Ang Paril

Sama'g paril
wala mairog,

wala'y kinabuhi,
wala'y pinitik,

kay wala'y
kasing-kasing

Ug migahi,
nitikig, nilagom,
nawad-an sa gahom.

Unsa pa ma'y iya?

gawas sa paghunos,
pagkutlo, pagluka
sa dughang bato

nga nalubong
sa hinigugma
kaniadto.

Ang kapuol

Naabot ang kapuol--

ang pagka walay uminto

gadagan nga daw sa kawang

mga naabog nga paglaom

Dili matikang nga mga tiil
sa ang-ang sa panumduman

hinagiban sa nahimutangan
niining tiilan sa himaya

ang pagtuon ug lupad

unsa man sa'y mapuno nimo
kung imo lang kalingawan
ang paglupad?

tingale ugma mas hawod kapa
nga mulupad kay sa imong inahan

maong ayaw huna hunaa nga gabalak ka
apan anara ang kaugalingon
nga litukon ang sama sa tambol
nga mga pulong.

kinsa

kinsa ang angayang maulaw?

siya nga nagyubit,
siya nga igo lang sa pagtan-aw

ang matuod nga balak

walay kapin kon kulang
gikan kini sa kinahiladman
mga pulong nga muhulagway
sa ania sulod sa balatian

nitulimbang man kini
o musalom dinha sa pagsugod
sa gagmayng mga lakang
sa batang nagkat-on ug baybay--
pahiyom nga dako sa iyang inahan.

dili hulip

migilaw man
ang syudad sa iyang kalipay

dili kini igo nga mulingaw kaniya
bisan sa iyang pagpauraray

miawit man and syudad
sa sirbato sa mga jeep nga milabay

dili gihapon kini hulip
sa mga nanag-awit nga mga punay

ug sa labo nga mga talidhay
sa iyang anak nga gamay.

Gilutos

nagpa-ilob,
nagpa-ubos,
wala man lang gani mutingog

sa mataghigayon
nga imo akong gitamparos

unsa ba gyud diay ang akong
sala diha kanimo
nga imo man akong gilutos?

sayop ba diay kanang mahigugma ako
sa paghan-ay--laray sa mga pulong
dinhi sa akong kalipay?

hinuklugi kanang akong pangutana
alang kana kanimo higala

wala ako maglunang anang giingon mong
lim-aw sa pagpakasala

angkunon ko
dili ako santo, tawo ako

makasasala
wala ko na ipanghimakak

apan masakitan usab ako
kay maantigo akong mahigugma
sama kanimo.

wala ka ba diay pul-i kanako?

nganong ako lang gihapon
ang kanunayng unod sa imong pangagho?

wala ka pa ba diay
pul-i kanako?

gikaingon ko ba'g
naabot kana sa imong panaw palayo?

igo na, igo na
ako karon ang muingon kanimo

sakto na, makapoy kanang magdagan
nga wala ka gukura ni bisan kinsa.

ang akong pobreng panglantaw

wala ako'y katigayunan
nga punayan mo'g duaw

wala ako'y sapi
nga imong mahagdaw

kung aduna man ako,
kana ang akong pobreng panglantaw.

ang pagmugna nga ila usab

kinsa ba sila nga muhusga kanimo?
wala gani sila maka-ila kung kinsa ka
ug kang kinsang kamot ang imong gidala

pagkahanggaw sa tawo nga mupatol kanimo
wala kay kahibalo, usa ka lang kaulipon
sa imong gugma sa kinaiyahan, sa buhat,

ug sa pagmugna nga ila usab.

sayaw inday

sayaw, sayaw inday
pagmaya dinhi sa payag mong gamay

wala ka mag-inusara
giduaw ka sa mga punay

kay bisan sa ilang pagpanaway
wala silay mahagdaw kanimo
bisan dyutay.

kangitngit, kangitngit

kangitngit, kangitngit
unsa bay angay nilang kahadlukan?

dili ikaw mulamoy kanila--
nga naa nagpatampi sa ganghaan,

sa imong pag-inusara
luyo sa kahayag sa adlaw.

dili ba sila usab sama kanimo?
nangita sa kapahulayan dinha

sa imong pagpakli sa panid sa ilang
matag adlaw nga walay kapuslanan

pagkawalay kagawasan
sa mga bukton sa madaug daugong
tulisok sa adlaw

nga wala pa nila matuod naaninaw.

alang lang kini kanimo

gustong kong masayod ka
akong minahal
wala ako nag-ambat
sa bisan unsa nga bulawan

ikaw ang akong hangin,
ang akong gininhawa
sa pagsulat ko niining
akong mga linya

igo na nga nagpaminaw
ka kanako dinhi sa akong isla
ug nagtan-aw sa akong gugma
nga alang lang kanimo ug dili kanila.

gihigugma ko ikaw

mahanaw man ako
diha sa imong panglataw
ug muhulip ang pahiyom
sa bulan ug sa adlaw
ikalipay ko kana
kay gihigugma ko ikaw

sa akong pagsalom sa kamingaw

pila na usab ka adlaw
nga gisalom ko ang kamingaw
nagpakahilom, nagtuk-ong
sa akong kaugalingong pagtuo

wala manumbaling sa imong
mga pasaring nga pulong
dili ko buot ang makiglambigit
sa mga sampinit nga

musulay kanako pagtuki
sa gibati sa akong dughan

karon gigutom ako sa imong
mga hapyod sa akong mga panit
pagkutaw sa akong mga utok
sa mga pulong mong gustong ipaabot.

ang babaye nga nag-inusara sa iyang dughan

Sa tampi sa baybayon milingkod ang mapahiyumong babaye, mihangad siya sa langit nga asul ug giubanan sa kahayag sa adlaw samtang ang iyang mga hubo nga tiil namati sa kabugnaw sa tubig nga tin-aw; nagtunlo tunlo--duwa sa tubig nga walay kabalaka kay anaa tapad niya si dodong nga mapahiyumong naglantaw lang kaniya ug sa daw walay laing nakita gawas lang sa bulak nga iyang gihawiran--ang babaye nga nag-inusara sa iyang dughan.

Nasaksihan ko ang ilang gugma

Nasaksihan ko ang ilang gugma nga bisan sa mga tamparos sa hangin nga nasina kanila wala sila manumbaling hinunua mipadayon sa ilang paghigugma sa usa'g usa nga walay gihambing kahadlok ug pagduda sa ilang padulngan nga ugma--buhawi man kini o alimpulos sa mga tulisok ug sagpa sa katilingban nga anaa naglarayng kalimutaw nisaksi usab ug nagpaabot sa ilang mga laraw diha sa baybayon nga daw asukal sa kaputi ug katam-is sa ilang mga pahiyom--kalipay alang sa duha ka binuhat nga daw gitaganang managtiayon sa kahitas-an sa langit nga karon talisalop na ug misugod na pagkuyanap ang dulom.

igo na, igo na

igo na,
igo na ang kalim-an ug pito
ka gutlo sa atong panag-uban

igo na,
igo na ang pagtuklod mo kanako
sa nagpahiyom nga bulan

igo na,
igo na ang kalibuan ka pangutana
dili ko na kana matubag pa

Wala ba?

gugma, gugma, gugma
ikaw ra ang nag-ingon
nga ang gugma wala magsapayan
sa kagahapon

apan naghusga ka usab, wala ba?

kasilag, kasilag, kasilag
matud mo gihuptan ko kana
ug ginapos ako diha
sa akong pagkapukan

apan nasilag ka usab, wala ba?

nasayud ko

kay unsa ba ang akong nadungog?
unsa ba usab ang akong nakita?
unsa ba ang akong natilawan?
wala kana niana...

dili mo lang gihapon kana hinsabtan
kay ang ako' ug imong panglantaw managlahi,
dili managsuon ug labawng dili kaluha
maong ayaw ako tudlui

nasayod na ako niana..

pasaylua ako

sayong kabuntagon
ang pagbangon sa kasaypanan
nga akong giangkong kagahapon
ako karon ipamahaw ug tunlon
dinhi sa lamesa sa atong panagtiayon
panghinaot imong pasayluon

dili gihapon kita nila hinsabtan

duol na usab ang kabuntagon
misugod na pag-awit ang kalinaw,

kamingaw dinhi ning galamhang
makanunayon dinha sa ilalom sa

pahiyom ug kainit sa gugma
nga ikaw ug ako lang
wala sila nianay kasayuran

ang tambol lang sa atong kasing kasing,
ang dinagungong lang sa imong dugdog

ug ang kadlit sa atong daklit nga kilat
sa pagbati ang ilang nakita

dili ang tanan
nga atong gisaw-an,

maayo lang unta
apan bisan pa,

dili gihapon kita nila hinsabtan.

paabuta ko

kapakyasan man ang linugdangan
niining tanan

tunukon man ang akong
agianan


dili ko kana igsapayan kay
luyo niining tanan

nasayod kong anaa ikaw sa unahan
naghulat kanako

nan paabuta ako
kay maabot ako didto sa ato unyang langit

nga padulngan.

ako ug ako gihapon

giutlib mo ang kalipay
sa nagkausbong ko na untang gugma
dinha kanimo nga subang sa sidlakan
gibaraw mo sa dako nimong katawa--biay biay

nagmadaugon ka
apan ingnon ko ikaw dinha
sa imong langit nga nahimutangan
nga inadurnuhan sa imong mga bertud--pasundayag

nga kaluoy, kabalaka kanako
nasayod ko, bisan gani ang imong
mga pangagho, wala kini nalimod kanako
hangtod karon bisan sa imong pagpakahilom--pagtago

ako ug ako gihapon
ang unod sa imong pagbakho.

unsa pay ako?

hago, lapoy
nahadlok
kining ania sa hunahuna


lisod, pait
kagul-anan
man ang kanimo mahigugma


gubot, kaguliyang
dili man masabot
kining ako karong kahimtang


insakto, matuod
nga ikaw ang nag-inusara
dinhi sulod sa akong dughan


gisinggit, gihandom
bisan imong gibiyaan
taliwala sa akong pagkapukan


nagbangutan, nagmagul-anon man
dinhi sa atong katapusan
andam kong itugyan ka sa imong kagawasan

unsa pay ako?