gibati na usab

gibati na karon nila ang kamingaw
gibati na karon nila ang kahaw-ang

apan niadtong ako ilang gibiyaan
wala kana nila gihinuklugan.

Buhaton ko ang tanan

buhaton ko kana Fra Celso
ipa-abot ko sa tanan
nga mga bungol, buta, libat
amang, bakol, buang,
nga ang kamatuoran
anaa dinha sa Iyang habog
nga hagdanan sa langit
nga nanginahanglan sa ilang pagsaka--
tikang sa kalbaryo sa pagpakabalaan.

gapadingul-dingol

milakaw ako didto sa layong dapit
gusto ang magpakahilom sa akong kapungot

dili ko gustong mutulisok
kay dili pud ko ganahang tulisukon

apan ila akong gihagit sa pagsinggit
ug paghambat sa ilang mga gipaambit

kanila nga akong kaaway usa kana kapaet
nga kamatuoran ug kanako usa kana

ka dakong kapildihan
apan daw sa wala silay kasayuran

nagpadingul-dingol
sama'g mga mayang bungol

nga bisag gipaspasan na sa binitay
nga tawo sa humayan

wala gihapon makabantay
matang galaray

tingale gahulat kini sa pabuto
sa dibumba nga hinimo ni Tatay Iko.

lisod silang sabton, gusto silang sila akong sabton

mahimong lisod ako sabton
wala kana'y kuydaw
naanad na ako niana

kaniadto pang ako gipakataw
sa dihang si mama napungot
nganong wala ko makuha

sa iyang paglag-lag kanako
ug niadtong gihatag niya ako
didto sa akong apuhan

sa Escario nga wala lang gani
mangutana kanako
kung musugot ba ako

apan matuod wala sila
makasabot kanako bisan
niadtong mubangon ako ug buntag sayo

haron mukat-kat niadtong tranati
sa among tungod mamupo ug bunga
haron dili ako mangayo

kanila ug sa akong balunon
o bisan iamot sa among eskwelahan
wala sila kahibalo

maong nganong mahibulong
paman ako, hagbay ra ako
nga nakabantay niana

apan wala ako mangita ug pagsabot
kay aduna ako niana
dia sa akong bulsa

ug diay giluk-lok ko
sa akong utok
pwerting daghana

ang ako lang
dili ako nila hangyuon
nga sila sab ang akong sabton

aduna sab koy pagka
gahi ug ulo
lisod sa ko pasabton.

wala sila maksabot

nagpaka-aron ako kanila
miyag-yag ako sa gamay
apan gatuo sila nga mao nato tanan

taympa una,
ang timon lang kadto
dili kadto ang barko

apan wala na nila'y mutoo
nga atua pa ako'y gitaguan
sa taliwala sa kalasangan

nga akong gipa-ayo
sa mga haniti nga panday,
ug magbabaol

kay gusto nakong mag-uma
sa taliwala sa lawod
diin tua ang daghang isda

wala sila makasabot
unsa sa'y ako?
wala ako magpasabot kanila

gisulti ko lang ang tinuod...

dili na kinahanglan tun-an

gitun-an ko na ang tanan igsuon
nasayod na ako niana bisan
wala ka pa muingon kanako

wala lang ako magdahom
nga ikaw nabalaka niining
gulang pa ni mampor

apan ingnon ko ikaw
niadtong nag-edad pa ako ug pito
kabisado na nako ang dalan
sa Escario, nasayod ako

ug dili kana tun-anan
mugawas gyud kana
kay usa kana ka kamatuoran
nga bisan unsa nga hinungdan
imo gyud kanang mahibaluan

kay sa gikaingon pa
wala'y aso nga makum-kom
ug wala'y baga nga makaon.

bulak ni dodong Marc

wala nay mga dahon
nangapungil ug
wala nay pungango

wala nay sinina
gihubuan mo
sa kadaghanan

dayon biya
sa gabikangkang
nga duha
ka maanyag
nga binuhat

nga wala lang
gani nanamilit,
o bisan na lang
muambit sa kasakit

diha sa lingkuran
duol sa front seat
nga natagakan
sa duha ka biktima

nga bisan sa ilang
pagpangatang-tang
sa gihay
sa ilang kaputli

wala kini miping-it
ug mangayog pakitabang
kanako nga nakasaksi

ug dali kang
mibiya kanila
mapadayugdog,
mikanaog
sa Ceres didto
sa Carcar

haron iadurno
sa imong altar
ang pinili mong
unom ka bugkos

sa lamurok
nga mga aping
ug sa mga puti ug lalag
nga bulak
sa Chrysanthemum.

alang kanimo Inday

pagkaanyag,
pagkamatahom
mong sud-ungon
diha sa imong
pahiyom
nakita ko
ang imong
kamatinud-anon.

ang langit ug ang yuta

nganong hisgutan
ta kanang kahaw-ang

anaa ka diha
ania ako dinhi

unsa pa bay lain
dili man mag-abot

natural lang ka na
ikaw ang langit

ug ako ang yuta
gapaabot sa

imong ulan
nga sa akong aping
mga tagak.

responsoryo

ikaw ang akong mugna
ikaw ang akong ugma
ayaw kanako pamiya
kay haw-ang man kaha

wala pa koy pamahaw ning sayong kabuntagon

insakto ka anang imong
gipang buhian nga pulong

lami kaayo ang imong balak
wala pa akoy pamahaw
ning sayong kabuntagon

pwede sigurong mangayo ko ug duha
akong prituhon.

Ang pagkayab

alang kanako
bisan ang
akong mga
guris-guris
nga pulong
dili mapatik
diha sa imong
halapad nga langit,
dili ko gihapon
kini hunungon
kay kini
ang kalipay
sa akong kasingkasing
nga mipadayag
sa akong gugma
kanimo bisan
sa pag-ayad
sa uban
kay dili
susama
nianang mga
lantip nga
mga pangaod
nga mipasundayag
sa ilang mga
inumol nga hulagway
sa imong nataran
ug bisan dili
kini susama
nianang banog
nga mikayab
sa iyang mga pako
sa kaisug,
mupadayon ako
pagpasundayag
sa ikang
kabs nga mga
pulong ug
bisan dili
lantip nga
pangisip
diha sa
asul mong
mga langit.
ako gihapon
kining isinggit,
gihigugma ko
IKAW...

kaminyuon

hain na kadtong mga tulisok
nga mikumot sa akong kasingkasing,

kagahapon didto sa akong paghalok sa hangin
nga ikaw lang ang nasayod,

katapusan na gyud tingali
ugma sa sayong kabuntagon

sa alas dose ang takna
mulakaw ako niadtong

dalan padulong sa kahingpitan
sa atong gugma, ug bisan man gani

ug dili ka muabot, ikaw akong paabuton
didto niadtong ganghaan sa kapelya

sa San Antonio diin atong
usahon ang atong mga kasingkasing

niadtong singsing nga lingin--
bulawan sa gugmang tiunay

nga atong gipulawan latas sa
kalim-an ug lima ka katuigan

sa katupusan nahatagan na kini
sa iyang pangandoyng pinuy-anan--

ang kaminyuon...

Panggunit

nagbaklay ang handurawan
didto niadtong karaang dalan
nga mualitbog sa matag tayhop
sa hangin didto sa kalbaryo
sa Carmen diin ikaw anaa nianang
kinatumyan sa bungtod,
mikab-ot nianang bulak sa pagmahay,
kahumot sa kalatsutsing angayan
sa pagdayeg sa mataghalok
sa kainit sa gugma gipaambit,
kung unsa man pananglit
panggunit nianang lawting
nga padulngan, kay sakit
ang mahulog sa kasaypanan.

ang nagpadayugdog nga sapa sa kong pagbati

Miagi ako niadtong usa ka sapa nga mabulukon, nga midala niadtong akong nag-uros-uros nga pagbati diha kanimo nga alang kanako walay sama ang katahom. Gugmang sama sa tin-aw nga tubig sa sapa, tataw kining mipadayag sa kina-iladman, nga naa sa dayag nga mga balas kauban nianang mga bato nga palanas, ug uban nianang mga isdang walay kabalaka ug ang mga baki nga nagpatampi dinha sa iyang mga ngabil nga walay kahadlok malunod dinha sa linaw nga tubig sa imong pagbati. Apan ingon lang gyud niana, lumalabay ang tubig dinha ug dili kini magpabilin, muhalok lang kini sa pipila ka gutlo ug dili gani manamilit ni muhatag sa iyang kamot--wara timaan sa iyang paglakaw. Nakita ko ikaw, mipadayugdog, nasakitan ako, kay matuod nahigugma ako kanimo apan unsa ang akong mahimo, tawo ako, wala akoy gahom paggunit sa imong bulok dinhi ning akong mga kabos nga kamot.

dinhi niining akong kamalig

dili ko kadto kalimtan
ang imong mga halok

dili mahimong mahikalimot ako
sa imong paggunit kanako

ug diling mahimong pasagdahan kong
mahanaw, mapapas ang pagbati

ug mabuhi ang lusok sa kamingaw
nga gibati dinhi niining
akong gamayng kamalig sa
sa gugmang putli.

Kagahapon, ugma ug karon

Ang kagahapon usa ka bilihong bulawan
mugilaw kini bisan imong pasagdan
diha sa imong handuraw nga gimingaw

Ang ugma usa ka kahayag nga paabuton
sa tawong wala gadamuraw diha sa panglantaw
sa mga lunhaw nga kaugmaon sa usa ka
magdadaro nga gatudling nianang uma sa unahan,

Ug ang karong usa ka gasa, usa ka matuod
nga kuhit haron maabot ang balak sa pagpakabuhi,
taas man kini o mubo anaa lang kana kanimo
ang pag-abot nga usahay gamiton ang
malisod nga pagkinto, hunat--kab-ot
nianang huwad nga gugma sa tawo.

mabuhi ako bisan

sa imong kamatayon nihilak ako
matuod nga sakit kadto

ug karon nga nabanhaw ka dinhi
niining akong galamhan gasadya ako

apan ingnon ko ikaw,
kung aduna man ako'y gustong balikan
dili kana ikaw, kung dili ang imong
handuraw,

mabuhi ako bisan ikaw mahanaw...

Ang kapakyasan

ang kapakyasan
dili ang katapusan

mahimong mapakyas
apan mabuhi diha sa natad
sa gugmang wala mahatagi
sa iyang katumanan

apan ayaw kabalaka
ugma damlag adunay
usa, duha ka posibilidad
nga matuman ang tanang
anaa sa imong palad.

balikan ko ang kanhi simbahan

kanunayng naghangyo kanako
ang akong kapikas nga mangumpisal

kay gusto niya kanunayng hinlo ako
magpasabot nga ako walay mansa
dinha sa among panang-uban

apan nagpadingul-dingol ako
daw sa wala ko kinahanglana kana
apan ingnon ko kamong tanan

nga wala kamo masayod ug nganong
ingon niana ang akong baruganan

apan kung unsa man kana, ingnon ko kamo
nga karong umaabot nga sunod adlaw
isugid ko ang akong tanang kapakyasan
sa simbahan nga akong gipuy-an kaniadto

apan gustong puy-an pagbalik
bisan sa laing bokasyon
dinhi ning kalibutan sa mga buhi.

Pipila lang ang nasayod

pipila lang ba ang nasayod

sa akong nahimutangan

kinsa ba sila nga nahibawng

wala ako sa among panimalay?

ug pila lang usab ang nasayod

sa matuod nga ako nahigugma,

nga gihigugma ug wala magsakit

kay ang hinigugma ania sa akong kiliran.

pagkahuman sa ulan

Nilabay na ang ulan
ug matuod man
nisubang na usab pagbalik
ang adlaw sa kabuntagon
ug ang bulan sa kagabhion.

Alang kang Fra Celso

Dili ko buot ang mudasmag nianang habog nga paril
wala usab ako magplano nga muyatak nianang mga sagbot
nga naa nianang tungod daplin sa balililhan nga nagpalandong
lamang haron mabuhi dinhi niining kalibutan

dili ngil-ad ang akong katuyuan ug labawng dili hingpit ako
wala ako masayod nga dinhi sa akong pagpuyong malinawon
aduna diay pipila nga naghilom pagpaminaw, lantaw sa akong
mga gibuhiang mga pulong--tulukibon ug panglantaw sa usa ka kabos

gikan usab ako dinha sa imong nahimutangan igsuon
ug pipila lang ang nakasayod nga gikan ako dinha
wala akoy tumong nga ilang mahibaw-an kana
kay wala kanay kalabutan sa akong gibuhian

apan ingnon ko ikaw nga kung nakalapas man ako pasaylua,
nga kung nahimo ko man nga bahiran ang panglantaw sa uban
pasensyia, tingale aduna ako'y angayang lantawon usab luyo sa akong
pagpakabana, tawo ako ug limitado sama kanimo dinha nga gapaminaw

ug gawas pa niana gihigugma ko ang imong nahimutangan
aduna kana'y dakong kalabutan sa ako karong nahimutangan
wala ako naglantaw sa mga sayop sa uban, kay nasayod ako
dili sila ang hingpit, misunod lang sila sa lakang sa Matuod nga Hingpit.