Katungod

Nganong mutubag ka kanako?
Nganong tumanon mo ang akong mga hangyo?

Wala mo ako gapusa sa imong
katungod diri kanako
Ug labawng wala tika prisuha
sa akong mga katungod kay
wala kitay katungod
nga gihuptan sa usag-usa.

Miingon pa gani ang imong apuhan
nga tua na sa laing kalibutan
Pasagdahan ka nalang
ug dili nalang kabalak-an
Paundayunan sa imong mga
nagsingabot nga bul-og sa kapalaran.
Sakto ang imong apuhan
maong abli na ang akong pultahan
padayon, lakaw, pangitaa
ang makalipay kanimo.

Ayaw pabilin dinhi niining
akong gamayng katungod kanimo,
Ug labawng ayaw ibilin dinhi
kanang imong katungod kanako
Dili ko kana bantayan
imuha na kana
Kan-a, hutda,
ayaw na panalin
ug panghatag pa niana
kay ania sab akoy rasyon
nga angayan sa akong pagkatimawa.