Bakting Pak-an

Didto niadtong luyo sa panganod
adunay mga maanyag nga mga bakting
galupad-lupad
daw sa himaya sa ilang mga talidhay
ug buhak-hak

Ang langit nga tin-aw ug asul
maoy gahatag kanilag
lunsay nga panglantaw
dinhi sa ubos ning atong nahimutangan

Mga bakting lingin ug himos
daw inatiman sa langit
nga iyang pinuy-anan
baktin nga puti ug may pakong
adunahan.

Laray sa Pilok

Kinto sa mga balirenang gagmay
nagsul-ob ug itom, mibaliad kanunay
naglaray tampi sa bintana
sa usa ka maanyag nga babaye

Pinintalan,
Kinoloran,
Iyang kalipay ang kalipay sa uban

Dikorasyon,
Proteksyon,
Sa tanang higayon
Nahimong kurtina sa kalag
sa bintanang inyong giankon.

Yawyaw ni nanay

Nanampiling daw napus-an
daw napildi sa bulangan
biniyaan sa gugma
o nahatakan sa buwan

Nganong nagpatunto
nganong nitukob, ngano
mao nanay resulta
nasubraan na's pensada

Ay gani tag ilara
dili ka makasapi niana
haypa unya
basig sa ulahi magbasol ka

Tan-awa nang agtang nimo
kunot na kaayo
napay mata nimong lagom
mura kag gisumbag
sa imong amigo

Sige pag pulaw
sige pag-agwanta
antusa kay basig
mamilyunaryo ka

Hain namanang imong giingon
dala-dala nimong lapis
daw panday mason
murag amaw, mura kag maestruhunon.

Pag-urong,
ambisyusong magbabalak
walay ugma ka nianang anihon
ang imong gihinayang pangwak-wak
basin TB ra imong maangkon.

Galamhang tinakban sa gabon

Tinabunang mga mata
sa duha kakamot, sa panghinaot nga dili ka makita
imong hulagway, urom sa akong galamha'g pagpaninguha.
Buot kong papason ang atong kagahapon
apan bisan unsaon, sa galamhan buhi gihapon
bisan pa takban sa gabon
hinunua musidlak kuyog ang imong sugilanon.

Managlaing abilidad sa duha ka parisang pariha

Duha ka manag higalang adunay pamanit
nga abuhon
adunay managlaing abilidad sa duha ka parisang pariha,
tsinelas nga puros tuo
sul-ob sa duha ka tawo nga dili nimo pweding buwagon
bisan pugngan pa nimo.

Ang usa nga anaa sa walang bahin
may gidaik-ong panglawas nga daw barbelaw.
Kusgan, lig-on, hangad niyang ulo
nipakitag dakong pasigarbo
lantaw ang ugmang positibo.

Kasamtangang ang usa nga naa sa tuong bahin
adunay taas nga nawong
duyog sa balingkinita niining pigura.
Miduko, mipaubos, lantaw ang kagahapon
samang may kahadlok sa huna-huna
ug sa karon.

Silang duha sa ilang panaghigala
kanunayng nang-uban
buot hatagan ug bili ang usag-usa
daw dili mabuhi kong ang usa wala kanila.

Piyong man ang ilang mga mata
apan ang higalang naa sa wala
may nituybong usa ka dwanggan sa taliwa niining dughan
nga maminaw sa problema sa usa niyang kahigala
nga bungol ug dili makdungog sa palibot niya.

Kasamtangan ang usa niini ka kauban
aduna kiniy matang nituybo
sa tuong bahin sa iyang dughan,
andam mulantaw sa mga nagsinangabot nga kaaway
ug mugiya sa dalang ilang padulngan.

Dili mahimong buwagon
dili mahimong kaslon
dili buot ang panahon sila padaghanon
apan sa dili mapugngan higayon
nikanap na sa kalibutan
ang susama nilang kahimtang
bisan pa sa kadanghang problema
na ila nang gisagubang.

Kinsa silang adunay hulagway nga pangutana?

Kinsa sila? Kinsa bitbit ang dagway sa pangutana,
mga dagwayng dili makita ang ilang tagsa-tagsa ka hitsura
trabahanti, di opisina, nagpundok,
alirong sa atubangan sa lamesang
gipatungan sa ilang mga gamit, papel ug dokumentong
wala koy hinsayran ug unsa.

Nagkadaiyang mga sapot, di kurbata
tinak-in nga mga long sleeves, bakos nga gagilaw-gilaw
nag-atubang ngari nako nga way mga nawng
kundi ang bitbit niining pangutana
nga wa ko kahibaw. Tingali makatubag ka, nila
nga hangtod karon usa sa nagutana.

Nahimutangan lunangan

Kalagot, kapungot,
laming isinggit ning kangitngit
sa lunangang dugay nang gipuy-an
sa dughang samaran ug luhaan.

Tabang mga langit
nganong wala nimo luwasa
nganong wala pakanauga
ang imong mga angheles
haron mahaw-as ning
nahimutanganag lunangan.

Ang kabaho, kayutik,
daw katapusang kinabuhi
ablihing mga langit,
tunuli sa puti mong sidsid
itunol ang gihay sa imong milagro
haron mahaw-as ning
nahimutanang dangan sa panan-aw sa uban.

Ukob sa duha ka asul nga binuhat

Ukob sa duha ka asul nga binuhat
layog nga papaet
dili ikasugilon ang kalami
sa gugmang gibati.
Katumanang nagdumili pagsangpit
sa kinsang gustong mulili
gapiyong nga mga mata
nagpa-uraray sa palad
nga unlan sa pag-inusara.

Ang tugon ni lola Ebyang

Nahinumdom pako sa panultion ug pahinumdom
kanano sa pinalangga kong Lola Ebyang:
"Ang tawong naa sa bingit sa kasakit
mukapyot nalang sa tunukong sampinit
dili balihon ang gadlas sa kapalaran
makab-ot lang ang tumong
nga makalingkawas ning hagip-ot nga kahimtang."

Layog sa Duha ka cellphone

Layog sa duha ka nilalang sa kalibutan
ulag nga sa higayon gipahimuslan
kuyog sa kamot nga nitadlas
sa mga lawas nga wa diha sa iyang nahimutangan

Layog sa hangin dungan sa bitbit
niining cellphone, tambal sa lakbit nga kainit

Gihagkan ang iyang pinoy-anan
ubos sa kinatung-ang bahin sa alindog
sa duha ka binuhat nga naghigda
sa tagsa-tagsa nilang lawak.

Ang babayeng nagmaskara

Dihay adunahang babaye
mga mata niini daw abli nga bintana
gipasalida ang istorya sa iyang kamaya

mga ngabil niining daw mansanas sa kapula
naghupot ug tam-is nga pahiyom
dinuyugan sa maanindot ug sidlak niining mga ngipon
kaputi midan-ag sa mangit-ngit nga kagahapon

ang mga gihay sa iyang buhok nga kulot
daw bulawang sinapid sa hanging
mitadlas daw halas nga buot siyang tukbon.

apan ang matuod niyang hitsura
gitaguan sa berde niining maskarang
naggilak-gilak,
giadurnuhan sa pilak sa matag kilid niya
nga gitaptan sa balahibo sa berdeng periko
panghinaot nga ang kasakit dili mabutyag
sa mga haring buot muangkon sa iyang kaanyag.

Ang lima ka rayna sabukid sa Cancainap

Mga prinsisang nagdupa-dupa
latay sa mga papil nga gihapin
sa baliling gitumban nila
dili matukib ang kalipay
dili matugkad ang kagaya
nagdilaab nga mga abagang
daw rayna sa palasyong ilang gidumala
bisan pa sa tiil nga wala nila sinilasi.

Liad nga mga buko-buko
mapasigarbuhong taas ang ilang mga ulo
hangad sa langit nga malipayon ang timpo
sul-ob ang mga hulmang sapot
kolor daw sa mga bulak nga idlas
sa halapad nga bukid sa Cancainap

Lima ka mga maanyag nga mga babaye
nagkadaiyang gihuptan nga abilidad
sa iyang palibot mipaganyar
bisan sa nagmadaugong bugno
sa giapilang bangga sa piniliay.

Bisan pa sa naglagiting nga adlaw
wala gibati ang kauhaw
tungod sa kabusog sa gibating kada-ugan
nga giilugan sa ubang mga binuhat.

latid sa palad sa linghod nga binuhat

Kulot nga buhok nga wala masudlay
sa tingog sa inahang nanganay-kanay,
kunot niining mga kilay
mipadayag sa iyang kasakit nga gihambin
bisan pa sa iyang pagkagamay.

Luhang midagayday sa tuong aping
daw badlis sa palad nga gilatid nga maangkon
bisan sa kalinghod sa huna-huna
ang mata niini nidilaab
galantaw'g nagandoy sa maayo niining ugma.

Ngabil nga abli, buot musugilon sa iyang gibati
apan walay igong katakos gadumili, walay laing nahimo
gawas ang paghilom dawat sa kapalarang
dili buot nga maangkon.

Sugilanon sa usa ka dinaog-daog

Usa ka agilang mga mata, mitutok
sa usa ka ginghariang midumina nila
tunol ang duha ka kamot nga kinadinahan
sa kakabos ug sa kaalot
buot mulingkawas sa pagkagapos
sa kabubut-o'g prinsipyong dugay rang piniriso
sa balaod sa mga gamhanan.

Migilaw ang gisul-ob nga puting bistida niini,
dungan sa pagdilaab sa matang hait daw ispadang
andam mutaroy sa bisan kinsang may tinguhang
mudasmag,
mupasakit ug muyatak sa usa kanila.

Misiklab nga gahom sa usa ka binuhat
gahom sa dugay rang gutom
sa kagawasan,
mipagawas sa iyang tinaguan
buot buligan ang nialsa niyang mga kauban

Sa lawod sa gubat sa mga prinsipyo'g
katakos sa pakigbatok
mitumaw ang kaisog luyo sa kahuyang
nga hinagiban sa haring langit nga buot
mudaog-daog ug mupapha kanilang mga uyamot.

Tipaka sa abilidad ni Louis Armstrong

Gium-um ang trumpitang gihawiran
nikitiwng mga tudlo daw giduwaan
dayon bulhot sa hangin,
buga ug tayhop
sa instrumentong ang tingog dulot sa bukog
sa pagsugilong daw nanuot-suot

misigang mga mata sa pagpangusog,
punting sa langit
dayon lisngag sa ilong nga nakabsan sa hangin
sa pag-utong
hangad daw nangita sa apasumpayng nota
sa pagmugna sa Jazz ug sonata.

Awit nga nanganay-kanay,
tulo sa singot nga nigadagayday sa agtang
sa usa ka banggiitang musikero ug mang-aawit
gibunyagang pitaka
sa kadako sabuka sa iyang mga baba

Giyukbuan,
giila,
gipatik sa dughan
sa mga tawng nagsunod sa sugilanon
sa gibantog nga Louis Armstrong.

Pangayog pasaylo sa inahan ngadto sa anak nga biniyaan

Pasayluang nibiya
kanimo anak kong pinalangga
wala kalang masayod sa kapaet
nga gibati nga kamingaw
tungod sa dili ikaw ang ikadulog ko

Ingnon ta lang hakog ko
kay gipangita ang kalipay
apan nasayod kong masayran mo da unya
sa insaktong panahon ug sa ingon
bation pod nimo ang gibati ko

Maong pasaylua
hagit kini kanako
bisan sa ibabaw sa kamingaw
ang akong handuraw
anaa kaninyo kanunayng gatuaw
gisinggit sa kasing-kasing samaran
ang matuod nga ikaw.

katawa hubad sa letrato sa usa ka pamilya

Sa daplin sa bay-bayon
mikatawa ang kahayag sa nanag-ubang pamilya
malipayon daw way kabalaka.

Didto niadtong dapita nahimugso
ang katawa sa nag-inusarang lalaki
kauban sa unom kababaye
nga kadugo rasad niya

Ang lalaking miwara-wara
sa wala niyang kamot dungan sa pagkinto
dayn isa sa iyang liog, haron makita
sa camera nga mipunting didto nahimutangan nila.

Kamisin niining asul
terno sa kalo niyang karaan
apan sa iyang pamilaya
pagtabang niini kanunayng andam
ug sa gihapon kanunayng tagana.

Siya ang nag-inusarang
amahan ning tagsulat
ning balak nga imong gibasa.

Sa tuong bahin sa atubangan niya
may tigulang nga babayeng
adunay puti nga pinangkong buhok,
nangunot nga hulagway,
timaan sa katiguwangon
nga giduyugan sa puti niining bistida
ug sa sul-ob nga antipara.

Ang tiguwang nga gipa-ila
walay lain kundi ang pinalngga kong lola
nga bisan sa edad niya
iyang gipakita ang posibilidad sa pagkatawa,
kasamtangang naka-uban niini ang pamilya.

Pasaylu-a, kamingaw sa asawa sa iyang bana

Dili tiaw
dili lalim ang mahabilin sa banay
nga wala ang kapikas
nga musugat ug mulipay sa panahon
muhagaw-haw ang kamingaw

Sa matag higda sa kama nga humol-humol
mabati ang walay samang pagtuaw
daw giduyan sa mga balod
taliwala sa lawud nga nag-inusara

Ipiyong man ang mata
hulugway mo ang akong makita
mutakilid man ug muhayang
gakos ang unlan nga tandayanang
nanghinaot nga ikaw kini unta

Didto niadtong upat
ka haligi sa akong lawak
adunay mga luhang nangatagak
duyog sa singit sa sonata ni Vitas
nga giawit daw panamilit
sa kagabhiong dili matukib ang kapait

Sa lawom nga kagabhion
katugnaw daw midulot sa bukog
mga tuslok sa pinong dagom
dili matukib, dili maipangagda
sa kapait nga gibati
susama sa panyawang
giaydan nila.

Ang USSSO kaniadto ug karon

Tigom sa manag higala
sa frienster nalang himu-a
pulos mga busy ug mga presidinte pa
hahay haskang paeta
kung atong balikon ang USSSO--
banay tigumanan,
panimalay,
sa nagdilaab nga gugma
sa kagahapong
nahipatik sa panid sa libro
sa pinalangga namong maestro
nga Sir Delfin Cabañero.

Kung balikan ang mga kalipay ug kahugyaw
sa mga kusgang mga membro:
Cez, Erdamz, Chandra Gupta,
Mayang, Liza, Micheal ug uban pa,
hayan maugmaan ta sa atong kukabildo.

Wala na tay laing mahimo
maayo nalang mukatawa sa hilom
samtang balikan ta ang atong kagahapon.
Nganong karon pa
nahibagat ang kamingaw
nga dugay nang gihambin
sa huna-huna sa kanhi bise ug presidente
nga si Hazel ug Rex Argate?
Dakong pangutana,
apan dili matubag sama
nga ikaw ug ako natingala.

(USSSO President 2002-2004
Rex Argate)

Labyog sa tangse sa hunasan sa Cancainap

Pagtung-tong palang sa mubong kamot
sa orasan sa alas singko sa kaadlawon,
Luyo sa ka tugnaw ug katulugon
mubakod ang akong bayaw nga
si Kapitan-- hari, gibantog sa iyang kamaabilidad
sa pagpanglabyog ug tamala
didto sa among baryo sa Cancainap.

Bit-bit ang tangsi ug pasensya
nga gihigtan sa duha ka paon nga hunas,
nga patay na'g gilibon sa kandilang tinunaw
hulip sa bangag nga pinuy-anan
sa aninikad, nga mao unyay mulingaw pag-agni
sa mga tamalang gutom sa ilang pagsuroy-suroy.
Tangsing gibilibod sa kaltek--kabo ug sudlanan
sa mahimong kuha unya sa pagpanglabyog.

Walay laing opisyo
Walay laing nahimo sa kinabuhi
Gawas sa kakabos, wala kini makatapos
sa pagtungha
Damgong biniyaan, iya kining buot kalimtan,
hulipan sa kabuang, sa panghinaot
ang pangandoy dili mutulisok sa galamhan.

Tuyok, labyog sa tangse
paingon sa pangandoyng tukbon
ang paong hunas, sa mga tamalang
pangandoy nga makakaon
hulip sa nagkutoyng tiyan.

Wala baliha ang katugnaw sa kaadlawn
ug kainit sa naglagiting nga adlaw sa kaudtuhon
dili igsapayang mapagtong
mabudlay sa pagbaklay sa taliwala sa dagat
nga puno sa kagaya
sa bugno sa matuod nga sugilanon

pangandoy

Sa mahanging timpo sa Mayo
Hagit sa mga batan-on ang paglupad.
kuyog sa taas sa ilang pangandoy
Kasamtangang gitugutan sa mga tangsi
sa ilang mga ginikanang
agak sa katumanan niini.
sa pangandoyng abton ang
kalampusang naa sa luyo sa panganod
nga hagit sa ilang dalan
babag sa ilang kalampusan.