ang uling sa pantaw

malisod ang paglalin
niining mga pulong
nga gusto nimong
mahulma, malakra,
diha sa kasingkasing

sa mubasa niining
panimalayang
may kagawasan
sa pagmugna
sa iyang kaugalingong
istorya

ug kana
dili na inyuha,
wala na kamo diha
inyo mao lang ang
paglantaw,
atong sa inyong
gidudahang
misingaw nga panghaw

wala ako magprito
ug bulad nganong
naalarma man kamo'g
nagdagan haron
paglantaw kung unsa
ang nagdilaab
diri sa akong pantaw,

dili kana unsa
ang ako kanang gihaling
nga uling kay gaplano
kong mangutaw
sa uga ko nang sinina.

pastilan pagkanubilira
bantayi kanang inyuha
dus-i kanang inyong
linung-ag basig hilaw-luto
unya ang resulta niana

ayaw kabalaka
wala kuydaw kini,
dili kamo maapil
ning uling
inig kaugdaw niini.