balak

KANUS-A

Kanus-a nahimong ginapos ang gugma?
Kanus-a nahimong pag-antos ang gugma?
Kanus-a nahimong kasakit ang gugma?
Kanus-a nahimong kahakog ang gugma?

Bisan si kinsa ang imong pangutan-on
Bisan si kinsa ang imong kunsultaon
Tanang tarong nga tawo
Mituo nga ang gugma usa ka makatarunganon

Usa ka natural na pagbati
Nga walay katungod sa paggapos sa hinigugma
Usa ka panulundon
Nga sa tanang higayon gikalipay niya
Ang presensiya sa iyang hinigugma
Ug andam nga muhatag bisan unsang orasa

Kada tawo nga nag-angkon ug gugma
Kagawasan ug pagmaya ang naa kaniya
Ug dili kapaet, kasakit ug kahadlok sa iyang hinigugma
Kay ang matuod nga gugma
Mao kadtong walay katapusan bisan
Ang edad dili basihanan.