Responsoryo: ang akong tubag

ako kini pinintalan ang lawas
daw napuno sa tipdas
dili tingale nimo mailhan
tungod sa ali niining pwerte kadaghan
doble ang nawong,
pak-an
apan may usa ka siguradong
angay mong mahibaw-an,
ang akong dignidad ang akong gihuptan
wala kapa kaila kanako
ayaw himu-ang sayon
ang wala pa nimo natadlas nga sitwasyon
sabta una ko,
una ko nimo maangkon.

Kung mahimo palang unta

Kung pwede palang hagkan, dawaton
ang gitunol mong bulak sa sunflower
tingali masulbad ang imo ug akong labad
apan unsa pa unya'y
mahimong ipasigarbo sa lisong imong itisok kanako
kung ang gitiskan usa ka yuta
nga gitag-iya na sa uban
dili pud tingale hustisya
sa mahimong bunga ang imong mga balak
daw punyal kining imong itagod tagod
kaniya unya damlag
unya may ikatubag kaba niya?
kana una ang huna-hunaa
usa kanang imong nagbaga,
nagdilaab nga gana.

Sa ilawom sa Ulan

Didto niadtong ilawom sa ulan
imong gigakos ang akong kalag
ang akong pagka-ako
nga ikaw lang ang ni sabot

Sa ilalum niadtong itom nga payong
imong gipasilungan ang atong gugmang
kanunayng giampingan daw sa bulawan
bisan sa taliwala sa dalan
nagmapagarbuhon ka mipadayag sa imong gugma

Bisan niadtong ulan nga atong giatubang
ako nagmalipayong migakos kanimo'g hugot
gisaysay ko na sa una pa ang akong gugma
alang lang kanimo
nimo ug nimo lang.

Di lilong kanimo ang kapobre ning imong hinigugma
apan wala kana nimo baliha
samang dyamante imong gigakos
didto niadtong ilawom sa makusog nga ulan
ug bisag karong naa na ang adlaw
sa atong mga langit.

Ang Pilapil sa Cancainap

"Love arrives
and in its train come ecstasies
old memories of pleasure
ancient histories of pain."
(Maya Angelo)



Samang ang ulan
usa ka gayang pangandoy
sa usa ka uyamot nga mag-uuma.

Sinugdan sa mga tagod sa pilapilang
buot musayaw sa kamaya
sa kamatuoran na pwede nang mapugsan
tungod sa iyang humuk nga dughan sa lapok
nga pugsanan sa binhi sa gugma
niining kinabuhi.

Sayaw, bayaw sa mga mag-uuma
sa gitib sa mga lusok sa tipasing
buot magpakabuhi.

Wala balihang kapaet sa kainit
sa adlaw ug sa katugnaw sa ulan
nga unya mahimong
puhunan sa gugma nga nag-awit
niining halapad nga nagpadaylang
pilapilan sa Cancainap.

Sa mga salmo, himno, ug awit
Oda sa magbabalak
nga nagtagad bisan sa kasakit
nga milibot sa pagbating kalami
sa aning gipaabot.

Ang Sakripisyo Kanhi

"I pour my heart and watch it burn,
Myself the sacrifice; but be
Still unmoved: Divinity"
(Amy Lowell)







Dihay mga laraw nga ligdong
gituhuang sa yanong pamuyo
Siya naa sa akong luyo.
Sama mo ug sama ko,
misulay pagtuyo niadtong pinoy-anang
iya sa langit
sa tuyong malangit
ug sa iyang kanuyng grasya
mahimong sakripisyo
sa altar sa pagpakabuhi.

Apan pakyas ang akong laraw
samang ikaw nitalaw
ang biay-biay nahimong
kalbaryong wala magmadaugon
mga agni niining huyang,
kalibutanon.

Bisan sa panghitabo nga dili tinuyuan
nadagma, nahisukamod,
napakyas sa mga laraw
namugnaw ang kasing-kasing
ngadto sa nagpaluyong Ginoo.

Apan kanus-a mahimong santos?
Dili ba mahimong wala ang pag-antos?

Nangamuyo ako,
yano ug yano ning altar mo
nagluhod, naghangad,
gahuwat sa imong tubag.

ang tigmong dili masulbad

Siya ang akong usa ka hinigugma
lig-on, bus-ok, kusgan,
ang lawas daw sama ni superman.
apan wala siyay dagway
wala ko pa gihapon maila-ila
sama sa akong balak
walay nawong, lawas lang
ang tarong.

Pait dang mahigugma sa ingon,
gusto nakong makita
dili lang lawas
apan hasta sang dagway.

Gusto nakong mahikap
dili lang makita,
apan unsaon paghikap
sa lawas nga way nawong?

Tabangi ko'g sulbad
ato ning sulbaron.

Ang akong himno kaniadto, himno sa anak nako karon

Niadtong gamayng bata pa ako
magtinda lang ug balingbing
nga kinutlo gikan sa among nataran.

Ug bisan sa kalinghod sa pangisip
nasayod nga ang kinabuhi:
katawa, hilak,
ug puno sa kasakit.

Wala magtubo sa kaharuhay
walay ginikanang misapnay
gawas sa apuhang naminaw
sa mga danguy-ngoy'g himno
sa linghod nga apo.

Gipangita ang gugma,
pagmatuto,
pagduyan sa mga bukton
sa inahang milangyaw,
nangita'g kaayuhan.

Ang hilak, bakho
sa matag karon ug unya
nawad-an na sa tuno
sama sa karaang plaka
mukagar sa kadugay nang himno.

Apan karon nakasabot nako
ako karon ang inahang
gipangitaan sa gugma,
pagmatuto,
pagduyan sa anak kong biniyaan.

Ug ang hilak sa inahan kaniadto
karon napasa na sa anak
sama nga ang plakang karaan
ngalan lang ang giilisan.

Saad nga himaya

Didto niadtong habog nga lubi
mikat-kat ang akong Inting
buot muinom ug butong
niadtong mainit nga kaudtuhon.

Buot mangandam sa nagsingabot
nga layog sa lalom nga kagabhion.
hadlok mahubsan,
mawad-an sa kusog
sa iyang pagsawom sa iyng kahidlaw
nga wala diha sa naglakawng mga adlaw.

Dili na gustong dili matagbaw
Iyang suhiron ang tibuok kalibutan,
languyon ang taliwala sa kalawran.
Nagdilaab nga kainit
iyang subhan
sa iyang himayang gipangandaman.

Lupad sa langit
nga daw antuwanga
ang kapula,

Si Inting mipahiyom
sa ibabaw sa bungtod
diin nahimutang ang lubing habog.

Ang nasadyang huna-huna
kaniya misaad
sa himayang usbon.
Ugma nasad.

Ang Matuod sa Balak

Nabasa ko ang usa sa balak ni RicBastasa
Wala kiniy Titulo apan siya nag-ingon:
"ang akong mga balak
akong kalag.

ang akong kalag
dili ang akong lawas"

Dinhi niining kamatuoran
napukwat ang akong mga mata
nisiga, nilugmawng mga luha
sa nasayran nga balak
sama nga mitan-aw ka sa samin
nakita mong imong kaugalingon
apan dili kana ikaw
repleka lang kana sa lalum nga kamtuoran

Ang balak labaw pa sa imong nakita
kini maong naa sa sulod sa nanamin
bisan pa gani masabtan mo pa ang pulong niini
dili gihapon kini ang kinalawrang bahin.

Usa kini ka oda sa mga anghel sa kalangitan
ang awit sa tagsulat nga Iyang gitugahan
sila nga walay kasayuran sa lingtunganay ining pinulungan
magtuong ang tagsulat ila nang nailhan

Apan usbon ko ang pulong ni RicBastasa:
Nasayop ka, nasayop ko,
mao man ganing nagbasol nganong
gitugutan kong
bulikaton,
kumot-kumoton sa bisan kinsa
ang balak nga tuga sa kahitas-an
ngari kanako.

Ang Pinuy-anan ni Nelia

Si Nelia daw sa nahisama sa idlas nga sagbot
didto niadtong liki sa semento.
nag-inusara,
nagdamgung may mukutlo
sa iyang kahimsog,
katahom, kaanyag nga sagbot

Sa iyang nahimutangan
iyang natagamtaman ang biay-biay
sa mga hulmigas niyang silingan
nga nag-agni kaniyang
siya mukuyog sa panon
haron makakita
sa lain nasang kalibutan

Dalaga pa si Nelia
buot niyang maglingaw
buot niyang mahigugma
apan daw sa ginapos na siya
sa tawag sa bokasyong,
imbitasyon,
sa linghod pa niyang huna-huna.

Wala paman siya masayod
kung asa siya dad-a
sa sulog,
sa hagit nga nadawat niya
buot niyang puy-an ang dalan
nga liki nag huyang
Nga bisan sa kakaraan
komportable siya'g
iya naning gi-isip nga pinuy-anan.

Imong balak ako nang gipamahaw

Bag-ong kusog na usab
bag-ong himayang giatubang
nahikalimtan nang kagahapong
akong gidramahan.

Ingon sa mga baliling migitib
sa mga ngabil sa balak nimong
nakapaaghat nakog pukwat sa nahikatulog
nga awit sa mata sa akong galamhan.

Karon akong tagbawon
kining akong himaya sa balak
nga mugna sa gibantog
kung amigong oda ug awit sa langit.

Iyawat mahimugso sa akong alimpatakan
unya kung matilawan,
madimdim ang pamahaw
kanang nagbasa mong mga ngabel
sa balak nga ikaw,
sa balak mong tanghagang nagtiyabaw.

Balak nga giduka

Hain nang imong kaisug,
kapungot, ug kalagot.
Ipagawas, ibuhagay.

Tingale tagbaw kanag gakos
sa imong balak nga imong giromansa
Imong gihubuan, sama nga ikaw gahubo
sa akong kiliran,
Imong gilamba, gituok ug labaw pa nianang
duhang nanaglayog,
mita-op kanang imong kabagsik
nga gipasigarbo mong lig-on ug kusgan
bisan pa sa edad nga aduna nay giagian.

Unat, huyad nianang espada mong
duble'g sima
Ugbok nianang bilahan sa imong balak
nga giuwagan.

Hala mao man kaha
ikaw, ako
ako, ikaw na.

Parang Teacher Nelia

(Kining balak akong ipahinungod
sa akong amigang maestra
ginganlag Teacher Nelia. )






Mihayag lang sa kalit ang palibot
daw aninipot,
nga ang kibot mikidlap-kidlap
sama sa lampara sa kangit-ngit
sa punuan sa gakit, migilaw,
misuling-it sa gakurap nang mga langit.

Dili man sama sa kasadya sa niaging mga tuig
apan pasko gihapon bisan luyo sa kapait,
sama sa kidlap sa series sa Christmas tree sa CebuStudy
Bisag daan na mibarog gihapon ug mipakitag abi-abi
sa mulabay sa maong lobby.

Pagdugang sa kasadya sa huna-huna
wala man dihang bunos ug 13th month
kay wa pa naandam ni Teacher Joy
ug ni Sir Tommy.

Sige lang gihapon wad-wad Teacher Nelia
Tanang abilidad gamita
sama nianang ribbon nianang imong gift
maalagarong migakos
tibuok niya, way pamilin-bilin
para sa iyang paggunit
sa umaabot unyang mga hagit.

Maong daan man ang pasko
angay gihapong magsadya
sa grasyang gihatag sa atong Ginoo.

Ang babaye

The woman is perfected.
Her dead Body wears the smile of accomplishment
(Sylvia Plath)







Sa dihang gihimo si Adan
isip mudumala sa mga binuhat sa Ginoo,
niining dakong wanang sa kalibutan
miingon siya sa iyang nahimutangang paraiso
nga mingaw kini,
haw-ang,
daw may kulang.

Nagmagul-anon si Adan
nangita siya sa labing hingpit nga kapikas,
sakuban sa iyang hinagiban.
Wala'y laing perpekto niyang gikinahanglan.
Babaye sa iyang kalibre
ang pigura niining daw kinulit
sa haniting iskultur sa langit.

Nagmalipayon si Adan
ang kanhi niining kamingaw
napulihan sa mga awit sa talidhay
sa babayeng iyang gisimba'g
gihimong tropeyo sa iyang mga kadaugan.

Nga bisan sa kahuyang niini
nagmadaugong,
mibangon sa kiliran sa bisan kinsang amahan
nagmalampusong,
mikumpleto sa kahaw-ang sa kinabuhi ni Adan
ug mipadaghan sa iyang kalibre
sama nga ikaw, sila nangandoy
matud-an sa gamayng tulo sa grasyang
mapadaghan ang liwat bisan sipat
garbo sa ginikanan.

Human niana,
bisan luyat pa kinig,
uga sama sa desertong
naughan sa tubig,
migitib gihapon sa mga ngabel niya
ang katawa sa iyang kadaugan,
kalampusan sa iyang tumong ning kalibutan.

Nga bisan
sa kahuyang niini
ang lalaki dili magmalipayon kung wala siya niini.

Tadlas paingon sa Himaya

Daw gibayaw sa langit
ganay sa imong gugmang
sanglit usa ka tadlas sa walay puas
nga kuba-kuba sa akong
dughang hagbay rang naughan,
daw sa batan-on gihapong
musikad, magpakabaskog
haron mudaog sa paglupad
paingon sa himayang
duol nang makab-ot.

Ang Mugnang Kahoy

Didto niadtong kinailadman sa kalibutan,
adunay duha ka magbabalak,
gamot sa mituybong punuang habog
bunga sa ilang paglayog,
kurambos sa mga laway nilang
lala pa's bitin ug hait pa's
espadang doble ug sima.

Tira, duslak sa panganod nilang kaaway,
ali sa kahayag nga gihatag sa haring adlawng
ilang gisimba,
silang duha nga gamot,
nanagtanday,
nanagsangang mibaliad,
mibalitok,
daw acrobats sa sirko-sirko
sa roletang silang gipunay'g targit
sa lantip nga mga huna-huna.

dili kini pagpakasala. gugma kini
sa balak nga ilang gimugna.

Sama nga silang duha ga-uwang
sa takdol nga bulan. wala manghinaot
nga maabot ang naabot sa uban
kundi midayig sa kahayag,
kamaanindot sa awit nga gasinggit
niini sa langit.

Pasaylua kung nakalapas man gani
dili ko buot bungkagon ang pinundok mong tae,
tae sa bakang imo unyang iabuno sa laing kahoyng
kaniadto mo pa bisi-bisi
apan napakyas ka
kay kubol kini'g wala mamulak,
mamunga,
sama sa kahoyng mitubo sa kabatuang kimba.
Lahi sa mugna natong duha.

Linghod nga huna-huna

Mituybo sa huna-huna
ang galukot nga udlot
sa linghod nga tinguha
diha sa tambuk nga yuta
sa imong himahaya.

Ayaw saypang pagbubo
haron mulambo mahimong
labong, mabungahong kahoy
ugma damlag sa atong pagsukarap

Maykahawirang kahoy
lig-on, dili mapukan sa iyang
kaligdong,
samang ugma niining balak
nga akong gimugna karon
mahimong dili na nila makita
apan magpabilin sa memorya
nga walay si bisan kinsang mukuha
kay dili makawat
sama nga ugat ikaw ug ako
nga giugbok sa lawom nga lawud
sa pagbating wa tinguhaang
mukiringking
sama sa iring nga gapunayg miyaw,
miyaw, miyaw didto niadtong tumoy sa bangaw
dili maabot sa bisan unsang kuhit
gawas sa pulong ning akong balak
nga migitik sa tawong milili
mikalot niining lisong karon
nahimong gamayng salingsing.

Nagtagong adlaw

Dili man tingale sayop kung
mangluod panagsa
sama sa adlaw nga wa karon mupakita
nianang bungtod sa akong mga tinguha
ang bangaw daw nagmakuli
dili gaya sa akong panan-aw

Pasay-luang mubakasyon una didto sa unahan
haron masagap ang hanging gikinahanglan
kanang hanging presko
haron sa huna-huna mahimong
blangko, walay kabalaka,
walay ikatingala,
kung sila dili muhatag
sa ilang mga tagsa-tagsa ka ideya.

Mahimo sang sa dayon
ugumon ang kangit-ngit
sama nga mitago ang langit
sa awit ni manoy nga mipadayag sa iyang kamingaw
sa iring niyang gibugaw.

Upaw

Ala una dise utso nasab
wala pa gihapon giduaw sa dukang gipaabot
gawas sa kapungot, nakutaw na akong utok
kapoyg himog balak unya lainun lang nila'g sabot
lisod sad magbagut-bot
maayo nalang ikawot sa nagkatol nakong kibot
way magbuot ako rani dili ni maila

Ilang gikulatang kahago nako
kaugalingon rang giilad nila
maayo pang akong upaw
sa kasinaw lakra nang pahak
nga buot nilang mahikap

Apan dili ni nila maangkon
nia lang ko sa ibabaw
nibatog sa akong nagsinawng upaw
sila naa sa sulod
sa akong utok nga nalugaw.

Ingnon talag "adios patria adorada"
giduka nako kahagbungon na akong kalimutaw
humana nako himua ang akong
homework karong adlawa
salamat noy ugma bugno nasad ta
padayunon taning hagit nila.

Nanagsigang mga kalimutaw

Pagkadaghang mata,
mata diri,
mata didto,
mata sa ubos
ug mata sa ibabaw.

Murag mga manginginhas
nga wala pa ganiy hunas
dayon tadlas nianang
nagpalayong taub
ug nagdangarang nga hunason.

Sama sa usa ka magbabalak
wa pa gani kalupad nitugpa na dayon
daw nakabsan sa iyang gininhawa
daw natuok sa iyang kapa

Paet da murag gilibutan
sa mga kalimutawng nanagsiga
andam muhagpat sa imong
mga lusa nga gamata

Hastang ahaka
silang tanan pasaylu-a
kay wala sila masayod sa ilang gihimo.

Ang ilang gibit-bit nga hunas
umang na diay to.

Ang binong ginama sa lubi

Hastang ahaka
kining bayhana
daw hawod mutungab
sa longneck niyang dala

Wa lang damha
hangtod ra diay siya diha
sama sa iyang balak
di sama sa ilang
mga black label,
ug uban pang label
kanang mukahubag sa ngabel

hala inday buga
ingon gyud niana ang layug
sa mga palahubog,
makalibog,
kung ang giinom isulod
sa lawod sa utok nga lawom
dili matugkad
ug dili tugkaron

Ug nganong tugkaron paman gyud
nga pweding mang mabaw
naa bitaw kusgan nakong
na-ilhang magbabalak
aw wa diay ko kaila
sa ngalan lang niya
hastang buanga
nasayop kug buka
nakalimot nga wa pa diay koy tugpa
ikaw noi tugpa na
imong mata gasiga na
o haymas maayog manihapon ka una
usa muinom anang imong tubang
gisugdan mo pagtungab.

Giluod akong kasilyas

Giluod akong kasilyas
pagkasimhot niyas akong utot
unsaon nalang kaha
kung mugawas na akong panuhot

Naluoy kung nagtan-aw
dihang nidiwalwal iyang dila
dili ba kaha sa kalami
ug basig mabdos tingali

Apan kinsa man sab ang nikasta
wala man koy nahinumdumang
ka-date niya.

Pastilan ning kasilyasa
gihimo naman kaha ning
balay ulaganan sa duha ka
lingkuranan,
kalibanganan,
palabyanan sa gabagulbol na nakong tiyan

bahala na sila
wa ko'y labot kung sila gakasta
ang ako lang ipahayag
ang anaa sa akong galamhang giduka na.

Akong pamahaw ang panihapon nimo

Pastilan manoy
ibutang talag hait na sila
gasanga ilang dila
murag mga yawa
kintahay mga maayong mumugna

Apan unsaon taman
akong binisaya
ordinaryo raman
dili man hait
apan duna niy nanagsangang
tanghaga nga ako lang ang nasayod

Pasensya nalang ang uban
kung gasige lang gihapon ug uban-uban
wa koy labot
dili musakit akong lubot
kung dili sila makasabot
ako ning style
style pod na nimo manoy.

Ayaw ka guol
layo rako nimo
ako palang ning pamahaw
panihapon nana nimo.

Ang pakighilawas sa Robot

Paet dang makighilawas sa tawong way gusto
Paet ang mugakos sa dili tawo
Daw robot, daw tuod nga giugbok sa atubangan mo.
Walay gininhawang mabati
dili makapabuhi sa nagka-awop nga baga.

Paet dang mugakos sa kamig nga puthaw
gahi, way kalipay o pahiyom man lang gipadayag
daw manikin, daw robot,daw istatuwa
sa Emall ug Ayala
way laing mabuhat kundi ang mutan-aw
ug mututok nga lapos sa kalimutaw.

Hain ka?

Hain ka? Dili ko ikaw makita.
Hain ka? Tinabunun akong mga mata.

Umarika, pahikapa ko sa imong himaya.
Itunol ang imong mga kamot,
Tul-tuli ko kung asa ka palihug.

Hain ka? Hain ka?
Akong dakong kahingawa.
Lisod pagpangita sa tawong gitaguan ka.

Hain ka? Hain ka?
Palhug intawn paminawa.

Pahawa, palayo kanako

Pahawa, pahawa sa akong atubangan
usa ka dakong dangan
iresponsable, ug daw sa way kabilinggan.

Tan-awa kanang imong panagway
daw buang nga way panudlay
matang naglawom
murag gisumbag sa kalagom.

Ayaw paundayuni,
basig makalimot kang naa pa diay ka dinhi.
Ayaw himuang ali,
ang imong pagkaway kapasidad
kay kana imposible.

Pahawa, palayo kung kanuyang
ingon ka niini.
Way silbi, way paningkamot
hain nang imong mga kamot.

Pahawa, pahawa
dautang tinguha
Ayaw paduol kanako
dili ko gustong matakdan
sa imong kahakog ug kadawo.

Marie Celeste

Gibantog sa iyang misteryo
ang Marie Celeste nga gitago
sa mga nagpahiping misteryo
nga giingon tag tunglo, kalag,
o istorya sa gugmang trianggulo.

Gikan sa sinugdanan dangan
sa mga kapitang midumala
ug may katakos sa pagpukan sa bisan si kinsang
mangahas pagpuyo ning barkong matanghaga.

Sa kasamtangang higayon
gitawag siya sa iyang dagnay nga
Marie Celeste ang Barkong kalag
nga gibiyan, giabanduna sa mga
mga tripulanting buot makalingkawas
sa dimalas nga gidala ug iyang gimanggad.

Ang pangutana: Hain na sila?
Nasayod kaba?
Wala ba kaha sila lamya sa higanting kugita?
O kaha gilamoy sa gutom nga lawod?
May kasulbaran pa kaha?
Kana dili na akoa.

Kaykaya ang sugilanon haron
ug ang tubag imong maaangkon.

Palingkura

Palingkura ning tampi sa imong mga ngabil
pula, sinaw, daw nangimbitar,
tambal ning akong kauhaw

Palingkura ning imong sala
sa wanangan sa imong dughang maabi-abihon,
pwerting lapara

Palingkura, ning dapita sa imong ganghaan
dawata isip hinigugma
sulod nianang imong galamhan,

Palingkura, palingkura, paplingkura.

Tubod sa mga panghuna-huna

Sapnay niining akong mga kamot
ang dagayday sa mga pulong
nagagikan sa tinugdang niining
magbabalak nga adunay hagip-ot
nga lawak sa panghuna-huna.

mabaw,
apan wala ika-ulaw
limitado,
apan buot dungagan
sa natun-an sa eskwelahan.

Ang palad sa inahang layo sa anak nga nanginahanglan

Dali anak dad-a ngari ang imong pagsalig
kanako nga imong inahan sa kanunayng panabang.

Akong ipasalig nga bisan layo, ikaw ang tagan-an
sa akong panahon, isipon kong dili lang obligasyon
kundi akong inspirasyon.

Diri ning akong mga palad ipabati ang matuod nga kaanit
nga bisan sa kamingaw ikaw nia ning isip.

Tan-awa, gapilit sa hugaw ang akong kamot, dawata

tan-awa nagkalapok
akong kamot, tan-awa

gapilit sa lapok ang mga tudlo
tan-awa ang mga tudlo, gapilit

nagkahugaw sa yutik
nga lapok sa akong palad, nagkahugaw

dawata ang akong mga bukton
agaka sa iyang pagkadagma, dawata

Dinhi sa akong isla

Taliwala ning lawod sa akong mga damgo
ako kamong giimbitar pagbisita ning akong islang nag-inusara
sama sausa ka dakong mata
nga makakita sa bisan si kinsa nga mulabay,
mubiay-biay, ning islang sama lang kadako sa bola
ang kalimutaw niini berde, nagpamatuod sa iyang pagkatalagsaon
sama sa mga tawo sa Iceland nga gaankon sa mga kasagarang matang berde
sa kalibutan.

Tinuod nga giimbitar ko kamo
tinuod nga gipakuyog sa akong pag-inusara
didto niadtong ilawom sa akong lubi nga gitanom
diin tika agdahon pag-inom sa akong butong nga bugtong
tambal sa pagsuroy-suroy sa akong isla matahom.