Ang among tugkaran

Mitulo ang akong mga singot
sa kakugi ug sa gugma
ganihang adlawan
sa dihang gihawanan ang akong tugkaran.

Ug siya ang susamang tugkaran nga akong
gitagaan ug bili.
siya ang tugkaran nga akong himuong pinuy-anan
samang ikaw ug ako ang manghawan
niini sa matag higayon.

Nisalig ka kanako ug ako kining ipasalig kanimo
nga dili ako manungbalay
samang ikaw ang akong balay
ug dili na pangitaon pa ang uban.

Bulahan ako nga anaa ka,
bulahan bisan managlahi kita
nasayod kong ang kalisdanan
mabuntog ta sama nianang mga sagbot
sa atong tugkaran
nga karon imo nang gidaigan.

Karon hawan na,
hayahay na usab
ang imo ug akong panglanataw
akong pinalanggang kauban.