Tanang gugma adunay tanghaga
Tanghagang usahay dili nato makita
Susama sa akong gugma ngadto sa akong bana
Gawasnong panghinaot sa usa ka timawa
Dili man kini perpekto sa mata sa tawo
Gikinahanglan tan-awn mo kini nga usa ka kibido
Sa sinugdanan palang,
Aduna nay dakong deperensiya
Mga higayong sa uban dili ordinaryo nga gugma
Kay unsa man gyod diay ang gugma?
Ikaw aduna nabay hubad ug kahulugan niini?
Unsa ba gyod diay kini?
Nganong daghan mubabag ug daghang mudili?
Dili ba diay ang gugma kagawasan?
Kini mao ang hubad nako sa akong gugma
Gugma nako ngadto sa akong bana
Dili lalim ang muharong sa dakong balud sa katawhan
Batukan lang ang ilang pagdili ug pagbabag
Sa giingon nilang gugmang way kagawasan
Apan duna silay mata nga mahusgahon
Mata nga wala mubati ug musabot
Sa among pagka matinud-anon
Wala nila hisabti nga ang among gugma gawasnon
Gawasnon bisan luyo sa paggapos
Sa idolohiya ug prinsipyo sa katawhan
Apan walay angay nga kahadlukan
Pinisik lang kini sa dakong gugma
Sa tawo nga nako, nimo ug niya
Dakong gugma nga adam ug tagana
Sa tanang posibling mahitabo
Bisan pa ang kamatayon sa kalbaryo
Gawasnon nga gugma
Gawasnon ug walay pagduha-duha
Walay gikawid-an
Sungasungon ang tanan
Kini ang akong gugma
Gugma nga akong gihalad
Sa tawong akong ubanan
Sa kapait ug himaya
