Ang ice cream

mitunol ka nako ug ice cream
rocky road ang flavor miingon ka
gasa nimo kadto sa akong
adlaw nga natawhan

apan ang ice cream nimo nga giingon
usa lang ka hulagway ug pulong
maong wala ko malipay
dili kini igo
unsaon ko paglipay ang akong kaugalingon
sa katam-is niini?
ug unsaon ko pagtilap,
tam-os sa matag kutsarita,
kung kini usa lang ka hulagway?

Dili kini ang akong panangandoy.

dili kini sama sa akong nadawat gikan kaniya
nga akong matuod nga hinigugma
ice cream nga matuod,
ang selecta nga chocolate flavor

ang ice cream nga gaaso-aso pa
gikan sa iyang lawak taguanan
ang ice cream nga nahimo nakong pamahaw,
paniudto, ug panihapon
sa akong adlawng natawhan,

ug karon akong gitam-usan
niining sayong kabuntagon.
ang katam-is sa
matag kutsarita
sa maong ice cream,
maoy nahimong matuod nakong kalipay
nga nganay-kanay sa akong
halapad nga kasing-kasing.