Ang kahayag nga wala sa kagabhion

silang mga gustong makat-on
nangapkap sa kangitngit
nanimpalad nga masugatan
ang kabuntagon
nga nagbaton sa kahayag
nga wala sa kagabhion.

Unsa bay imong kasayuran?

kinsa siya nga may kasayuran
kinsa siya nga naghupot nianang
mga ginagmayng kalabutan

dili angayang mupasundayag niini
kay basin adunay pa unyay labaw--
nagpaatbang ug nagpaminaw

wala kay mapaabot kanako karon

walay nada
ang akong mga adlaw karon

maong ayaw ako paabota
wala kay mapa-abot kanako

unya nako mag-asoy
inig abot sa ika-pitong adlaw

gisan sa akong pagpulaw...

antuson ko ang tanan

pasaylua ako
kung nakahimo ug kalapasan
apan ingnon ko ikaw
wala ko kana nahimong
kabasulanan
kay ikaw gihapon ang akong
dagat nga languyanan,
ang sawmon sa akong
kahilom nga bisan sa kangutngot
andam nakong antuson.

anino

gusto ko anang istorya nga walay kamatayon
gusto ko anang basahon nga wala'y katapusan

gusto ko anang mahimong anino nga bisan
sa kamatayon anaa nag-atang kanimo.

buot ko pa

sa gihapon antuson ko ikaw
dili pa igo ang katuigan sa
atong panag-uban,

buot ko pang magakos ikaw
buot ko pang muuban
sa imong mga lakang

bahalag ako magsalimuang...

ang balak sa hulmigas

nasayod kong gibuhat mo na ang tanan
gibungkag mo ang akong balay nga bunbon

ug imong gilabhuan ug init nga tubig
sa imong pagtuo nga mulayas ako

sa imong panimalay ug dili na mubalik
kay gisamukan na ikaw sa akong

kanunayng pagpang-it--ginagmay
sa kiting nimong nitamak sa akong

kagamay, ikaw kadtong walay puamod
imo akong gitiwasan ug mudmod

sa lapok nga imong gituhuang
maoy akong katapusan, apan sayop ka

dugay na ako diha, sukad sa akong
pagkabata lumulupyo na ako diha

ug dili mahitabong wala maka-ila kanako
ang lapok nga imong gipahalok ug gipagakos

diri sa akong nawong
nga bisan pa gani nagpakahilom

pagkawala mo gyuy puamod
dili gyud malilong nga igsuon mo

sa bunbon, ikaw kadtong abog
nga kugihan manulisok

sa matag tayhop sa hangin.

nahalo sa kagutom

halo ka sa usa ka gugma
wala mo gipanaad ang paghunos
anang hangin sa ilong sa kabos
nga anaa nangandoy sa imong
tubig nga giinom sa kauhaw
diha sa pagpamalak
nasayod ako, dili ako ingon
kabugok ug utok
gipasagdan ta lang ka
basin sa imong pagdalu niana
ikaw mabusog.

ang kaibog

nilabay ako'g sapa ganihang buntag
unya didto ako nagdula-dula
sa tubig apan nasunog dinha
ilalom sa adlaw nga nagdilaab
sa tumang kalagot ug nagpanghambat
daw nabuang nga iro ning
huwaw sa kaibog.

Alang kang bay alan

kanimo ako nakakita sa hulagway
sa kalipay nga hilabihan

kanimo ako nakabaton ug pagsalig
nga angayang batunan

kanimo ako nakakaplag sa higala
nga gidawat ako nga wala'y sukaran

ug ikaw karon akong gipasalamatan,
manghinaot nga hangtod sa kahangturan

atong saw-an ang gasa sa panaghigalaay
ug iuban ta si inday nippy nga atua

nipahiyon na usab bitbit ang puwahay
pa niyang anak.

lingia ako

gisabot ko ikaw
kutob sa akong mahimo

aduna kay kabilyako
apan wala ako magmulo

kay nipadayon pagtambol
ang akong kasingkasing

bisan gani wala na ikaw
karon kanako magkabana

paglingi, lingi-ako...

kanimo pinalangga

wala nako igsapayan ang imong
pagpanghinaway kanako

tingali may gugma ka lang
maong dako ang imong kahaw-ang

sa dihang wala ana ako mupakita
diha sa imong mga damgo

ang banig

gisaulog ko ang imong pagkapukan
apan ingnon ko ikaw bisan ako sungayan,

aduna usab ako'y balatian nga mas putli pa
tingali kong itandi nianang banig
nga imong gihigdaan...

Ang salog nga pula

nus-nus niadtong dugong pula
haron pagpapas sa hulagway
sa karaang tabla nga aduna nay
napulog duha ka tuig nga wala
mapuy-i, ug karon imo akong
gitabangan pagpasinaw balik
sa iyang pula nga dagway
nga gihudlat sa tinulo sa ulan
ngadto sa pagkadugta, hinaot unta
ato pa kining matabang
kay gimingaw na ako diha
sa imong mga bukton
nga akong unlanan, ug magpa-uraray--
nga puno sa kalipay, lakra
ang atong mga hulagway dinha
sa salog sa kamatuoran
nga pula ang balatian.

Ang kahayag nga gipatong diha sa ibabaw sa Tabor

nalantawan ko ikaw
nga anaa na usab dinha
sa ibabaw sa imong bungtod
sa Tabor,

miingon ka kanako nga dili
mo buot manginlabot sa
kinabuhi sa uban kay unsa may
imong kalabutan kanila

wala nimo kana mabatasan
ang pagpanghilabot sa ilang
mga naagian, kay dili
mo usab buot makapasakit

apan ang wala mo hinsayri
gihikap mo sila sa ilang
tagsa-tagsa ka dughan
kay matuod ikaw ang kahayag

nga gipatong diha sa Tabor
antaw sa tanan...

pagpanghagdaw

naglarayng mga kalimutaw
naglantaw sa pakaw
nga namungi-ngi diha sa ilalom sa adlaw

wala ako gadamuraw
usa ako ka inahan nga nanghagdaw
sa matuod nga gugma mo'g panglantaw.

Patik

wala na ako mangandoy
nga mahimong panganod
ug mapatik diha sa imong langit

igo na kanako ang makita
ang akong pangalan
nga patik diha sa imong
dughan...