Gihigugmang tanghaga

Buot kong sulaton ang tanang balak
kung pweding mahimo
haron maipadayag lang ang akong gibati.

Gihigugma taka,
oO ikaw ang akong gihigugma
kana dili ko malimod,
bisan ikaw nasayod
Unsa pay imong ikasugilon?
ang imong misteryo
gitulon ko na
pero basin diha nalang kutob
kay igo nang nahigugma ko ikaw.

Salig ako, ug saligi ko,
nasayop man
ayaw ko husgahi
kay bisan sa unsa pa
wala kini basuli
kini inay gipasalamatan
nagmatuod nga ako
tawo lamang.

Ug kay nadawat
gidawat ko ikaw
bisan sa luyo niining
tanghaga nga ikaw.

Giangkon Ko

Adunay litrato sa usa ka dapit sa ilawom sa dagat,
usa ka dapit nga walay si bisan kinsa ang nasayod.


Kinsa ang may kasayuran niini?
Kinsa ang adunay katangud pag-angkon nga siya,
kung sa tan-aw lang siya sa litrato kutob?

Siya nga gakuha niining hulagway ang may
katungod pag-ingon nga nakita na niya kining tanan,
nahikap, nakaplagan sa pusod sa dagat.

Samang ako adunay katungod pag-ingon nga naila
ko ang akong hinigugma
kay nahikap ko na siya,
nakaplagan, nasaniud
ug gani nasawom ko na ang iyang kinahiladman
nakita ang iyang batuong dagway
ang nagtampusisok niining mga pundok sa isdang
katambak, nga buot muilog, muhalok sa iyang pagkasiya.
Ug bisan sa iyang mga tinaguang kangitngit
natagamtaman ko na. Ang luhang akong gilangoy
nga wala ko malumos kay nabuntog ko na.
Akoa na siya, dili lang sa hulagway sa litrato nga gihuptan,
giangkon ko na siya, sa iyang matuod nga pagkatawo.

Ikaw

Sa akong pagtidlum niadtong usa ka tubig--

lalom nga dagat sa gugma,

akong gipangandaman ang mahimong tigmo

sa akong gipangitang kasayuran sa kinahiladman

sa imong pagka ikaw.

Hinaot buligan sa kapalaran

hingkaplagan ang dalan

masayran ang ikaw.

Latid

Wala nay susama kanimo
bisan ibutang tang malisod sabton
ang tanghaga nga naa niini

Dili na kini kinahanglang usbon pa
kini mao ang gituga sa Diyos alang kanato
Ikaw para kanako
samang ako para kanimo.

Ikaw ang akong himuong dalan
sa pagpakasantos
bisan pa sa katawa sa uban.
Mahinangpunong pasalamat
sa tugang nga ikaw
maayo nalang ikaw
karon ug unya
dili ko maguol,
naglibog sa unsa mang sitwasyon.

Dili ko buot maglunang sa kasaypanan
ikaw ang himuon kong matuod
ug bisan sa tiaw ikaw gihapon
ug wala nay lain,
samang ang palad nga kanako gilatid.

Panag-ila-ila

Naila-ila ko ikaw
samang naila-ila mo ako
apan pinitik lamang kana
dili kana ang tanang ako
ug samang dili kana ang tanang ikaw

bisan pa mapasalamaton ako
naila-ila ang sama kanimo

samang ako masapasalamaton
nahimo kitang managka-ila bisan pa
sa kasayurang dili ka makigsandurot
sa sama kanakong kabos lang
ug susamang kalidad nga imong palay-an
kung ikaw masayod sa tanan.

Ang among tugkaran

Mitulo ang akong mga singot
sa kakugi ug sa gugma
ganihang adlawan
sa dihang gihawanan ang akong tugkaran.

Ug siya ang susamang tugkaran nga akong
gitagaan ug bili.
siya ang tugkaran nga akong himuong pinuy-anan
samang ikaw ug ako ang manghawan
niini sa matag higayon.

Nisalig ka kanako ug ako kining ipasalig kanimo
nga dili ako manungbalay
samang ikaw ang akong balay
ug dili na pangitaon pa ang uban.

Bulahan ako nga anaa ka,
bulahan bisan managlahi kita
nasayod kong ang kalisdanan
mabuntog ta sama nianang mga sagbot
sa atong tugkaran
nga karon imo nang gidaigan.

Karon hawan na,
hayahay na usab
ang imo ug akong panglanataw
akong pinalanggang kauban.

Ang akong lawak

Sama'g usa ka lawak
ako ang lawak nga responsabli
andam musapupo, mudawat sa gustong mudayon
dili igsapayan ang bisan unsa ug kinsa
kay ako ang responsabling lawak
ako mao ako ug dili sama kanimo

Dili man adunahan ang akong lawak
ug samang dili man kini dinayandayanan
ang akong lawak may katre kining kawayan
ginama para kahigdaan sa bisan kinsang mudayon niini
Adunay lamesa nga kakan-an sa mga midayong gigutom
adunay duha ka bangko ug usa ka bangkito
gama sa kamot sa tawo
ug para sa tawong adunay gugma sa pagdawat sa maong lawak
yano kini, dili espisyal
apan mapagarbuhon
samang ikaw sa ingon mong lawak.

Ang lawak nga misteryo

Miadtong lawak nga misteryo
Midayon ako nga way pupanuko
Dili ngiob ang iyang nahimutangan
Ang iyang mga mwebles adunay mga gihambing
katigayunan
Ang katigayunang ilang pinundar uban
sa iyang kapikas.

Wala ako mahadlok
Bisan sa multo nga iyang giingon
wala manlimbawt akong mga balhibo
bisan pag puno kini sa misteryo.
Ang lawak iya ug imo
Ug dili kini mahimong ako
kay wala ako gihangyo nimo.

Nasayod ko, naksabot ko
Ayaw ingna nga miatras ko
Dili kana mahitabo
Kay wala pa koy giatrasang bugno
Kung may miatras man kana dili ako
Kungdi ikaw, ikaw ug ikaw lang.