
Hulagway sa Kaminyuon
Ang mga batan-on karon
Kung musulod ug kaminyuon
Dili susama sa ilang ginikanan
Niadtong unang panhon.
Ang panlantaw adunay kausaban
Panagbingi sa kadaiyang kagustuhan
Nga muresulta sa pangbuwag
Ug pagbasol ang kadaghanan.
Nahinumdom lang ko sa akong ginikanan
Hangtod karon sila malipayong nanag-uban
Nadawat ang tagsa-tagsa
Gihigugma bisan ang ilang mga deperensya.
Ambot lang ang mga kabatan-unan karon
Kung sa ilang pagpuyo matigayon
Diin wala nay laing importansya
Kundi ang trabaho ug ang kwarta.
Sukad lang nahimong abanti ang kultura
Ug tawo nigamit sa kabag-uhang teknologiya
Ang huna-huna niini nagmausabon na
Gamayng problema?
Ang kaminyuon panagbuwag ang resulta.
Unsaon nalang ang ugma sa mga batan-on
Kung ingon niini kahuyang ang kaminyuon
Gamayng kasakit lang ang bation?
Dakong unos ang posibling maangkon.
Paet kining palandungon
Dili ba diay pweding balikon
Ang kanhing simbolo sa kaminyuon
Diin gugma ug pagsinabtanay
Ang makita sa manag magtiayon.