Ang akong para-iso

salamat sa akong inting gamay
nahatagan nako ug hustisya
ang akong pagkababaye
ug ang Ginoo nga gaingon kanako
nga pagdaghan, paglipay
didto sa imong gamayng para-iso.

Ang akong Inting gamay

kalipay ko baya sa talidhay
sa katawa ni inting gamay
dihang akong gihagwa
sa iyang gihigdaan
dayon ug lit-ad, lit-ad
muutong-utong, hiko-hiko,
tiyan murag balod ga uyog-uyog,

kalami niya nga paminawn
daw sunatang gakukatawa
sa akong duha ka dunggang
napuno sa alingog-ngog
sa sing-al sa serbato sa mga jeep
didto sa syudad nga walay
laing hinagughob
kundi ang kangil-ad sa
walay puas nga kalangas.

wala na tuhui

mibangon ko sayo ganihang buntag
akong tiyan gahibag
sa kasakit akong nawong gaping-it
ug nangutana ka ug naunsa ko
mitubag ako nga walay kaso
apan miinsiter ka
buot nimo nga tubagon tika
bisag gamayng problema
gusto nimong makahibalo ka
kay lagi managtiayon ta
ug usa ra kintahay ug maunsa ko
imo ra gihapon ang kargo
apan kining dili ko anad
mag-uistorya sa akong problema
maong nitubag ko
kaututon ko
ug unsang bakukanga nga
nasuko hinuon ka
kay dili ko mutug-an sa tinuod
kung nahigugma pa ba ko nimo
ug pakiglambigit nalang ang ako
respitar haron ingon
apan diay ang tinuod
duna nakoy laing
gikabuangan unya
gisumhan na ug sud-ong
sa imong nawong
maong nagkulismaot
niining sayong kabuntagon,

ug unsang pagka-unsaa
kini hinuong musulti ta
dili nata tuhuan sa atong gisulti
hayman bitaw ug mamakak ko
muhilom dayn ang tunto
labi na gyud kung ingnon nako
nga siya gwapo mura ug si Piolo.

Maldita kuno ko

usahay makapangutana ko
sa akong kaugalingon kung
maldita ba kaha ko o tinunto
lang gyud tong giingon sa akong
kaubang maestro
mura kuno ko ug aders
dili makialam sa palibot
dili manginlabot
bisag mutuali pa ilang lubot.

tingale sad ug maldita gyud ko
unsa sad guy ako,
nganong manghilabot mako nila
unsa masay makuha nako
bisag kapila pana magisi ilang baba
ila ra na, kay ako gahimo ko sa ako
gawas pa wala ko gapangayo
intawn kung gapasexy ko
ako man nang hinaguan
gawas pa mao man na ang tinuod,

unsaon pud
sila gahinay ug padako sa ilang tiyan
apan nanginlabot ba ko?
unsay ako maayog akoy
gapakaon nila,
uroy ug panghilabot nako
bahalag muingon pa silang
strikta ko o maldita
o bisag epokrita
dili nana ila
gabuhat ko sa ako
wala ko nagdisturbo miski kinsa
gawas sa usa,
ikaw nga gabasa.

Ang Computer kong gasige ug ka-hung

unsa pa kaha nga istorya
ang akong himuon
gikapoy nako ug duk-dok
aning akong computer
nga pesti kagubaon,

magsige lang ug ka-hung
murag ang wala mahumang
bugno sa mga bayot didto
gabii sa basketbulan
nga galinabnutay
sa ilang mga buhok nga kulot
nanglapas sa badlis
sa dakong wanang
sa basketball court

kanus-a pa sad kaha mahuman
ning akong paghinay ug paminaw
aning kanta sa akong bisita
nga walay puas ang sing-al
murag maayong mukanta
feeling Robie Williams
animal maayo pa
muunga among baka.

kabuang

usahay malingaw bitaw ko aning
kabuang sa mga Noypi usahay,
murag amew,

kung imong ingnon mamahaw
day'g palugit ingon busog mako
bisag kakaunon na gud to,
napay uso

murag tuso mangagda
unya masuko ug dili ta
karon nga ako nasay
muingon mangaon
ang piskot, sige sa'g paigot
murag tuyang wala pa mahulbot
hastilan bantay bitaw ug makuyapan
unya mudagan nako ug magpakitabang.

Ang akong estudyanting espisyal

gilisdan ko sa akong estudyante nga
faets~ hilas kaayo murag gwapo
dili muapil ug exam gusto sa'g espisyal
kay init kuno kung daghang kauban
agay unsay gusto? kanang adto mi sa
lugar ni St. Nicholas?
maayo kaha didto kay way puas ang ice
apan dinhi sa Pilipinas,
asa kaman intawn kitag lugar nga bugnaw oi?
sa akong kalagot akong giingnan
nahala take ug test ikaw rang usa
sulod sa ref maayo didto bugnaw
wa kay kompitensya.
hayna man? niatras ang buing
dili nalang kuno siya
basig mutikig, mukaging ang iya,
kaingon pud ko, mayra unta.

gamayng paraiso

ang akong gugma lahi
samang ako lahi nila nga imong
gipanag-ig kanako
dili ako sila, kung ila kang biyaan
ila kana, dili kana akoa
pakaslan ko ikaw
hangtod sa akong pagpanaw
niining atong gamayng paraiso.

Ang walay utlanang kamingaw

Ingnon taka, nga wala kay sala nako
ayaw pangayo ug pasaylo
ayaw ug luhod
ayaw ko yukbui
dili ako ang Ginoo
nakasabot ako kanimo
ug may kalibog man ako
ayaw ug kabalaka,
normal lang kana
usahay labad gyud nang atong ulo
basin karon nitukar lanang imong
migraine nga dugay na kaayo
basig gibulagan ka lang sa imong uyab
o basig wala ka lang bayri sa
imong mga utangan
sagdihi nalang
ang akong pasensiya
ako kining lugwayan
gawas pa
wala kini galatay sa pisi
nga pweding may kinutuban
iyang giubanan ang kutay
sa imong luha ug kamingaw
nga naa sa imong dughan.

sulat alang sa usa ka amo

Mahal nakong Amo,

Nasayod kung wala kanay gipangayo nga lain
gawas sa pagsabot sa usa ka binuhat nga walay kaping kabubut-on
ug dugay nakong nasayod ana, hagbay ko na kanang nahibaloan
sa una palang, kahibalo na ko. Sa imo palang kinataw-an, labi na niadtong
nakighagit ka ug dula, hagwa kanako sa imong nataran,
tungod kadto sa kamingaw nimo, kay wala nay si bisan kinsa
nga nidapig sa imong pagka-ikaw, kahibalo sad ko nga nagbasol naka
maong ania ako ug ayaw kabala, kuyugan tika isip akong higala,
hinigugma, ug bisan imong kaisturya sa panahong ikaw nag-inusara,
maminaw ako bisan pa sa mga palihug ug sugo mo kanako.

nagmahal nga iro,
Browny

Ako kana ug dili ko na kana usbon pa

ganahan ko usahay
sa imong mga pagpanaway kanako
ikaw na tingale ang may dakong gikasaway
diri kanako, apan salamat niana
wala ako makahibalo niana hangtod
nga ikaw nahibalag ko, miski sila nga akong
mga unlan, ug habol, miski na gani ang akong
mga sapot, wala masayod nga ako ingon
sama sa giingon mo, bulahan ikaw nga nahibalo
salamat kaayo, apan ingnon tika
wala akoy plano nga usbon ko ang ako
ako kana, ug dili mahimong laing tawo
kung may nahigugma kanako
kana mao ako, ug dili ako magpakaaron
nga magtutudlo bisan usa lang ako ka tinun-an.

Higala

sabton ko ikaw,
tawo usab ka, ug dunay imong kina-iya
dili kita susama, tungod managlain
ang aton kagikan, ikaw tingale
adunay kaadunahan ug ako adunay
mga kapakyasan, dili kana ang hinungdan
nga mahimo ka nakong uban, kaibigan o higala
sa akong pagpakabuang dinhi niining kalibutan
dili tungod sa unod nga mao lang gyud ang imong bulok
apan kanang mas labaw pa niana
kanang ang adlaw unya musaludo
ug muyukbo sa imong tiilan
haron ikaw ibayaw dinha sa imong truno
nga imo lang gyud, walay si bisan kinsang muilog
bisan ang antwanga mukatawa
ug mamula ang lamurok niyang aping
kay ang imong mga awit
anaa gidala-dala sa mga hangin.

Si Piolo nga akong amigo

akong pasidungog
alang kanimo nga usa ka adlaw niana
akong giidulo, sama ka ni Piolo
imong aping lamurok kaayo
ang imong kagawapo
dili hintupngan apan
dili ako si Judy Ann nga pwede
nimong kaibgan, nasayod ko ana
wala ako magdamgo, wala nagdamuraw
wala sab na sa akong laraw
usa lang ang akong gusto
angkunon mong higala mo ako
malinawon na ako
igo na kanako ang akong
kagawasan sa akong pagduk-dok
ining akong computer
nga hawod mupatik
sa akong mga nagkalibugay
na nga mga huna-huna,
dili kana ang ako
tawo ako ug may kalipay usab ako
apan dili kana ikaw, ikaw
lang tingale tong nipakatawa
nako usa kaadlaw,
apan dili sa tanan gikan nimo,
aduna pay laing naglingaw kanako
dili sila mga nobela, labawng
dili sila ang mga walking encyclo
sila labaw pas Psycho,
tingale, nalahi kalang
ikaw kadtong Piolo
nga pihing ang ulo.

Ang kalubihan

tingali ang kalubihan
dili lang na usa ka handurawan
siya mao ang kalubihan
nga ania sa tagsa-tagsa
nato ka mga dughan
siya nga mudala kananto
palayo sa laing lungsod
nga napuno sa kaalimuot
ug sa mga hinagubhob
sa mga serbato sa mga
nanglabayng mga sakyanan
pribado man o dipasaheruan
dinhi dili nato handumon ang kadautan
dinhi atong ibutang sa kapahuwaan
ang atong nagbangutang kaugalingon
dinhi nato batunan
ang atong kalinaw
nga wala didto.

Ang bisaya nga pinulungan

wala akoy laing ikaingon
mao kini ako,
ako kini,
ug ako kining panggaon.

Ang pagkahiluna sa tanan

maayo nalang
unta ug wala ka mutuo kanako
maayo nalang unta ug
lain lang ang imong sabot
sa akong pamalak
hinaot lang imo kining kalipay
nga bisan sa akong pamakak kanimo
aduna pud tingaley
matuod nga sitinta porsento niadto
dili nalang tanan bakak,
dili nalang tanan usa lang ka balak
bulok kini kanako
ang buhaton kana
haron ubsan ang kainit
sa imong hilanat
i-inom kana ug paracetamol
basig sa imoha lang kanang kakapoy
kay giingnan ko bitaw ikaw
nga dili maghago
ug dili palabian ang pagpangahoy
igo na kanang naa sa abuhan
ayaw na huna-huna ang
sa sunod adlaw
iya na usab kadto nga bulok
unaha ang karon
puy-an ta karon
ug kini ang atong atubangon
sakto na ang plano
usa-usahon ta kini
ipahiluna sa tagsa-tagsa nila
ka mga banggera diin
ilang mabatunan ang ilang
pagkahiluna.

Ang plano nga ako nang itugyan Niya

maayo lang unta ug iya kong paabuton
didto unya sa Sambag, didto ako mukawas
unya sa alas dos sa kaadlawon sakay sa Ceres
nga "first trip", kalipay ko nalang kay
aduna nasab akoy upat ka adlawng bakasyon
ang akong boss nga koreano mibalita kanamo
gabii nga duha ka alaw ang holiday sa Korea
sa Lunes ug sa Martes,
New Year didto~
busy sila kaayo
mga estudyante mangadto usab sa
tagsa-tagsa nila ka mga probinsya
didto sa ilang mga katiguwangan
muhatag ug selebrasyon,
ako sag ba kaha mag selebrar
sa ako unyang bag-ong tuig
bag-ong kinabuhi,
mu-absent ko sa Lunes sa akong
laing eskwelahan, kay akong
pahimuslan ang usa nako ka tunghaan
haron nalang pud akong matumanan
ang akong kapikas nga atua
gapa-abot sa akong tubag
sa akong pagtando
sa iyang mga hangyo,
wala na gyud tingaliy
angayang buhaton pa
gawas sa pagpaanod
diha sa Iyang kagustuhan
ako nalang tingaleng undangan
ang mga plano,
pasagdahan ang Iyang pagbuot
dinhi kanako, dili kahadlukan
Siya lang ang akong saligan pa
dili nalang ko muplano
basin dili unya ni nako
hikapalgan ugma
didto sa unahan
unya ang hago mawad-an
na hinuon sa iyang kapuslanan.

Ang gilaay nga gutlo

wala nako kasayod sa akong
isulti, gusto nakong hubsan
ang akong nagbaga nga huna-huna
gaaso-asong mga kalag
katagbawan sa akong mga tudlo
diha sa pagpamalak
sa matuod nga mugna,
unsaon ba? dili na malitok pa
dili ko na mahimo,
tingale galibog na usab ako
maayo nalang tingaling
maghinuktok una
haron dili na madakin-as ug
masayop ang balatian
aduna pa baya akoy
pangandoy nga muadto didto
sa unahan nga ako unyang gakson
gimingaw na pod ako niya,
siya nalang gyud tingale ang nakasabot,
siya nalang gyud tingale ang nahigugma nako
midawat bisag karon giayran sa tanan
mura ug bahaw nga dukot
apan siya nalang gyud tingale
ang mukaon kanako
ang muakon ug bahog
sa iyang bahawan
unya paris sa iyang utan nga law-oy
nga unya iyang iprepara kanako
didto sa among balay sa bungtod
didto adunay kalinaw ang hangin,
walay balod nga makita
wala usab akoy madungog
nga serbato sa mga jeep ug bus
nga karon ania alingug-ngog
sa akong duha ka dalunggan,
hay~
kanus-a pa ba ko makapauli
pila pa ba kaoras ang akong paabuton,
pila pa ba kagutlo
ang akong agaron
nga karon gapiyad
daw sa gilaay usab.

ANG KWALIPIKASYON SA GUGMA

Kinsa siya nga angayan sa atong gugma?

Kinsa siya nga adunay hingpit nga kwalipikasyon
haron matawag ta ug angayan sa atong bulawanong gugma?

Aduna naba diay pinili ang gugma karon?

Mulantaw na ba diay siya sa graduhan,
ambungan, adunahan, adunay ikasarang ug
nga taas ang salabutan?

Kung mao, unsa man diay kadtong gugma
nga iya sa tong Ginoo,
dili ba diay kining gipaambit niya kanato?

Ato kanang ipangutana sa atong kaugalingon
basig kita mismo mihanig na sa atong mga
kwalipikasyon sa tawo nga unya atong
pasudlon diha sa kwarto sa atong kasing-kasing
kay siya ang madawat ug dawaton
dili kadtong bulingit, giagit-it,
pangit, ngil-ad ug batasan, daug-daugan,
salbahis, kawatan, kabos, buang, bakakon,
nga angkunon ko AKO kadtong akong gihinganlan
sa unahan...

Ikaw sa imong pagkabakakon

Wala na kinahanglana
ang pagtinulisukay
dili na kinahanglan
patug-anon pa si Pulano
o kaha si Pulana
nga sila, sila ang bakakon
sila ang kusog nga mamakak.

ayaw hulata nga ikaw
unya ang tudluon anang
imong kaugalingon
diha sa imong truno
nga "chamber"
kung atong ingnon
dili ikaw eksimsyon
apil ka dinhi,
apil ka sa linya
sa mga bakakon
maong ayaw na kalimti.

Ang Truno sa Bakak!

ang bakak
bisan asa naa gyud kana siya
murag anino
bisan kinsa
bisan isug ka pa
usahay mutalaw pud gyud ka
ug dili mo malikayang
mabuka ang imong baba
ug ang espirito sa kabakakon
mudayon ug katawa
ingon daog napod ko
luoy sila dali lang silang
ilaron, gamay lang ganing
paila sa kasikas,
magtuo man dayon ug halas
maong kay mahadlok
man nga mamatay
diga, palaban
sa katapusang baraha
bakak, hari siya~
gikurunahan
karon tua sa kinatas-ang
truno sa impyerno

apan kinsa ang isug
karon dinhi sa atong pundok
nga mutug-an nga siya bakakon
siya ang unang nakapatumba
sa matuod nga bakak
nga ni bisan kinsa
milimis na sa ilang
huna-huna.

ako!

ako!

ako!

angkunon ko
bakakon ako
apan andam akong
makigbuntog
sa bakak nga walay
gahom unya
sa akong pag-angkon.

maong usbon ko,

ako!

ako!

ako!

DAKONG

BAKAKON!

Ang kapildihan sa pakiggubat

dugay nakong nangandoy ug gubat
kanang gubat nga walay mga bugtong ugat
gusto ko anang gubat nga pa-igmatay sa mata
dipindi lang sa mu-surinder na,
malibat kay hanap-hanap na
gamitan ta sa kinatas-ang lapis
kanang dili maupos, hangtod mga hipos,
kanang tinalhan ug talinis
nga bisag ilugit gawas sa badlis
mubaliad lang kini ug muiyak
muingon nalang undangon ta
ang gubat dili na matabang
walay medic, hadlok ko kuyapan
akong kuntra, atakihon unya
sa iyang alta-pression
o kaha sa iyang iyang pus-on
ug muduko paingon pauli
sa sekretong lim-aw
nga mingaw unya mangagho
"hay pildi ko".

Ang panimalos

nakabalos ko sa kong kaaway
niadtong elementarya pako,
niadtong hilumon pako
ug dili mutubay ug away
kay lage walay ikasarang
basin unya ug panitan,

kaganiha nahibagat nako siya
ako siyang gitawag
unya nangutana ug naunsa na siya
ang animal, gahugas nalang diay ron
sa tiil sa iyang asawa
faets, under 'd saya
"henpecked" kung sa Ingles pa
animal kaayo
kaniadto,
tanang babaye yano lang duklon,
itukmod, unya bugal-bugalan
karon usa lang ka sit-sit
mura na ug kuyawan,
magkurog, mawala ang itlog
faets, maayo nalang diay
kung magpakahilom sa una
unya mubalos kung makapabor na.

Ang lolo nako nga tua sa tate

Pagkalingawa hinuon nako rong adlawa
naabot ang package sa akong lolo ganiha
presko, lab-as gikan sa gawas
walay labot sa balita
ang akong lolo nagaod
sa iyang katre dili na kabarog
kay kuno diabetic,
hinam-is man lage kaniadto,
walay sipyaton basta makaon
tunlon hasta panit
paet,
karon bisag tunulan pa ug kendi
asa mudawat
hadlok pun-an iyang pangag.

Ang salidang Bedtime Story

ikaw ra bitaw miingon nako
nga dili lang ta anang seryuso kaayo
kana lang salida nga alegre
kay gusto kang mukatawa
misugyot ko
kanang bag-o ni Adam Sandler karon
"Bedtime Story" ang uluhan,
unya midumili ka
dili ka gusto niana
kay para lang kuno sa
mga bata,
nakalimot pud ko
tigulang naman diay ka
hahaha
ug bata pasad ko.

Ang akong lolo

Hazta nakong lingawa
akong lolo
akong giingnan
nga baho na siya kaayo,
gisugo nako ug kaligo
kay layo na kaayo ang pangalisbo,
mikatawa lang ug dayong tubag
ayaw ko anaa apo,
dili ko bugo kabasa pako
ug dyaryo,
dili lang ko anang
inyong kabilyako...
hahaha...
tigulang na gyud diay
hastang bungula na...
mailad bisag gamay rang isturya
layo rata ana oi...
abi ba nako
ug walay seryusuhay
mubigay sab diay...

Ang akong balay

ang balay namo didto sa bungtod
ako nang gipaandam
sa akong buotang kapikas
aron amo unyang kabalhinan
iya nang gihulipan,
ang mga nanihag nga atop
na kung muhangad
kita naa ang kaanyag sa kalangitan

gipanday na ang hagdan
nga tuya-tuya na
tungod sa kakaraan
dili siya gustong
mabwasot ako
ug unya makuhaan

iya na usab nga gitukuran
ang busaog nga naghuya-huya
sa kagabok, agi sa mga
nangaging bagyo
dili napod tingale
maihap kini
apan mibarog
sagihapon
nagmadaugon

apan ako na pung giandam
ang akong gahuya-huyang
kasing-kasing
didto unya sa akong
bag-o'g, daang sugilanon,
ako ba kaha mulungtad
sama nianang karaan
nga balay
nga amo unyang
pandayon
sa gugmang
dili pa garantiya
sa among kaugmaon
ugma damlag puhon.

Piccolo

katam-is sa imong giingon
gakaon ka
ug gatam-os ka sa
imong kan-on
maong wala ka ganahi
ug tingog
kasayod ko
ingon ka gyud niana
kaniadto pa
bisan gamay paka
niadton gaidad kapa
ug singko anyos,
niadtong
mangihi kapa
sa imong
purol,
ug mubaha
man gani
ang banig
nga inyong
gidulugan ni
Nanay nimo

apan dili
kadto sayop,
ang akong gikabalak-an
mao ikaw karon
bisan na
sa imong pangidaron
aduna kapa
gihapoy
pagka miron
nga bisag imong
uyugon, tawgon,
pamathon,
papamahawon,
mudukot
lang gihapon
diha sa
imong banig
nga daw
sa gigaid
dili mabad-bad
bisag pabuthan
pa nimo
ug piccolo,
pait kaayo.
unsa nalang
kahay kaugmaon
nimo.
ikaw naa
ra gyud na
nimo.

5 ka gibati ko karon, akong usbon

1. Gihigugma
2. ko
3. ikaw
4. dili
5. tiaw.

Ang mansanas

dili ko buot
nga manghagad aning
akong gikaong mansanas
kasayod ko wala ka musalig kanako
nahadlok kang mapariha ni Adan nga
gisilutan sa langit ug mag-antos sa tumang
kaguol, ug kapait nga malayo sa sabakan sa
matuod mong gigikanan nga mao ang Amahang
naa sa langit, ang Diyos nga magbubuhat nimo
ug kanako nga karon mitunol ining usa ka
bul-og nga ikaw ug ako lang ang nasa-
yod. Dili pud tingale nimo gustong
mamatay, kay gusto mo pang
magpakabuhi kauban ang
imong nanay ug tatay
nga isog kung
masuko
ma-
m
u
n
a
l.

Ikaw ang nasayod

ako sang gihinuktukan
ug balik
ang akong giingon nimo
ang ako untang pagdawat
sa gihangyo nimong
pakaslan ko ikaw
nga sukad pa kaniadto,

apan ang karon,
wala ko na
ipangagda,
ang ako lang
gusto ko,
nahigugma ko nimo,
bahalag gusto ka ug
dili,
bahalag
idayon mo ang kasal
nga imong gipili,
wal koy
gipaabot,
wala koy
angayang
paabuton
ikaw
imo
pud
na.
imo
nang kaugalingon
ikaw ang mas nasayod.

Ang iyang gusto

gihigugma ka niya
sa iyang wala pagkasabot
kanimo.

sagdihi nalang
mao kana iyang gusto
dili siya ang babaye
nga gusto ug han-ay
dili siya angay sa balay
gusto niya
ang magbad-bad
sa tugot nga sanggungot
samang tugot
nga gabaid sa iyang
gibatonan nga pasensya
kanimo
karon
nga
anaa
bag-ang
niya.

Ang bugno

lisod ba sabton?
ang akong katulugon
nidaog nako sa akong
kagabhion
apan, ang akong gugma
sa akong balak
hangtod karon
wala pa midaog
sa iyang bugno
ngari kanako.

Ang sanggumot nga tugot

dili kinahanglang maglingo-lingo
dili kinhanglang maglibog
pasensya,
nisamot akong gana
pagtan-aw palang nako sa akong tugot
sa akong tabanog
nga daw sanggumot nga buhok ni mama
nisamot ko ug katawa
nisamot ko ug kahigugma
aduna pa diay akoy
pweding gamitan
sa ako unyang huna-huna
nga galaay na.

Ang pagsabak

Nalipong ako ganihang buntag
mabdos ako sa sulod
sa akong huna-huna.

ang pagbalik sa hangin nga wala mubiya

kumusta kana dinhi
sa imong lim-aw
nga puno sa kasadya?
ug kumusta na ang mga baki,
ug mga haluan
nga may kalipay
sa pag pakigbaiid
sa imong mga bato?

ania miduaw ako,
wala ka ba diay masayod
ako ang hangin
nga sa maka-usa
wala mibalhin
milurang man ang akong mga bagyo,
apan wala ako mahanaw
kay kung himuon ko na
mahimong mag-inusara
ang imong lim-aw
mangamatay
ang imong mga sagbot,
baki ug haluan,
maong bisag nilurang
na akong bagyo
wala gihapon ako mibiya kanimo
kay ania ang akong
mga hangin,
nga gipaburot, gidulaan
sa imong mga haluang
gadula-dula diha,
nianang imong
mga mugna.

Hari saludo ko nimo~

Tuba alang kanimo!
naka usa ka gatos ka na diay?
maayo kapa
ako pastilan, pwerte
pa gyung layua,
ania pa ko sa ika-kinse ka kilometro,
apan bisan pa wala ako magdumili
sa pagpadayon sa akong
mga lakang
abton ko nang imong
nahimutangan
ugma, sunod ugma
kinsay nasayod?
mas-igmat pako nimo
haha~ hambog...
lisod na...
hari naka...
rayna ra ko...
peace nalang tayo~

Peace~

kahibaw ko galantaw ka...
iubos taning atong garbo,
fair play, walay hari natong duha,
puro ta rayna, samanz
haha~ marika dayon,
ayaw ug ukon-ukon
kay mabdos ako
dili kana maayo,
dili pa ko gustong magbati
ug tulo ka semana
sama sa una, Faetz
bitaw ako nang iwara-wara
ang puti nakong panyo
undangon na nato ang gubat
sa israel ug palestina...
kapoy na ug panap-ong,
nabungol nako sa kahilom
ug gawas pa, mingaw nako
ug hagwa sa imong iring
nga gibidle,
dayon baya to ug sulod
sa imong lawak
bisan adunay mga miron,
peace~
smyl nalangbe~

Ang wak-wak nga utro

nganong mahadlok kaman?
dili ko ikaw kaunon
ug labawng dili ko ikaw tupsan
haron mahurot kanag imong
dugo kay dili ko ungo,
nawak-wak man tuod ko
apan dili sa unod
kundi sa akong pagpamalak
ayaw kahadlok
walay makapatay kanimo
walay si bisan kinsa
nga pweding muhilabot
kay si kinsa man
ako siyag lubagan sa iyang
singot, agay, ilabay kanang
imong kahadlok
dili ako anananggal
mukaon lang ko ug binangkal
samang binangkal
gahi, gusto sad ko anang gahi
sama ka gahi sa imong
mga bato nga gipundok
sa imong tugkaran,
naka-uyon ako
dili lang ko mutug-an
unsaon, ang ungo
nagsiga ang mata
ana sa atop,
galantaw, gustong mutukob...
apan ayaw kabalaka,
dili kana siya makahasmag
anaa kay lana wa ba?
ug gawas pa gwapa
ang gusto anang ungua,
dili gwapo sama nimo,
maong sige katulog na
unya pagdamgo,
kay adto sad ko,
kita lang niya ta didto,
gimingaw nako
sa akong pakig-away,
sa akong pakig-indigay
sa wak-wak nga utro.

ang akong lawak sa pag-inusara

nitan-aw kana usab kanako
unya mitutok, nagpanlad-ok
samtang ako sa gihapon
nagduko, nagpakahilom
dinhi sa akong kaugalingon
akong giablihan
apan gitabunan ko ang bintana
sa kurtina nga pula
akong gipakita
nga ako ania na sa akong hinigugma
ug sa dili madugay
mulangyaw kami
didto sa dapit
diin amo ang tanang kahigayunan
amo ang tanang katawa
ug ang mga paggakos
sa among mga damgo
mao ang akong gipaabot
apan bisan pa,
ayaw kabalaka
pasagdahan tika
diha ka lang
balikon tika sa panahon
nga mahuman
ako sa kong tahas,
kay ikaw ang akong panimalay
ikaw ang hulagway sa akong
pag-inusara, ug sa mga higayong
buot kab-uton ang mga panganod
nga mutabil sa akong mga
bintana, ug dayon lumos
kanako sa akong wala
hinsayring mga pangagho,
ikaw gihapon ang akong lawak
nga diin ako musalom
sa akong pagpakahilom
ubos sa akong balurong
mga adlaw, hinumdumi kana
kay hinumduman ko
usab ang ikaw sa akong pag-inusara.

Pasaylua

kasayod ko nga gihigugma mo ako
imo kanang giharana kanako
niadtong miaging gabii
niana ka pa gani
nga buhaton mo ang tanan
dili mo ako pasagdahan
imo akong pakaslan
dawaton ko lang
ang imong gipangayo
nga gugma kanako
bisan gamay
ikaw na mahimong
mupalambo,

namalibad ako
nakasayod ka
sa akong rason
dili musugot
ang akong amahan
tungod sa imong kagikan
imong uyuan
nakaluba na ug
lima
maong mipahimangno
kanako ang akong amahan
nga dili ko ikaw dawaton
kay basin unya
ako ang sunod nga lubaon
dili sila makatugot
nga ang gidangatan
sa lima ka giluba sa
imong uyuan
mao usab unya
ang akong dangatan

nasayod ko nga dili
kana saktong katarungan
nasayod ko
nga wala ikaw mahimutang
karon hilabi na
nga nasayod ka
sa rason ug nganong ikaw
akong giayran,
maong pasaylua
dili ko buot
nga masakitan ka,
ako lang gipaminaw
ang akong amahan
nga gatan-aw
sa akong padulngan.

siya nga naa sa imong kasing-kasing

gihigugma ko ikaw
kana ang timan-i
pamatia,
anaa siya sa imong
kasing-kasing
sutaa,
dili siya gustong mupahawa
gusto niyang magpabilin,
maong ayaw siya
ug pukawa,
pasagdihi lang
dili mo kana mahayan
ang pagpadayon mo kaniya.

ang akong pagpanghangyo

wala ako manghambog kanimo
nagpakiluoy ako
nagpa-ubos kay dili ako adunahan
nangayo ug pakitabang
nga unta imong tubagon
ang akong panginahanglan
apan sa dako kong kahingangha,
miyamiid ka, mitalikod
nga walay uistorya,
daw sa nakaminos
nga unta ako mang bayran
sa akong dugo
ang ako unyang utang,
dili ko man unta kini
talikdan, kalimtan
apan tingale gisulay
mo ako, gisuta mo ang akong
kaseryuso,
dan ingnon ko ikaw
nga wala ko magtiaw
wala ako magbakak
ang akong baka
nga gatasan
nasakit, nagluya
kay nagkalibanga
wala akoy kwartang
ikapadoktor ug wala ko kini
matabang
unsaon paman nimo?
nga karon bisan sa pagbalik mo
tunol sa salapi
nga imong ihinabang kanako
wala na kanay kapuslanan
kay atua na siya
tungod sa imong pagyamiid
gilubong ko na
sa kalibutan nga
puno sa kangit-ngit
ug dili na mubalik
bisan imo pa siyang
patud-an sa imong luha,
pagbasol ug bisan sa
imong paghinulsol,
ulahi na kini
busa kalimti.

ang adlaw sa pagtuki

sa maka-usa pa
atong matuki ang mga
pangutanang usahay maka
babag sa atong huna-huna
kanang babag nga usahay
wala nay maka-agi miski
bisan unsang katarungan
daw sa napuno sa gabon
nga kalangitan
daw tinakpan nga kahayag
daw sa kangitngit
sa banag-banag
dili maklaro, dili matuki
kay malisod mang tukion
apan bisan pa
nasayod kita nga wala tay laing
buhaton, paabuton ang
saktong oras sa pag-abot
sa sidlak sa adlaw
nga adunay kaisugon,
ang adlaw nga mao unyay
muiway sa panganod nga ali
sa kangit-ngit nga hinungdan
sa dili makita ang pagtuki
ang paghapsay sa naa sa kahayag.

ikaw

ikaw nga akong kapikas
ikaw nga akong paulion
ikaw nga akong kanunayng handumon
ikaw nga tag-iya niining
akong nag-inusarang kasing-kasing
ikaw nga buhi, hingpit
sa imong gugma
ug walay gihambin
nga pagduda, ikaw nga
akong pinalangga
ikaw ug ikaw
ako nang gikalawat.

Ang lamat

kung dagan ang hisgutan
dili na ta kinahanglan
mutan-aw, mututok
anang ilad sa usa ka litrato,
nasayod na kita niana,
lamat lang kana
nganong tukion paman
aduna kitay daghang
kinahanglang tukiunon
nga mas labaw, mas importante
mas interesante,
dili anang igkahuman
kita ang mga lipong
mao pay lipong nata daan
ato pa gyung usban,
maayong unya nalang
kung kita mga mabuang.

ang iro nakong askal

Aduna koy iro nga askal
akong pinalangga kay lagi
hinatag sa akong amigo
nga maestro sa central
espisyal, pinakaon ug
dogfood nga kinilo
bisan mahal sige
basig mo gwapo, maibgan
sa silingan nga taas ang breeding
gi-training sa mahalong
tunghaan, palukso-luksuhon,
layat sa holahop ngapula
murag buang,
hay~ pagka... kanus-a pa
man kaha ta makamata nga
mas labaw tang giduwaan
sa atong binitay sa tunga.

ang drama nga nag-uluhan "ayaw nalag palag"

nitan-aw ko gabii ug gubat
ambot ang istorya
kay si gulayat nga gitule
pag-usab sa sigbin, toinkz
hastang ahaka...
kulbahinam
mura'g naminaw ko ug drama
sa DYHP
ang istorya mura sad ta ug makatawa
kay ang sigbin
nga gapuyo sa karaang mangga
manuli man sa mga pisot pa
nga mga batang muagi
unya kang gulayat nga na-aan
nga wapa natahali
kay ingon man lang lage ug sili
maayo pa man ganing sili halang
ang kang gulayat
luyat na man diay
dili na masubak sa
utang sa tinunuan, patay.

ang manginhasay

hastang buanga matulog na unta ko
apan sa kalit adunay nihagsa,
bato sa among atop,
ingon sa akong ugangan
gikan sa among silingan nga nahubog
naka-inom ug usa ka galong tuba
toingz~ saonz~
mao nana kung muinom isulod man
sa huna-huna dili sa tiyan
nga unta tigulang naman
hay pastilan kalibog ko baya
manghagis murag dunay
ikasarang, mangdukdukay
ra raba ug sisi sa hunasan.

Ang sirok ko nga amigo

nakahinumdom ko sa akong
amigong sirok kaayo,
pastilan kung mag-abli gani to ug sardinas
mudayon to ug kuha sa iyang bahaw
nga luto ug iyang ibahog
ang sabaw nga galana-lana pa
sa iyang kaugalingong mantika
dayon kumot-kumot
bisan walay panghunaw
kinamot
daw sa may kuntra
gadali basin ilugan
ug dili na unya maiya,
sirok gyud
pastilan kanus-a
pa kaha matuk-tuki sa iyang huna-huna
siya lang baya ang gustong
mukaon anang expire na
niadtong 2000 pa.

ang gigutom

miginhawa ka ug laom,
nangagho, daw puno sa kalagot
nga gaalintabo, dayon panghuy-ab,
huy-hoy sa abaga
patong sa imong suwang
diha sa duha mo ka mga kamot
kahimot ko bayang galantaw kanimo
abi nako itoy lang ang mag-ingon
hasta pud diay iro nga gigutom.

ang cactus nga akong gitutukan

bililhon ikaw
sa akong pagtubo
dinhi sa natad sa pamalak
ikaw ang bulak
nga kanunay
nakong gitutukan
ikaw ang bulak
nianang cactus
nga tunukon
bisan wala mabubui,
mabisi-bisi sa ulan
nga gadumili
kay dili siya buot musaksi
sa imong pagkadugta,
malumos sa iyang mga luha
diha sa imong gibarugan
nga balason.
migamot ikaw
maong ako mipadayon ug lantaw
sa imong mga bulak
nga daw sa mga prinsesa,
rayna nga gabatog sa imong agtang
hangtod nalang diha
dili nako muhimo ug lain
pang lakang.

Ang kaluha ug ang paghiusa

didto sa usa ka dakong hawanan
nakita ko ikaw
ug ang imong kaluha ug ikaw
natunga sa duha
nalibog ug nahingawa,
ang imong kaluha gihangop
ang paglupad sa
langit diin mulangyaw
ang imong kaluha
sa wala nay pagbalik
apan ikaw nagmasulob-on
nagpanglingi dili gustong
mukuyog, muuban
sa imong kaluha nga nagdali
paglupad didto sa wala
hinsayring luna,
sa kalimot, ug mibalik
ang imong kaluha mibalik
gibira, gibitad ikaw nga
milugnot,
mihilak, miligid
gustong mugakos
sa imong hinigugma
nga naa sa imong kilid
miluom, nanghawid
dili gustong malayo
kaniya nga imong hinigugma
nga karon aduna nay
puting brunda,
ug dayon singit
sa linganay sa kampana
nga anaa nipatong
na sa kinatas-ang bungtod
sa maong lungsod
haron pagpahibawo
sa tanang niadtong lungsura
nga takduon na ang iyang hinigugma,
usahon sa sing-sing
nga walay utlanan
gapuson didto sa balaod
ug grasya nga iya ra
ug dili matuis ni bisan kinsa
matuod, walay lilong
nasubo ikaw
hilabi na kadtong
kay hangtod karon
milayog ka sa gihapon
dili mo buot maabli
ang ganghaan
sa umaabot nga
panaghiusa sa duha
ka binuhat uban
sa iyang hinigugma
ug sa kalit giyog-yog
galinog gadamgo lang diay ako
naunsa ba,
damgo lang diay kadto
kaingon ko ug tinuod na.

si adonis

nakatawa ko nimo
intawn samag ikaw na
ang pinaka ambungang
nilalang dinhi sa kalibutan
mura kana ug nakatilaw sa tanang Eba
ug imo na silang napakaslan,
taympa usa, noy...
sama ka ni adonis
kunot na imong agtang
ug nabali na imong sungay
kay naputol sa imong katiguwang.

imo na ang kadaugan

ayaw pag-ingon nga nidaug kana
mahimong nihilom ko karon
apan wala ako matulog
abli ang akong
mga ilong ug dwanggan
abli sad hasta ang akong kasing-kasing
sa pasensiya...
dili tika tubayan
unsaon nalang ang imong dungog
kung kini mabahiran
wala na unya kay ikapanghambog
ug gawas pa maluoy ko nimo
dili na akong pagsaulog.