ang lunhawng kasagbutan sa Marso

ang asul nga mga langit nagsugilon
sa iyang kaanyag ug kalipay sa adlaw
nga mihay-ad sa iyang halapad nga
higdaan dinha sa kawanangan

ug ang adlaw misubang ug midupa
sa iyang kahayag alang sa tanan
isip sumbanan sa kalantip ug kahingpitan
sa init nga gugmang damgo sa tanan

binuhat ikaw ang akong gugma
ikaw ang akong simbahon, ikaw ang akong
ampuan dinhi ning altar ko nga puno
sa daw napasad nga bulawan sa mga bulak

dinha sa halapad nga kasagbutan
nga dayag ang kaadunahan sa pagbisti
sa kadaiyangang kaanyag sa mga idlas
nga mga bulak, mapino ma'g mga lagpad

ugma imong silang ilisan sa walay pagmahay
imo silang natilawan ug wala kanay planong
balikon kini pagtaon dinha sa imong
lunhaw nga dughan kay ugma lain nasad

ang imong gustong pabatugon, pakatayon
dinha sa imong kusgan nga mga bukton
nga sa gihapon bisan sa imong pangidaron
piskay pa gihapon ug sul-ob ang walay

katapusang tanyag sa paglaom
bulahan siya nga bulak nga ikaw nahikap,
naangkon bisan sa mubong panahon
ug mangalarag man diha sa kahapunon

ilang napuy-an ang silbi dinhi sa kalibutan
nga walay laing buhat gawas sa pagpakli
sa kada adlaw nga panid sa pagbati
sa imong mga istorya dinha sa imong
lapad nga dughan.

diha sa nataran sa imong gugma

lila nga mga bulak
nagpasad dinha sa lapad

nga salamin sa imong
asul nga langit

puti nga panganod
nanglugpad sa kahimuot

lunhawng mga sagbot
puno sa kaaghop

ania ikaw sa akong mga paa
nagpa-uraray sapnay

ug hawid ang akong mga
kamot nga sumpay sa imong

gipamati nga tumang kainit ug
buhi ang gugma diha sa tiilan

sa mibaliad nga bungtod sa atong
paglaom, dili ko damgo ang iyang katapusan.

hain ka na?

hain ka na?
nagmingaw ako
nahigwa-os ning dughan
sa imong pagbiya kanako
nahanaw ang bangaw dinha
sa akong langit nga giatubang

hain kana?
nahubsan na ang lawa
nga kanhi imong gipoy-an
gusto ko unta ang mutidlom
sa imong kahilom apan dili ko
maaninag ang mga palata ug ang ito
nga didto namasilong sa imong kaluoy

hain ka na?
ayaw ako paantusa
ning sayong kabuntagon
ikaw ang akong gininhawa,
ikaw ang akong hangin nga sonata
kanako dinha sa pagpakatarong.

hain ka na?
patim-aw kanako
bisan ang tingog nalang
sa imong mga dugdog ako kining
gihandom ug gipaabot didto luyo sa
bungtod sa atong kaugmaon nga kanato
saksi sa atong gugma ug paglaom.

hain kana?

Naglaway nga mga halo

nahimuot ko ninyong tanan
nga diri kanako nilantaw
nga daw usa ka halas nga mibalikos
sa usa ka bahi nga kawayan

unsa may inyo? wala ako magtakuban
dili ako susama nianang
inyong mga maskara
nga pwerteng bagaa

hagbay rang gilumutan
sa inyong paglunang nianang
pagpakaaron dinha
sa inyong nahimutangang

kunuhay katarong
apan kaayong italidhay
kamuritsing pud nang inyong
mga dagway nga walay himol

lakra pa ang ata
nga inyong gipanihapon
nga wala'y kukaikog sa inyong
pagpunay ug lantaw kanako

nga daw nagpanilap, naglaway
nagdahom nga ako mahulog
dinha sa inyong mga kamot
dili mahitabong ako manaog

wala ako magpangayo sa
inyong mga ginagmayng kaluoy
unsa say ako busog pako
kagabii nakatulon ko'g usa

ka dakong manok didto
sa pinsa ni Mang Juan
ug karong mipahulay lang
apan kung inyo kung hagiton

sa inyong pagpunay ug kuhit
sa akong pagpakahilom
ingnon ko kamo, bisag ako busog
respetaran ko kamo pagtulon

ug iipon ning dia na karon sa akong
sabakang gabulan, takdol
ug nagkaduol ang iyang
pagkahimugso dinha sa inyong

gipanghambog nga nataran
pwede ba kahang mutalidhay
pag-usab kataw-anan kamo
nga walay pupamilok

sa mga balak ninyong tulisok
sa tawong nagpakatarong,
nagpakahilom wala man
gani mo'y kaigog dili nalang

hinuon mo maghikog
kay ako ang mulubong
ninyo dito sa akong gitukod
nga gamayng minteryo

sa inyong sinakong pangagho.

ang bulan ug balilil-an diha ubos sa bungtod

pagka-anindot sa kagabhion
hayag ang buwan nga naghayang
dinha nianang iyang humul-humol

nga panganod katre nga naa taliwala
sa iyang lapad nga kalangitan
nga giiwagan sa kahayag
sa nagkidlap-kidlap nga kabituonan,

apan mas maanindot unta kung
adunay niuban niya dinha
ug muhayang diha sa balilil-an
sa tiilan sa nibaliad nga bungtod

nga nagpaganyar sa iyang
kurbadang dughan
ug mga kusgang mga bukton
nga naglantaw sa bulan nga

mipahiyom lang sa gamay
isip pasumbingay sa imong
mga balak nga hangtod
karon wala pa sila nag-uban

hangtod lang sila sa ilang
mga pangandoy nga walay
gilauman nga matuman unta
karon ning kamingawan

apan unsay mahimo sa bulan
dili siya angayang idat-ug kaniya
dinha sa iyang balil-an
duol na ng iyang pagtakdol

ug kung muabot kana
managhan na ang mga bituon
mutubod ang luha sa iyang mga panganod
nga subo palandungong

nahigugma kini sa balilil-an nga naa
dinha sa ubos nagyangod
nga wala nibati bisag gamayng kakapoy
tungod sa ilang matuod nga gugma

nga sila lang duha ang nasayod.

unta, unta, unta

unta, unta, unta

ania ko karon
sa akong adlaw nga natawhan
ug imong adlaw nga natawhan

nakalimot kana?
napuno na usab ang imong lista
sa imong mga nagkadaiyang
aktibidadis

ako nawanani na
ang imong hinigugma
nga nia nagpaabot

katuk-ong niining lamesa
kanimo nagpaabot
kung kanus-a ka muabot

haron atong saw-an ang ika napulo
nato ka tuig nga panag-uban

unta, unta, unta

ania kana niining tungang gabii
apan hain kana usab
maayo lang ug nalingaw ka

uban sa imong mga higala
kay dili na kaayo ko mabalaka
apan ipa-unsaon ko man kung

atua ka nagsadya kauban niya
nga imong una

unta, unta, unta

ania ka kanako
apan wala akoy mahimo.

ang sunog nga miulbo

Nihinumdom pa ko
Decembre kwatro kadto
didto tang duha sa tindahan

ni Manong Pedring
niinom ka ug
usa ka botelyang beer pelsin

samtang ako namalit ug betsin
timpla sa akong gi-utan
para panihapon niadto

abi nako ug gi-urom ako
mitihoy ka kanako
usa ka ambungan, barugan,

ikaw pusturawo
samtang ako wala gani'y
pangarte kay nahikay lagi

milingi ako
ug didto miulbo ang kalayo
nga nipadilaab kanato

nga walay nakapalong
hangtod karon
ning sayong kabuntagon

pila na gani ka trak
nga bombero ang misulay
apan wala nakapahinay

sa atong pag-ulbo
abi nako ug usa ka adlaaw lang kadto
apan milabay

ang tulo ka bulan
karong adlawa
pagkakatingalahan.

didto ikaw ang akong hinumduman

nakita mo ako
ug nakita ko usab ikaw
nasayod ako nga wala ako'y bili

kinsa ba ako nga imong atimanon
dalikyat lang ang higayon alang kanato
wala kini mulungtad kay nahadlok

sa kamatuoran nga daw kabugangan
sa ka gubot, dili daling masuot
busa mipadayon ikaw

ug hasta usab ako
dindto sa atong
managlahing kalibutan

apan ingnon ko ikaw
dili ko kalimtan kadtong
pagdip-ig mo kanako

ug kadtong hawid mong nanuot suot
sa kong mga kabukugan
bililhon kato kanako.

ang paglangoy ni piolo sa kalayo

peatz pud
wala koy planong muluwas ni bisan kinsa
kung naa silay problema ay ila nana
kay aduna pud akoy daghan dili na gani
ko hapit makita kay natabunan
ug labaw nang dili nako luwason si piolo
sa iyang mga pagpakasala
labawng wala akoy makuha
dako nana siya tigulang
nan aduna nana siyay kabuot
siya na ang bahala
kung mukaon, mulangoy, o
mubalitok ba siya diha sa kalayo
iya kanang kagustuhon
ug bisan usa ka katudlo dili ko alsahon
kay kung wala siya diha kauyon
di muhaw-as siya,
aduna pay higayon.