Ang pagpaningil sa kinaiyahan

Nilabay ako ganiha
sa mga natumpag
nga mga paril
ug mga dalan
nga naguba
sa Santander,
ug Samboan

nga niadtong
niaging Sabado
gibalikan sa
nagbangutang,
naligotgot,
nga iyang kanhi
hinigugmang
kina-iyahan,

nga sa kalagot
iyang gipanglubong
sa mga lapok
ang duol sa
kalim-an ug lima
ka balayang
kaniya kaniadto
mitulisok.

nga bisan sa pagpa-agay
sa iyang mga luha,
wala kini siya
paminawa

ug gani sa iyang
pagsinggit
kanila nga
"IGO NA"
wala bisan usa
nga nakadungog

ug nangabungol sila
ug karon bisan sa daklit
naningil siya
sa kanhi ilang
pagdaug-daog.