na sila paminawon
apan ingnon ko ikaw, mas manglimbawot
ang akong balahibo, ug mas gibayaw ako
sa akong nahimutangan sa matag sangpit
mo kanako sa pinakalambing mong tawag

ANGGING!!!

anaa dinha ang akong pinuy-anan

ayaw kaayo kahibulong
akong pinalanggang bana
usahay ingon gayod niana
ang may tumang kalipay,
ug pagmaya sulod sa dughan

apan ingnon tika
dinha niining lawak sa imong
dughan, ikaw nasayod
nga anaa dinha ang akong
gamayng piniuy-anan

unya ako lang ihangyo
ayaw intawn ako abuga
giangkon ko na sa makadaghan
nga ikaw ug ikaw lang
ang akong himayaon
ang akong higugmaon
hangtod sa akong kamatayon.

ang naa sa imong supot

gusto napod kong mukaon
kanang balbangaan,
kanang lami,
ug tinagudtod
kanang nangalimyon
ang kahumot

apan ayaw'g langas
kay nangala ra ako
wala ko'y interes nga lain
gawas sa mangga
nga naa sa imong supot.

Happy Valentines Day!

naunsang pagkaunsaa
nga sipa nasad kaayo
ang pabuto nga imong
gisilaban dinha sa sulod
sa imong dughan

nga bisan sa kamingaw
ning sayong kabuntagon
nadungog ko ug akong
gipaminaw ang matag
ditalye niini, bisan gani
ang sunata sa mga pinitik
sa gagmayng Piccolo,

klaro ug tataw kaayo kini
nga usa ka pagbati, pahinungod
sa umaabot nga Valentines Day!

Naghikog patay

Gumikan sa pangabubho
naghikog patay
ang usa ka 24 anyos nga ulitawo
didto sa iyang gipuy-an
sulod sa Malvar Compound,
Upper Tabok,
dakbayan sa Mandaue
kagahapon sa buntag.

Ang biktima mao
si Noli Bobo, 24,
ulitawo nga lumad
nga taga Aurora, Zamboanga del Sur
ug temporaryong nag-abang
og lawak sulod sa
Malvar Compound sa Upper Tabok,
dakbayan sa Mandaue.

Pastilang balitaa,
ingon na gyud diay niini
ka desperado ang mga tawo
nianang gitawag ug gugma,

nasayod ba kaha sila nga
walay si bisan kinsang maka-angkon
niana kung imong kalimtan
ang paghigugma mismo
sa imong kaugalingon.

Ang pagpaningil sa kinaiyahan

Nilabay ako ganiha
sa mga natumpag
nga mga paril
ug mga dalan
nga naguba
sa Santander,
ug Samboan

nga niadtong
niaging Sabado
gibalikan sa
nagbangutang,
naligotgot,
nga iyang kanhi
hinigugmang
kina-iyahan,

nga sa kalagot
iyang gipanglubong
sa mga lapok
ang duol sa
kalim-an ug lima
ka balayang
kaniya kaniadto
mitulisok.

nga bisan sa pagpa-agay
sa iyang mga luha,
wala kini siya
paminawa

ug gani sa iyang
pagsinggit
kanila nga
"IGO NA"
wala bisan usa
nga nakadungog

ug nangabungol sila
ug karon bisan sa daklit
naningil siya
sa kanhi ilang
pagdaug-daog.

ang akong anghel magbalantay

Ang akong anghel nga magbalantay
kanunay anaa nagpaluyo sa akong
mga tinguha ug panglantaw

nga bisan timawa anaa iya kanang
gipakabililhon, kay sama sa bulawan
nga tinakpan sa kangitngit
nakita niya ang pagsubang sa kahayag
sa gamay kong mga langit.

iwagi ako sa gamay mong pagsabot

Pipila na usab ka higayong
milikramo ka'g miingon kanako
nga dili mo ako masabtan
ug naglisod ikaw pagsabaot
kanako nga imong gimahal
gipangga diha sa imong dughan.

apan ingnon ko ikaw nga
usa lang kana ka pinitik sa akong
matuod nga pagka-ako
ug dili ba gisugilon ko na kanimo
nga ako usa ka buwan
dili kanunayng iya sa kangitngit

usahay aduna pod akoy kahayag
ug mugakos sa kahayag,
niana ikaw magpasalamat
kay tingale tataw ang tanan
ug hapsay ang dagan sa atong
pagpakabuang,

apan kung anaa ako sa kangitngit
akong pangayuon kanimo
ang imong gamayng iwag
sa imong gamayng pagsabot
bisan gani kini makapungot.

Pakigharong sa Busay sa Tampilisan

nipanaw ako'g miadto sa layong dapit
haron pangitaon ko ikaw, naabot ako'g pangita
didto sa tumoy sa bangaw ug ni anino mo
wala ko nahibalag, gituyok ko na ang
tibuok kalasangan ug nalili ko na ang
tanang kabugangan, apan ni sinyales
sa imong gininhawa ug tunob
sa imong mga lakang wala ko kini igkita,

maong nilingkod nalang ako
niadtong atubangan sa usa ka busay
ug nagpalabay sa pipila
ka mga gutlo, giatubang
ang haguros nga bugnawng hangin
duyog sa kakusog sa agay sa bul-og
sa akong mga luha--nakiglumba
sa busay nga nakigharong kanako

miduko ako, gipiyong sa makadiyot
ang mga mata, akong gihinay
pagpukaw ang akong galamhan
nga niining sayong kabuntagon
nagdamgong ania ka sa akong atubangan,
buhi ug anaa nianang maanindot
nga talan-awon,
ang Busay sa Tampilisan.

ang himaya sa Liloy

ako ug ang akong gugma usa,
dili kini pweding buwagon
ug dili pweding mag-inusara
susama nianang managlagyong
adlaw ug bulan nga nag-inunungay
diha sa suba sa kalangitan
nga sa kagitngit man ug kahayag
kanila dili kana maka-ulang

ilang giangkon ang tanan
ang kahayag ug ang kangitngit
ang bituon nga bunga sa himayang
ilang gisaw-an ug nga bunga
sa pagtagik nila sa ilang gugma
didto sa kinapusorang bungtod
sa himaya sa Liloy diin ilang
gitukod ang panimalayng
ila ug tinuod nga sila lang
ang nasayod ug nagkasinabot.