gadamraw sa kagabhion

ako natuk-an

ako nahingangha

nakamata sa kamatuoran

sa tawong nag-ampong

makatulog sa kagabhion

apan ang gipaabot

naabot diha na

uluhan sa kabuntagon.

balak ni inday kandis

pagkatahom,

pagkamabulukon,

walay bisan gamay

nga pulong malitok

ang nahinganghang,

mga panglantaw

daw sa natak-om

sa imong gipamulong

dili matukib ning dughang

misalom sa kalalom

sa garay ug laray

ning sayong kabuntagon.

walay perpekto!

ingnon ko ikaw
mas laming lantawon

ang dili han-ay
nga pulong

kay nianang
gilaray mong libro

walay dagway
sa kalipay

kanunay sirado
ug ni pahiyom

wala kini gipaambit
miski sa anino.

kinsay tawong dili masayop?

bisan ang langaw usahay matugpa
sa kape nga init ug dili lang mapaso
apan malumos diha sa gadagat nga kasilag

init tubig,
nangalimyon sa kahumot
andam nang mukutlo
sa bisan kinsang langaw
nga musulay pagtugpa sa lim-aw

bisan gani ang tiki sa kisami
malangkat sa iyang gilaktan ug matagak
dinha sa nataran bisan ang kinaiyahan
mihatag kaniya nianang natural
nga pilit sa iyang tiyan

ug bisan ang kinaiyahan
usahay dili masabtan
mutuyok ang alimpulo
ug magbangutan

dili mapugngan
sa pagpanghagis,
lapdos kutob sa makuptan
bisan ang balay nga tinukod sa bato
mapukan ug dili mabantayan.

Alang sa adlawng natawhan sa akong migo

Kalipay alang sa imong adlaw nga natawhan

Katunhay sa imong pagtrabaho

Kaayuhan sa imong tibuok tuig nga pakigbugno
sa kapalaran

Katagbawan sa imong mga damgo

Kamakanunayong pagbaambit dinhi sa nataran
sa pagkamamugnaon

Ikaw unta buligan sa daghang katuigan sa imong
pagpakabana sa uban

Ang akong panalangin magauban kanunay kanimo
nga akong higala hangtod sa kahangturan.

Malipayong adlawng natawhan Bay Alan!!!

tinagning pulong alang kang bay lubi

Pagkatahom ning imong mga pulog gitagni-tagni mo lamang ug nahulmang nawong dinhi ilawom sa punuan sa lubi nga karon namunga ug daghan abtananan sa mga bisitang naibog pag-ugbok sa ilang mga payag ilawom sa kahumot sa imong alimyon nga dili lang Pilipinhon ang nakapasilong hasta dayo nga dili ato ang pinulungan miingon nga ang katam-is sa imong tubig ug tuba adunay wala hinsabti nga kina-iya nga wala sa uban unta buligan mo sa pagpalambo ug mamunga pa ug daghan sa nataran dinhi sa dagit wanang kung hain pwedeng imong abton ang katawa sa bulan nga anaa karon sa imong alimpatakan nga walay laing giambat gawas sa pagpapundok niining mga nahisalaag nga mga katawhan tungod sa nagkalain-laing pinulungan--paril sa pagpakighigala sa uban salamat nga imong giablihang pultahan. Bulahan ikaw akong higala.

asa kita dad-on

pila na ba ka bakak
ang misulay nimo pagbalak?

midayag sa iyang tingog
kaingon mo'g tinuoray
apan tiaw lang diay

dili kita ang dagat
dili usab kita ang mala

kita lang katong tanghaw
sa sayong kabuntagon
nga gitugnaw

ug nalimot sa kung asa
na kita gipaingon

sa pagmata ba o
sa paghikatulog.

paminawa

gipul-an na ako
anang imong pagpunay
kanako ug maymay

dili nako batang gamay
may kabuot na ako
ug kaugalingong pangisip

nga angay mo usab nga
paminawon bisan ug diyutay.

nahipalasay

didto ako nahipalasay
wala nahimutang sa imong
wala panamilit kanako

giduwaan mo ang akong langit
gitawag mo ang dag-om
ug imong gihagit

gibuhian ang ulan
nga walay pupanuko

bisan sa kasayurang
daklit lang ang tanan

karon nagapos ako sa kasubo
naglunang sa kamingawan

nagtuo sa buhing bakak mo
gusto ko mang magmata

apan ang akong damgo
usa ka urom gumikan kanimo.

Paet tam-is

paet tam-is ang gugma
maayo nalang tingali ang mupalayo
mao nalang kana ang pinakasayon
nga akong mahimo dinha kanimo

ang tanan makahimo gyud ug kasaypanan
mahimong mawani kini, ug walay si bisan kinsang
kapasinganlan, ang kinabuhi ingon sa gadumili
nasayod ko nga gihigugma mo usab ako

apan salamat, ikaw man gihigugma ko
sayod sila niana, sayod ang tanan
wala kana nato gililong, dili kita tagulilong
wala kita nagpuyo didto sa bukid sa Kantulimbong

hinlo ang atong konsensya, nagminahalay kita
ato katong tanan, igo lang sila sa pagtutok
kay bisan sila nagtangag usab sa ilang
tagsa-tagsa ka pagbangutan sa pagpakabuhi

ug karon gigamit ko na ang mga pako
nga gihatag mo kanako, salamat andam na ako
sa pagbiya mo ug ingnon ko ikaw
dili usab ako magpabilin dinhi

ako usab nga bisitahon
ang panganod nga giingon mo
ug mabasa man ako sa ulan ikalipay ko kana
andam na ako muhimamat sa haring adlaw

ug gakson ang iyang gitanyag nga kainit.

Bisan wala ikaw masayod

igo na ang pag-inom anang pait nga apdo
igo nang pagsunog anang atay nimong
duol na ang kamatayon tungod sa pag-abusar
mong walay pupanagana kung unsa ang
mahimong linugdangan sa ingon

wala ako magmaymay
wala ako manaway
wala ako mamoblema ana
kinsa ba ako, wala akoy bili kanimo

apan ingnon ko ikaw
ikaw adunay bili kanako
gimahal ko ikaw
bisan wala ikaw masayod.

Kinsa ba?

kinsa ba ang wala magtakuban?
kinsa ba ang wala magbangutan
sa ilang mga ginagmayng kapakyasan?

kinsa ba sila nga mutudlo kanako?
kinsa ba sila nga muingon nga hinlo
ang ilang gipuy-ang lunangan?

igo na ang pagpakaaron
aduna napud ako'y igong pangidaron
dili na ako batan-on

ug sayod ako nianang inyong gipang-ingon
paagi lang kana ug bisan ibutang tang
nagmalampuson ka dinha

mahimong ako dili.

wala ako'y giusikan

pila ba ka anghel
ang nadungod ko karon?
nga miawit, mi mipasumbingay
sa hulagway sa kalipay ug kasakit
diha sa matuod nga kinabuhi
nga ilang gipangpuy-an

nasayod ako
dili ako buringog
gamay palang nga wala ako
akatara sa akong inahan
ug amahan
ila nalang akong gipasagdan sa akong
apohan nga utro usab nga walay
panahon pagpangutana
kung naunsa na ako

maong kanang plano nga giingon mo
hagbay ko ra kanang ginahimo
apan usahay bisan sa makagatusan
mo pa kana giplano
aduna gihapo'y matuis
ug dili masubay sa dalan
nga gusto nimong subayon

ug matuod nga may pangidaron
na ikaw kay kanako dinhi sa pagpakabuhi
sa kalibutan apan ingnon ko ikaw
bisan ang akong pagkatulog ug pagdamgo
wala ko kini usiki ug gibaliwala
gipuy-an ko kini sa tumang kamaya.