Ang gibantog nga balakero ug ang iyang meta4

adunay us ka bantugang balakero
adunay pipila ka tinaguang metaporya
nga nangalimyon samag albahaka
albahakang igsasagol sa sud-ang dinuguan
haron ang kalangsa mawala
ug matagamtam ang matuod nga
aroma, alimyon sa usa ka balak.

Ang labong nga albahaka
nga panag-iya sa usa ka balakero
malambuon kini'g maagnihon sa mga nangagi'g
ningbisita sa pnuan niini.

Garbong mipasundayag ang balakero
garbong niabi-abi sa mga niagi'g
mipahiyom ang iyang kaberde
sa mga buot mukutlo niini.

Ang iyang dahon--kalag sa iyang balak
iyang gipauban sa usa ka babayeng
buot muluto ug dinuguan,
gahinam-hinam ang iyang kalag--
ang dahon nga unya kumot-kumuton,
tadtaron, pinu-pinihon, pug-on
uban sa dugo sa baboy
haron mahimong sud-an unya sa panihapon.

Ug ang dahon nahimong sud-an
gipanihapon sa babaye nga galuto sa dinuguan,
mitulo ang laway sa dahon,
migawas ang duga sa kahumot
ug nahimong lami nga dinuguang
imo karong giatubang.