Ang tulo ka estupidong pulong

1. Gihigugma
2. ko
3. ikaw

Ang unse ka pulong didto sa kamingawan

1. Makabungol
2. makabuang,
3. ingon
4. diay
5. niana
6. ang
7. imong
8. bation
9. kung
10. ikaw
11. biniyaan.

Mibukal nga dugo

Mibukal na ang akong dugo
miawas samang awas
sa lana nga naa sulod sa garapang
tinakpan nga gilabyan
sa wak-wak nga galaway
sa naingo'g bola nakong tiyan.

Nagbantay nga wak-wak
sama'g iyang teretoryo
nga iyang gibantaya'g serado
nga walay makalusot nga hangin
bisan utot gibuot
basin mangalimyon sa lain.

Kaalimuot,
paypayi ko kay
kakuyapon nako sa imong
pagtuok kanako
lugwayi'g gamay,
bisan gamay lang
kanang igong makaginhawa
ug dyutay.

Ang pagbangon sa nahidagmang sulom

Mibalik ako
ug wala mag-inusara
karon duha na kami
ug ang usa dia sa
akong bulsa.

Ayaw pagkatawa,
tik-uma kanang imong baba
Dili ako ang tanghaga,
ug labawng dili ako ang balak
nga imo karong gibasa.

Ako mao ako--
ako nga gapanday
niining garay sa mga pulong
nga gipunayan mo'g balik
sama'g adik

dili makakaon,
dili makatulog
kung dili masalom ang
giladmon sa matag letra,
pulong,

pasumbingay,
litaniya nga gibatbat,
hugna nga nahugno
sa matag karon ug unya.

Apan mubangon,
barog,
padayon sa laktanang dalan
nga gisubay sa maihap lang
nga mga sulom.

Ang atong gugma

Ayaw dudahi ang gugma
Ingnon ko ikaw akoa na
sa akong damgo'g panglantaw.

Ang imuha mao ang pag-alima
nianang bunga
sa akong sabakan.

Palambua kana,
siya ang imong hinagiban,
siya ang rason nga ikaw
paulion sa matag higayon.

Ayaw kahadlok,
dili ako mahanaw
kanimo ako mupauli
kanimo ako magtampisaw
sa ulan unya nga imo
kanakong ibisibis sa matag
takdo sa imong adlaw
ug akong buwan.

Paet Tam-is

Maanyag nga lalaki,
grasyusong lalaki,
pwede kang mupahiyom
sa ato unyang pagkadugta.
Aroganting lalaki,
bilyakong lalaki,
Pangga, pangga, pangga!
Mahuyang ang imong pagmatututo...
Ug kay kita mao man ang rason
Kay ang "Nineties" mao man ang mga mahuyang
Atong dungang isul-ob ang lunhawng Carnation.

(Hubad sa balak ni Noel Coward, 1929
Bitter Sweet)

Ang natun-as nga katawa

Natawo ang kamagul-anon
karon pwede ka nang magsadya,

ang kamagul-anon--
damgong parat
daw dagat sa kaasgad

sa kinabuhi nakong
natun-as ug nawala na.

Ang kamatayon sa gugma

Gihinay-hinay ko na paglangkat
ang imong hulagway nga nipilit
daw magnet sa akong alimpatakan

Ayaw lang katingala
ang atong gugmang gihawiran--
gilubong ko na.

Ang panamilit sa usa ka bula

Nahadlok sapanagway
sa kanhing naila-ila,

tinuod ang bula
gihawiran apan

sa usa ka pamilok
nawagtang.

Ang matuod nga katahom

Ayaw na paabuta
ang akong pagpamukadkad
nga kung mubilangkad
ang mga putot
mas ngil-ad.

Ang pahiyom nga imong gitisok

Siya ang bunga
nga gitisok

siya ang himaya
samang himaya
sa hagakhak
niya'g pahiyom

Siya ang kanhi
gibudlayan
niadtong usa ka
kaadlawon--
balaang ritwal

Siya ang karon gihadla
giyug-yog sa matag tyabaw--
awit sa dunggan

dakong kahimuot
mapa-ubsanong pagsabot

ato kining gitisok
sa salabutan
nga mapahiyumon.

Ang sabakan nga gitisukan sa imong pangutana

Aduna'y dakong pangutana
nga akong gidala-dala
dili kini sama sa kang Sylvia
nga siyam ka litok--
kini usa lang ka pangutana
alang kanimo kay gikan nimo

pangutana nga usa ka lugas,
gitisok mo sa akong balatian
ug karon namunga
ug nipahiluna sa akong sabakan
nga nagdala sa dakong pangutana,
palihug lang ko tubaga.

Dili ko kini buot
patubuon ug palambuon
sa natad sa akong pagkabakakon
nga samang nagmadudahong
sa pangutana nga anina
gitisok mo na.

angayan bang taguan?
angayan bang ipabilin
ug dili tubagon?

kini tingali dili mahimong
atong huptan, kundi puohon
haron magmalinawon
ang sabakan
mahimong paglaom
natong managtiayon.

Ang luha sa gugma ko kanimo

Ang langit nga atop sa salabutan
nahimong nagmagahi sa iyang kabantugan
tumong ini'g tinguha nga maluwas
ta nga mabasa sa tinulo niining luha--
luha sa atong pagpakasala.

Ayaw kana hawiri
ihangyo ko kanimo
ang adlaw nga giingon ko
mao ang maagnihong bulawan
nga ana sa mga kamot mo
nga dagdapit kanako
sa pagduol sa sidlak niining
nangalimyon sa himaya

Ang himaya sa paglaom
taliwa sa kalisdanan--
tam-is nga makaplagan
diha sa mga kamot
nga naghawid nianang
lingin nga bulawan--
ang adlaw nga ato nang
gihimong pinuy-anan.

Bulahan kita nga nasinati ang usag usa
nahikap ang matuod nga luha
sa atong kalisdanan
samang kalisdanan nga giantos ta
tungod sa kagawasan sa atong mga gugma
gugmang nahimong pinuy-anan
sa atong duha ka kasing-kasing
nga nagmaya lang sa oras nga kita
mahimong managtiayon
sa damgo nga akong gilaknit
sa dakong kaudtuhon
nanghinaot imong dawaton
sa tumang kamaya.

Ang Adlaw

ang adlaw adunay insaktong higayon
sa iyang pagsubang ug pagtunod

anaa siya sa tungod sa atong alimpulo
sa panahon sa udtong tutok

Nganong ang iyang kainit
daw kamras sa imong pagsulay
niining gipaningot nga agtang
nga may gidangason na tungod sa
pangidarong dili malilong?

Samang dangas nga panglantaw
sa usa ka takos nga balak
sa usa ka uyamot nga magbabalak
nga nanghawid sa iyang kaugalingon
ug sa gugma niyang hinagiban
sa iyang paglakaw paingon sa unahan
subay nianang baybayong balason
gimingaw, apan nahimong
makusganon sa iyang pagkahiagom
sa gugmang iyang giangkon.

Ang pako sa langit

Milupad ang akong kagabhion
mutunod ang akong mga kagahapon
ang ikaw ug ako nga akong nang gipanghunaw
sa lunhaw nakong pagpangagho.

Wala ko masayod, samang wala ko makita
ang pagkayab sa langit
sa imong kiliran niadtong kitang duha
nag-uban sa pagpanihapon--
sud-an kadtong hunas nga kuha nato sa atong pagpanginhas.

Kanus-a pa kaha matakpan ang akong
pagduka... O mahikatulog niining akong mga luha.

Dawat kuna, kini ang tuga kanako.
Kini ang akong mangkok
nga kinahanglan nakong higupon
sa walay pupanuko.

Wala ako maikog
ug labawng wala ako maulaw kanimo.

nabasa muna sa mantalan
wa ba?

dili na kinahanglan pang balikon pag-usab
sakit lang na sa dughan.

kung gitik-om mong imong baba,
apela nalang usab pagsirado ang imong mga mata
sama'g usa ka buta
wala kay nakita.

Ug ako usab manganha sa nagsingabot
nga mga tanghaga.

Ang ang-ang nga imong gipangita

Ang ang-ang nga imong gipangita
ania na
unsa pabay imong gipangita
ug nganong kinihanglan mo pa ang ang-ang

wala mo na kana kinahanglana
anaa kana sa tumoy
sa imong mga damgo
ug kay damgo
isugilon ko pod kanimo nga wala ako magdamgo
gasiga akong mata
sama kasiga sa buwan nga nipakita sa kagabhion
dili ko limdan ang akong kaugalingon
kay wala ko na mabatasan...
basig ikaw, ikaw ang nagtakuban...

kahimuot sa inahan

kaganihang alas tres sa kabuntagon
akong namat-an ang akong paglangoy
sa ihi sa kong pinalanggang anak
wala ako napungot
hinunua ako nahimuot
samang ang akong mga kamot
ni hinay-hinay paghukas sa iyang mga sapot
nga natumok sa iyang kaugalingong ihi.

wala kini mag-gunuk-gunok
ni agulo wala gani kini mitahan
ug kumo nahinanok wala nalang kini nako gipukaw
akong gibalak-bakan
sama sa balak-bak kong mga halok
nga andam ug tagana bisan sa unsang orasa
kini gikinahanglan.

Dayon lakaw padayug-dug sa ubos
atang sa sakyanan
nga maoy muhatod kanako didto,
dinhi sa dakbayan.

Ang akong Tubag sa imong balak

Dinhi niining hagdan
mihinay-hinay pagtikang
mikayab ang mga pako
malipayong dughan

haron makab-ot
ang imo nang naabtan

ang adlaw
ug buwan
sila maoy
atong padulngan

bisan sa pagtakuban
kita gihubu-an
sa mga balak
nga gibuhian.