Ang Inting kong gamay
Sa iyang papa gisapnay kanunay
Bisan sa kalisod sa kahimtang
Wala gyod gipasagdan
Pamahaw, pani-udto ug panihapon
Kan-on ug utan ang gisaligan intawon
Maayo nalang sad
Kay pwerti nang mahala
Ang gatas nga gitutoy niya.
Ug wala ko mahayi
Nga iyang papa
Akong gipabantay niya
Kay sa yaya
Nga magdangag lang
Ug dili maatiman ug maayo siya.
Karon ang Inting kong gamay
Kusog nang mudagan
Usahay dili na nimo mapugngan
Ang simbahan sa Argao
Iya na tanan
Malukop ug tuyok
Ug si bisan kinsa gikataw-an.
Ang ako lang gikalibgan
Karon musulti na siya
Bisan dili nimo masabtan
Kalipay nako ang tanan
Matag pulong nga mugawas sa iyang baba
Gitik sa akong galamhan
Apan ang nakadaot lang
Mama ang tawag niya sa iyang amahan.
