itanyag man ang kalinaw

nipanaw man ang gugma
ug niabot man ang kamingaw

kanimo nga kanhi nagtukaw
ning lawom nga kagabhion

ilawom sa dan-ag sa bulan
sa atong gugmang langitnon

dili ko itugyan ang akong pagbati
hulip sa imong pagpanaw palayo

bisan itanyag pa ang kalinaw
luyo niining ako karong pagtago-tago.

Kaminyuon

nagtukaw ning lawom nga kagabhion
gunit ang kinaritis, hinan-ay nga lanot sa
pangaliya, pasensya ug gugma

naghablon niing halapad nga paglaom
balon ang pagpangga ug pasalig
nga ako magmaligdong dinhi ning lawak

sa atong kaminyuon.

(idikit-dikit ko ni sa akong anabs)

Omang

kinsay magdahom:

ukabhang sa aninikad

gahaw-ang sa baba sa hunasan

gipadaplin na lang ug gipatid-patiran

gipuy-an karon sa naglatagawng

OMANG

lunhawng panglantaw

ang lunhawng panglantaw
bunga sa mga nangaging

unos ug bagyo,
alimpulos ug buhawe

labay sa mala nga yuta
dala ang gabaha nga luha

natay-og man ang dalan sa himaya
wala kini nahimong babag

sa lakang sa adlaw
nga misubang sa kabuntagon

hulip sa kangitngit
nga tulisok

sa akong pagpakahilom.

sapa sa luha

ang sapa sa luha
adunay buhing isda

mabingwit,
ug mapuslan

sa pagpakabuhi
dinhi sa mala

nga wala sa langit
pulong pa sa dagsa

pagluka sa gitanom nga kaligutgot

ang kaligutgot usahay
dili lalim buhion
ug labawng dili daling lukahon

kay sama kini sa gamot
mukuyanap, mukatay,
ug mahimong mutuok

sa dughang nagtanom
niining kaligutgot, ug
kapungot sa kahayag

ug ikaw himuong ulipon,
igapos sa kasina,
ilubong sa kahadlok

apan bulahan sila
nga miluka niini,
ug wala magpanagang

masamdan, magkadugo
ang gakugan nga samad
sa imong pagbiya ning dughan

maukab man pagbalik
dili igsapayan,
mahaw-as lang ang kalamayo
nga mikutkot

sa unod nga huyang.

ang kasing kasing nga dugta

sumala sa giingon mo
ako gahambin ug
dunuton, lata, nadugta
na nga kasing kasing

ug ingnon ko usab ikaw
dili kita managlahi
maong ayaw ihikling
ang imong kaugalingon

gi-ulod ka usab
ug gipunaya'g kit-kit
sa mga gaalirong
nga dagkong kalimutaw.

nagpakahilom sa lawon nga kagabhion

nag-alindasay,
nahipalasay
nga huna-huna

ning lalom
nga kagabhion
gustong manghagdaw

sa matuod
nga panglantaw
ug pagkamatinud-anon

sa paghikatulog,
pagpiyong
haron dili makita
ang hulagway,

ug madungog
ang awit
sa pakitabang

nga daw tulisok
sa galamhang
nagtago luyo
sa mga huni
sa alibangbang,

nga nagpakahilom
nga ulod ug bunlod

dinha sa nadugtang lubi
sa nahunob nga luha
sa langit

nahimo suliran
nga wala'y katapusan
giambat ang
paghaw-as

sa lawom
nga kagabhion
ilalom sa dan-ag
sa bulan.

tinun-an

unsa bay angay buhaton
sa kanunayng pagtamparos ug
pagyatak sa katungod
isip usa ka ulipon

ikaw na mismo ang gaingon
nga dili mahimong sirad-an
ang ganghaan
haron libreng musulod
ang hangin nga presko

ug mahanaw ang gapuot,
alingasaw sa lang-og
nga panglantaw sa palibot,
nga bugtong katuyuan
ang matagbisita sa kahayag
sulod sa kangitngit sa akong

pagka-tinun-an.

igo na

panglantaw nga gihambin,
pagsugilon sa usa ka pagtakuban,

kagawasan nga ginapos sa
pinuy-anang nahimong prisuhan.

hinigtan nga karon gibuhian
sa kamatuoran nga mitalaw sa

gadupang hawanan sa pagbasol,
nganong ikaw ang ania sa alimpatakan?

nahimong lusok sa luha
sa dinaug-daog nga tinun-an


igo na ang pagpunay kanako
ug tuok sa mga pulong

nga mahait, pait, ug hapdos
ug milaknit niini sa akong

alimpatakan ug kasing kasing.

nasayod ka niana

wala kay angayang ikahadlok
wala ako'y planong musuon kanimo
mas naka-uyon ko sa akong pag-usap,
paghan-ay sa akong mga kanaon
dinhi sulod sa akong gihawaan

ug nasayod ka niana

bisan niadtong gamay pako
wala ko nahimong musuon
ni mamasa pagpanglaba
ug labawng wala ni papa
sa iyang pagpamanday sa kusina

nasayod ka niana

miski ako dili ko buot
ang musuon kang bisan kinsa
bisan pa ug balion ko nimo
dili ko gustong mahimong tugas
kay kawayan lang ako

ug nasayod ka niana

kanimo pa kaha?