Kulot nga buhok nga wala masudlay
sa tingog sa inahang nanganay-kanay,
kunot niining mga kilay
mipadayag sa iyang kasakit nga gihambin
bisan pa sa iyang pagkagamay.
Luhang midagayday sa tuong aping
daw badlis sa palad nga gilatid nga maangkon
bisan sa kalinghod sa huna-huna
ang mata niini nidilaab
galantaw'g nagandoy sa maayo niining ugma.
Ngabil nga abli, buot musugilon sa iyang gibati
apan walay igong katakos gadumili, walay laing nahimo
gawas ang paghilom dawat sa kapalarang
dili buot nga maangkon.
