ang takna

bisan kapila kapa muingon
nga mga hanaw kita dinhi
ug mawala ug mulabay lang

ako kining pahimuslan
mintras ania pa ako
adunay katakos paggakos
kanimo nga akong gihigugma

gikalipay ko kana bisag
maihap lang ang mga takna

antuson ko kana kay mao
kana ang kalipay nga akong
gipangita

ug diha sa akong
paghulat sa lumalabayng
ulan nga nibisita ning
ting-init nga bulan
dili kana igsapayan.

ang langgam

kinsa'y gaingon nga kumo ikaw langgam kinahanglan mo na ang mulupad, kumo mao kana ang imong kapalaran, kay unsa man diay tawag nimo anang buntog nga gapabilin diha sa mga suot-sout sa bungtod? dili ba diay sila pinalad? wala ako'y pagtuong ingon niana, ayaw ubsi ang imong pagtan-aw, dili sa paglupad lang imong mapuy-an ang ingon nilang imong kapalaran kay dili lang usab ang langit ang kanimo nanginahanglan, ako magpaka sun-ok ug magpakalibunan gustong ikaw ang akong kauban, ug kay dili kaman mulupad nan ikaw akong ubanan, magmata kita sa kagabhion nga mao gyud ang imong natural ug mangatulog sa kabuntagon, ako kanang buhaton haron dili mo bation nga wala ka nay hinungdan. kay sa gihapon ako ang imong hinigugma nga langgam nga dili usab ganahang mulupad bisan sa gatusan nilang pagtugpo, ug pag-inat-inat sa akong gamayng mga pako.

didto giandam ko

didto gihan-ay ko ang akong laing lawak
ang lawak diin ikaw didto libreng magpakahari

didto ikaw ang akong abi-abihon
halaran sa akong gugma nga namituon

didto ikaw ang gawasnon
naa ra kanimo, sa imong kamot
ikaw ang akong pabut-on

didto kita magsadya
ayaw lang kanako ka wala
kay ang akong kasing-kasing
ginapos diha sa lawak mong
gawasnon sa pagbiya

didto kita unya magkita
bisan sa pagkapisok
sa atong mga mata

didto kita maghisgut-hisgot sa
atong mga ugma, bisag wala kita'y
kasayuran nga muabot pa kana.

didto, didto nato buhion pagbalik
ang gugma nga dugay rang nangadugta
nga kung huna-hunaon wala nay posibilidad

didto, didto unya nato languyon
ang atong mga nangahabiling mga luha
ang luhang duol nang mahubsan
tungod sa namusay niining dagayday
nga hangtod karon dili mapugngan.

ang kakurat

ang katulugon nako nawala
sa dihang nisinggit ka
diha sa imong lawak ug nangutana
kanako kung hain na ang imong
karsones nga Levi's
kadtong bag-o pa nimong napalit
sa SM niaging Christmas Sale
ug kaduha palang nimo nasul-ob.

paets, ako man hinuo'y nadak-dakan
ikaw raman unta ang gahinay
ug sulod-gawas anang imong
pribadong lawak, gawas sa ilaga
ikaw raman ang naa diha
galublob daw himungaan
walay kaun-kaon ug labawng
wala'y tugpa-tugpa,

tan-awa ra gud nang nanglagom nimong
mga mata, nga daw sa bangkay
nga naagnas na, nanimaho, wala nay kaligo
pwerte na gyud tawn nimong ungua
kulang nalang bangkil bampira ka na
sahay mahadlok ko basig buang na ka
hahayz~ paeta baya aning makabana ta
ug adik sa pagmugna ug bisan unsa.

ang tambok

hastang animala, nalingaw ko ug katawa
ang akong amigo nga tambok
nagdala-dala sa duha ka dagkong putos
sa SkyFlakes nga biscuit, timo kuno kadto niya
unya katakwahaw samtang nagkaon ako
sa akong panihapon, gadali-dali
kay may klase pa lage straight
hangtod alas onse, sa iyang tinutukan
nga daw sa may kalagot
ug dayon miingon siya nako,
"it's a matter of choice,
it's not how much you eat
but what you eat."
wahahaha~
kay nangutana ba kaha ko
na mauray ato wala sad ko manghilabot
kung unsay iyang kaunon, unsay ako
ug galagot siyang gatan-aw sa humba
nga akong sula sa panihapon
agay dili nana ako,
ug kay unsa man diay tong akong gikaon
nga sa akong paminaw lamian kadto
linuto sa karenderya sa among silingan
limpyo pud tingale to kay hagbay ra kong kaon
ug ingon adto apan wala man mubalibad akong tina-e
kaluoy sa Dios tul-id paman gihapon ni
pastilan kung gusto silang magdiet sila lang
dili ko muapil, ngano man diay?
dili sad ko gustong mamatay.

ang buwan

dili ko buot nga pasakitan ka
dili ko buot nga masakitan siya
samang ako dili usab gustong
masakitan ang kaugalingon
ug ang akong hinigugma

apan ipa-unsa taman ingon
gyud niana, wala ta ka giangkon
usa lang ang akong giingon
nahigugma ako kanimo
ug dili kana tumo-tumo
insakto na tingale kanang
akong gipakita, gawas niana wala
na ako'y laing apas pa
ug kitang duha nagsinabtanay
dihang dapita usa ang atong katuyuan
wala tay damgong abton ang buwan
gilantaw nato ang posibilidad
apan wala kita nigama ug mga lakang
nga siya maabot haron buhaton
ang dili ikahimot sa uban.

ang akong tanaman

ikaw lang gyud ang gabasa-basa
sa akong panid sa kinabuhi
nga unta dili man kini interesante
daghan man kini'g usbununon
dili kini han-ay sama sa imong harden
nga napuno sa mga bulak
ug napasad ang mga bulawan
nga naggilaw-gilaw sa imong nataran.

apan salamat sa imong pagbasa
paglantaw sa akong tanaman
ug kung pananglit adunay kay
mga pangutana, ayaw kaigog
apan tingale gusto nimo diha sa
imong nahimutangan, distansya
apan nanaw mo ang hingpit nga ditalye
sa usa ka bulak nga gidimdiman
sa buyog nga iyang kauban
nga gipangandoy mong mulupad na
kay naalihan ang iyang matuod nga katahom
ang tibuok nga walay nitabon.

ang tun-anan

gikapoy nako'g tuon
usahay muingon ko
nga maayo nalang ug tinun-an gihapon ko
kay maayo to klaro pa ang basihan
sa mga maestra ug muingon nga
naapil ko sa lista sa mga maayo
apan karon nga ako na ang magtutudlo
paets, maayo lang maka-uyon nimo
apan kung dili ganahan sa imong istilo
mudayong pangyamiid murag gibidli
ug pahimuon sa'g homework
mudayon ug pasangil nga busy
pastilan maayo pang wala nalang ko mahuman
karon wala ta ko'y labad
ikaw lang unta tong akong giatubang.

hulagway

gwapo ka kaayo diha sa imong
bag-ong litrato, mao kana
ang kuha sa dihang bag-o
ka pang mata ug unya presko pa,
o kaha kadtong wla kapay tugpa,
dili ba?

pagkahimos sa imong aping
pagkanindot kusniton
unya kumot-kumoton
ug ang imong mata nga murag
naay kalagot ug buot ipaabot
ayaw nalang diha nalang kutob,

apan mas lami gyud tong ikaw nga tinuod
kanang walay porma
katong ikaw gatikung-kong
sa akong kama

unya walay sapot
ug nga gaagwanta bisan walay habol
wala bisag dyutayng bagulbol
igo na ang kainit na akong gipaambit
ug nga ikaw ania sa aking kilid
gatanday gusto ko ato nga hulaghay.

ang sayop nga karkulo

sidlak na kaayo ang adlaw
migawas ako didto sa dalan
kay akong gikuha pagbalik
ang akong mga nahabiling butang
didto sa akong usa ka eskwelahan
pastilan usahay ingon gyud niini ang tanan
kakulangan nga gusto nimong mapun-an
apan wala kanimo ang tanang pagkontrula
usahay sipyat gyud bisan unsaon nimo ug karkulo
mao usab ako, ingon usab niana ang akong gugma
sa tantong bana-bana ang nahitabo nabana
ug naputol, ug manghinaot nga masumpayan pa
apan tingale wala na, unsaon nanghunaw kana,
nipauli ka na sa inyuha ug nga dili na mubalik pa.

ang walay kasiguruhang ugma

may kausaban ang huna-huna
miski ang kasing-kasing adunay paglubad
ang tanan dili garantiya ug mahimong sa kalit
ikaw muhagba nga walay pupananghid

bisan giandam mo pa ang tanang kasiguruhan
dili pa gyud kini hingpit
sa imong mahimong ugma
nganong dili mo nalang kini pasagdahan

itugyan ang tanan sa kahitas-an
nga may labawng kahibalo
sa atong paingnan siya nga dili gustong
ikaw masaag sa imong unyang paglakaw

subay nianang dalan sa kahayahay
nga nangimbitar kanimo pagdayon
ug agni nga mutipon sa dakong bul-og sa tawo
haron dili mo bation kanang pag-inusara

pag-inusarang kanunay mong gikahadlukan
apan dili ba, dili man kana siya makamatay?
ug kung mao, nganong mahadlok man ikaw?
pasagding bation mo, labay lang kana
kay walay hingpit niining kalibutana
gawas Kaniya nga naa sa langit.

ang gagmayng kamatayon

sa matag ingon ko kanimo
nga mulakaw ako palayo
mamatay ikaw bisag gamay
nakita ang imong kaguol diha
nangumbitay sa imong mga aping
may kasagmuyo sa dili mo buot mahitabo
sama lang karong adlawa wala ka mutingog
kanako sa akong pag-ingon kanimo
nga muadto ako sa Mindanao
usa ka semana mu-attend sa kasal
sa akong suod nga higala sa Surigao
nga si Blanche ug Jodi nga gikan pa sa Dubai
dia lang gyud sila haron kuhaon akong emcee
miapil kanimo paghangyo apan
sa walay paghinuktok namalibad ka
dili ka musugot. dili mo ako gustong mahilayo
kay ikamatay mo kung kana ang mahitabo.

gihilantan ang akong estudyante

sugdan na usab nako pagpakli
ang akong laing adlaw,
kasagarang adlaw
nga walay kisaw,

wala mu-eskwela ang akong estudyanti
gihilantan, gibulagan sa iyang uyab
gisakitan siya ug taman,
dili tiaw kay wala mu-attend
sa iyang adlawng natawhan

unya naguol sa wala pa niya
nabayring Casa Berde
nga mao untay mulingaw nila
ug muabi-abi sa ilang pagsadya,

apan wala siya bisan gipaabot niya kini
hangtod sa alas dose, nangluod tingale
giaway man sad gud sa akong estudyante
sa niaging adlaw sa wala pa ang
iyang adlawng giatungan

sa pagtuong mahimo kining mabungahon
apan nasayop napod ang iyang
pobreng panglantaw pakyas ang plano,
wala hinuon maka-eskwela
exam pa man unta.

tab-ang ang kape

tab-ang ang pagkatimpla nako sa akong kape
karong buntaga wala nako matantya
ang dagan sa tubig paingon sa akong tasa
nga akong gikutawan sa akong kasagaranang tinimpla
nga musugat sa akong buntag, pukaw sa akong
kaduka ug kagustuhong muligid pa
sa pinalangga nakong banig hulip sa imong pagkawala.

ang habul sa atong kaguol

tanday ngari kanako
ayaw kaikog ako kining giandam
kanimo ang akong pagmahal
ug saw-an ta kining habul
sa atong mga kaguol nga nilimis
ang katugnaw sa panahon haron
maangkon kanang gibating lunhaw
nga silaw sa mga dayan-dayan
nga anaa sa imong dughan,
mga kabalaka nga mahimong usa
diha unya sa altar nga atong
tagaan sa atong mga halad
nga kaniya ra usab gikan.

LUNA

una ko matulog mag-ampo una ko
dinhi akong iampo ikaw nga akong gimahal
luyo sa imong wala pagpahibalo kanako
nasayod ko, dili kana lilong kanako

ug wala ako masuko, miski ang langit
nga karon akong gisangpit nagtugon kanako
nga ikaw dili pasagdan kay ikaw
iyang pinili dinhi sa yuta aron mahimong luna
sa wala makakaplag niana

imong gihimong pito ang imong mga kamot
ug saksi niana ang langit sa imong gustong mahitabo
nga unta mahakop ang wala nay nisapupo
dili nimo buot nga mahisama sila nimo

nawad-an ka ug luna sa kadaghan nimong gitagaan
sa imo unta, kabulahan nila nga naka-angkon
apan pwede natong saw-an ang akong naangkon
nga diha ko usab hipalgi sa imong kamabungahon.

Ang maestro

angayan gihapon kong maglipay karon
aduna akoy nasayrang pagtulon-an
nga gitudlo kanako sa akong maestro
nga nakalimot pagbasa sa iyang gitudlo
ug mga itudlo pa niya kanako.

nakat-on ako sa insaktong pamatasan
nakat-on ako sa lig-ong baruganan
nadiskobrihan ko ang matuod nga katakos
ug nahibagat ko ang matuod nga ikaw
ang akong maestro nga gitapol
ug basa sa iyang i-klase diri nako
iyang klase nga siya rapod ang naigo.

ang pagpamingwit

yuna pa, tagadiin kaman gyud diay?

kay kagahapon nipahiyom ka
kanako ug hilaw didto sa luyo
sa tilon nga itom, karaan nga tabon
sa ladlaranang pagpamakak
sa mukagat lang sa paon,
nga imong gitun-ton niadtong sapa
nga hayag sa mga tambok nga isda
wala ka magsugilon umang
kaman diayng dako.

ug kinsa naman sad nang imong
bayanang gisapot
sa imong dagwang hubo?

pakpak sa wala kahibalo

namakpak ang tanang mga tawo
sa dihang nitambling ka,
nibalitok ug nibaliad
ug sa ka kurat naninggit ang mga tawo
ug balik ug lupad ang ilang mga pakpak
pahalipay kanimo sa imong kaayo
nga mipakatawa ug milingaw
sa mga adunay daghang problema

apan tingali nakalimot ka
ikaw kadtong akong nakita
nga tulo kabuok ulo
nga managlahi apan usa ra,
hahaha~
didto ko nimo tinuod nga nakakatawa
kay nahimo nimong mupakatawa
sa daghang mga tawo bisan
ang imong luha niagay daw busay
sa buhing bato
ug gihay nga kasing-kasing,

naluoy ko nimo
ug gusto kong muhapuhap
anang imong dughan nga gabangutan
apan kinsa kanila ang akong hapu-hapon
tungod sa kadaghan nila
wala ako masayod
kung kinsa ang akong duolon

imong gibakakan ang tanan
miski ikaw nakombinsi na
nga ikaw taga America
ug usahay taga Kuwait
ug ang lisod, usahay
wala na ka masayod
kung taga diin ka
nganong dili nalang ngari kanako
dinhi sa akong payag
pwede kang mahimong tinuod

ikaw akong pakataw-on
ikaw akong lingawon
dili ko mutambling
apan ihatag ko nimo
ang akong kasing-kasing.

ang dalan sa kagahapon among gisubay karon

dili sama gahapon
ang adlaw karon malinawon
miduyog sa mga utok
nga ania karon gahinuktok
ug sa mga tudlo nga naglukso-lukso
nianang gagmay nga buton di numero
nga letra sa gugma nga anaa sa inyong makinilya
daw hulmigas buot mugawas
sa balayan sa ilang pag-inusara
tadlas nianang tutunlan
sa huna-huna nga walay laing makabasa
gawas niya ug nako nga ania
nagpalandong sa landong
sa mga pulong sa dakong tawo
nga ania kanunay sa akong luyo
dili haron mutamak kanako
kundi haron sagngon ako
sa akong paglakaw
sa dalan nga adunay gamayng kakulian
dalan nga iya ug akong giagian
maanindot nga dalan
kay hubo kini ug wala
ang sapot niini nga semento
gilangkatan sa mga sakyanang nangagi
kagahapon ug kaniadto.

ang larawan sa gubot

bati, ngil-ad, walay lami,
lisod sad kung ang tanan
maanindot sa imong panglantaw
ug wala nalang ang sayop
nga usahay mutulisok
sa atong kapildihan diha sa atong
nagkaguliyang nga lakang
sa kinabuhi nga usahay
atong buot hawanan haron mahiluna
ug makita ang dagway sa kalinaw

apan sultihan ko ikaw
ang kalinaw baya anaa na diha
mahimong dili lang kana matugkad
kay gikinahanglan ang imong paglangoy
ug bisan sa mabaw nga panglantaw
mahimong imo na kining maaninaw
ug matilawan ang iyang matuod nga manggad
nga usahay adunay gamayng kaasgad
apan kana ang timpla nga matuod
dili luod kay larawan kana
sa ako ug imong gubot nga palibot.

ILAD

lisod ilaron ang kanhi nang nailad
dili na sila ihalas
kapila na sila nanghugas
sa ilang mga kapakyasan
maong nasayod na sila sa porma
o bisan sa hitsura sa usa ka ilad
ug gani sila wala makigduwa kanila
hinunua gidawat nila nga sila
huyang ug dili mahimong takos
pag-ila-ila sa tanang dagway sa ilad
nga usahay ania nitapad na kanila
ug kanako, maong ako ania karon nagbakho
nagluhod sa tiilan niya aron muhangyo
sa gamayng kaluoy gikan niya nga giingon ko
nga wala magpaila sa iyang pagduol kanako.

Ang akong manulunda

ania siya kanunay kanako
wala nagpaila kay wala kana niya kinahanglana
nga siya mailhan ko ug makita
ang tinuuray niyang itsura

ang iya mao lang nga ako anaa kanunay,
layo sa disgrasya, siya ang akong anino
siya ang akong konsensya, siya ang matuod nga ako,
siya ang akong manulunda

nga sa kanunay lingid sa akong kahibalo
nagbuhat sa angayang buhatan
haron dili ako maadto sa kadautan
ug wala akoy laing ika-ingon kaniya
gihigugma ko siya ug nasayod na siya niana

ug kay adlaw man karon niyang natawhan
dinhi sa akong galamhan
ako siyang pahalipayan sa halok
sa akong pagdawat sa iyang presensiya
dinhi uban kanako bisan usa lang ako
ka kabos nga tawo nga wala niya igsapayan.

harmless

as painful as the rejection is,
the pursuit is deliriously joyful
I have no choice, you're now furious
I'm sorry to tell you, but so am I
I'm just the mess you thought harmless
But I'll sure ruin you, just better run
as much as you can, for I'll lock your jaw
so you can say no more but beg
to stop the fight you started
for from here you can't go any further
that I'll surely promise.

ang atras abante nga balud

atras abante ingon ang lihok
sa mga balud sa nagkataub
nga dagat,

naghaguros dayon
balik sa agi, apan dili kini sinyas
sa pagkapakyas, kundi matuod
niyang hudlat sa mga balas
nga unya sa pila lang ka-oras
atua na dala sa balod,
gilumpurnas
haron malumos
ug dili na makapanimalos.

urom

kahikatulog didto sa langob
sa usa ka nagbangutang
mga tunob
nga way kahimutangan
sa usa ka kamras
sa panimalos
sa usa ka kabos
nga gibaharan mong
mag-antos
didto sa kangit-ngit
diin imong gikalimtan
ang ping-it
sa usa ka siyagit
sa hulmigas nga napiit.

inom ug tambal

nganong dili man nimo madawat
nga layo ra ko nimo?

atua ako sa unahan
tua sa ika pitong bungtod
ug wala ako nimo manginlabot
bisan kapila ka pa musinggit
o bisag galagot ka pa
o kaha mamatay
ngano man diay?

nakabayad nako sa akong utang nimo
ako pa gani ning gitantuhan
5-6 man kaha?
dan? naa na na nimo

kung duna koy mga sugilanon
o kaha reklamo
angayan sad tingale nimong dawaton
costumer is always right,
pasensya migo
hunaw nako nimo
kung init ka kaayo
iinom na ug tambal
kay piligro na
tingale kana ang hinungdan
sa imo unyang ikamatay.

dili ba diay tinuod

nganong masuko kaman ug
ingnon tikang bakakon ka,

dili ba diay tinuod?


nganong masuko ka man ug
ingnon taka nga bati ka ug nawng,

dili a diay tinuod?

the trap

i am waiting
waylaying
i made a plot
for a real concealment
i made it wrong
i did a move
for my own fall
i'm trap
i'm now in love.

the magic

I've read once, twice
the chapter of your life

there, you are
so happy,
and gay,
misterious,
and found it glorious
you have achieved
your true joke
a fast one,
a conjuring trick,
an illusion.

i'm ignorant,
i misunderstood.

Museo dela Parroquia de San Miguel

didto tapad sa simbahan
kilid sa halukanan sa imahi
ni San Miguel ilang giyagyag ang tinaguang
mga butang sa kanhing mga pari
nga gadumala sa maong simbahan
ug didto si lola Nicolasita Pangan
ug ang iyang igsuon nga si Eugenia
puros mga kanhi magtutudlo
nga miabi-abi sa mga bisita nga misulod
niadtong ganghaan nga karaan
ubos sa dako ug karaang kombento
ilang gipakita ang mga bulawan nga mga
gamit sa kanhi mga prayle sa panahon
pa sa mga kastila nga binayaan na ug
karon anaa hayag sa mga mata sa mga gustong
masayod sa mga istorya luyo niining
mga reliko nga anaa alang kanimo ug kanila
nga hina-ot dili saypon sa pagbisita
kay gapaabot lang sila.

didto sa simbahan sa San Miguel

gahapon lang kadtong nanagkot ta
sa simbahan sa San Miguel sa Argao
kay atong gisaulog
ang imong adlaw nga natawhan,
pila palang katuig
ang imong naagian niining kalibutan
apan daw sa imo na kining
nasuhid ang tanan
ug karon dili kana ulitawo
usa kana ka hamtong nga tawo
adunay gipas-an nga reponsibilidad
nga dili lang dulaan sama
sa mga gasa nga imong ampingan
karon buhata ang tanan
haron imo kining ipreserba
ug kung mahimo
himua kining bag-o
bisan sa paglabay
sa katuigan, ayaw kini pasagdi
ayaw kini ipadaplin
bitbita gihapon kini
bisan sa imong pakig-amigo sa lain.

ang dulaang helicopter

daw bayaw sa langit
kadtong imong gasa kanako
nga helicopter
nga gipalit mo sa Gaisano Carcar
nga bisan ug dulaan
apan mao kadto ang timaan
nga imo akong giuban sa himayang
ikaw lang ug ako ang manag-uban
ug nga didto atong gi-usab
ang pulong nga gugma
ug dili lang diay kini usa ka pagbati
apan usa ka dalan alang sa matuod
pa unyang mga pagbati sa
dili matukib nga umaabot
nga gibati ug walay laing
mutuki niini mao lang kita
kay kita lang nasayod sa dalan kung asa
ug diin nahimutang siya nga atong gipangita
ug kita gibayaw didto sa himaya.

kontrata

nibaya ako dili tungod kay
gikalimtan ko ikaw
ikaw gihapon ang ania sa akong alimpatakan,
sa akong dughan, ug dili na kana mausab
bisag mausab kaman
ikaw gihapon
ang akong hapuhapon
sulod sa imong kahuyang,
ug sa imong pagbangutan,
kamingaw ug diha sa imong pagsadya
unya sa imong lunhaw nga mga adlaw,
timan-i lang kadtong akong gisaad
gipermahan nga hangtod sa hangtod
nga ikaw unungan ug ubanan
kay dili lang kadto papel
dili kadto usa lang ka kontrata
kato mao ako ug ang matuod kong gugma.

the sun and my greetings

i called the sun
to rise for you today
please come out
and check without a doubt
he's there in your windows
peeping for your glance
for i let him bring
my kiss so sweet
and a hug of a warm greetings
that's for you my love
hope it will bring you
the smile that i want from you
to start the year and the day
oh, so special.

ang pagpaabot

alas dose sa kaadlawon,
gahulat ako'g nagsiga
ang akong mga mata
pila na ka gatusan ang akong naihap
sunrays, ceres ug bb gemma.
apan asa na ka na?
wala sa gihapon,
wala gihapon ka nahauli,
naabot nalang ang takna
ala una, alas dos
hain ka na?
nahakatulog akong naghandom
sa imong pagtugpa
dinhi sa akong handurawan
ang akong mga damgo
ikaw lang ang giliminan
hain ka na?


hain ka na?
akong sugat pangutana
sa akong pagmata, akong nakita
ang bakanting luna
dinhi sa akong kama,
wala ka pa, wala naha-uli
apan wala ka nagrason kanako
o miski man lang nag-istorya
misidlak na ang adlaw
apan wala ako makagusto pag-atubang kaniya
wala dinhi ang akong kusog
anaa lang kanimo
apan wala ako masayod
kung hain ka na,
intawn pauli na,
gihandom ka niining akong
gamayng luna
sa landong sa akong kasing-kasing
hain ka na, walay kahimutang
kining kasing-kasing, hain ka na?

naabot na ang kaudtuhon,
milandong ug mikisdom na
pagsugod ang langit,
gisugdan ko na pagsugo ang
hangin, tubig ug yuta nga sa ilang
paglupad, langoy, lakaw
sila ang unang nasayod
sa imong nahimutangan
hain ka na akong hinigugma
pauli na intawn, ania kining imong
pinuy-anan gihambin
ang imong matuod nga lalin sa gugma
misugod na pagpangatagak ang akong mga luha
sama sa nawad-an na ug paglaom nga langit
nga karon gitakpan na usab sa iyang mga dag-om
nga miduyog kanamo ni dodong
nga karon mitawag, milakbit nausab
sa iyang pulong nga mama, mama, mama.

ug bisan karon nga ania ka na uban kanamo
nisamot ang akong mga gagmayng
turok sa pagduda, nisamot ang paggitib sa
imong mga aping ang pahiyom
nga dili pagmahal kundi ang gugma sa lain
ug nangutana ako sa makadaghan
hain ka na akong pinalangga?
pauli na balik nga ri kanamo
nga matuod nimong pamilya.