Adunay tulo ka toreng nagmasid
ibabaw sa panganod nga nahimutangan,
naniid, naminaw, nagpakasabot
sa wa ko masayod nga hinungdan.
Aduna ba diay ako'y wa himbaw-i
nga ilang nahibaw-an?
Luyo niining bagang gabon sa pangutana
pasabta ko.
dili matugkan sa akong huna-huna ang mga
sugilanon nga akong nahibalag kaganinang kaadlawon.
Kinsa, unsa nga sitwasyon
nganong may gabagang balita nga sa daw ako lang
ang gamata'g buntag.
Pasabta-pasabta intawon,
akong intensyon usa ka tinarong
dili tinunto, kabuang ug bisag
gamay wala ko'y gihimong lakang
nga ako unyang pagabasulan.
Gusto ang kinabuhing malinawon,
dili kanang naa sa ibabaw sa langit
apan gitabunan sa daghang mga gabon
nagpangapa sa kahayag, kalantip
ug sa kalinaw nga daw bulawan
sa akong uyamot nga galamhan.
Wala man tingale ako masayop
wala man tingale ako mahisukamod,
wala mahimong huyang niining pag-inusara
kay naa ko sa katarong.
Dili ko buot ang kagubot
Dili ko buot ang adunay magbagutbot
Gustong magpakahilom
kanang hilom sa dayon.
